Ang kahirapan ang isa sa napakahirap solusyunang problema ng bansa. Sa
aking pamumuhay, mayroong ilang maaaring mga sanhi ng kahirapan ng bansa. Isa na ang pagiging impulsive buyer nating mga Pilipino. Alam ko sa aking sarili na padalos- dalos ako sa paggastos, hindi pinaplano kung saan dapat gastusin ang pera. Kadalasan ay inuuna ko ay ang aking mga kagustuhan, kaya naman madalas din ay kinakapos sa pera para sa mga kailangang bagay. Ang isa pa ay ang maagang pagkakaroon ng pamilya. Marami ang mga kabataang napabilang na sa teenage pregnancy. Bilang mga kabataan pa lamang, hindi sila ganoong kahanda sa mga gastusin na kailangan nilang kaharapin. At karamihan sa mga maagang nagkakapamilya ay mga kabataang nag- aaral pa lamang o kaya naman ay mga hindi nakatapos kaya nahihirapan silang makahanap ng trabaho pantustos sa gastusin. Ang aking dalawang sanhi na nabanggit ay iilan lamang sa mga sanhi ng kahirapan at syempre ang bunga nito ay kahirapan. Ang disempleyo ay kawalan ng trabaho at ang migrasyon ay ang paglipat sa ibang bansa. Dahil walang maaayos na trabaho o hindi matanggap sa trabaho, maraming mga Pilipino ang nasasadlak sa kahirapan imbes na makaangat. Sa migrasyon, lumilipat ang iba nating mga kababayang Pilipino sa ibang bansa dahil sa kahirapan, ay mas ninanais nila na manirahan na lamang ng permanente sa ibang bansa kung saan mas maraming oportunidad para sa kanila. Sa tinagal ng panahon, hanggang ngayon ay hindi pa rin malutas ang kahirapan. Ngunit hindi dapat natin inaalis ang paniniwala na makakaalis tayo sa lugmok ng kahirapan. Maaaring pagplanuhan na dapat muna ang mga bibilhin at huwag maging impulsive buyer upang magkaroon ng sapat na pera para sa mga pangangailangan. At kung sa pagkakaroon naman ng pamilya sa batang edad, maaaring pagsabihan pa din ang bawat isa at pangaralan tungkol dito upang magkaroon sila ng kaalaman kung ano ang maaaring kahinatnan ng pagpupursigi sa kapusukan ng damdamin. Maaari pang solusyon sa kahirapan ay ang pagbubukas ng maraming oportunidad para sa trabaho, na hindi nangangailangan ng nakatapos ng matataas na antas ng edukasyon. Dahil karamihan ng mga Pilipino ay hindi na nakaabot pa sa mataas na antas ng edukasyon kaya naman hindi agad sila matanggap sa trabaho. Higit pa dyan, dapat ay solusyunan ang korapsyon sa gobyerno. Sa aking palagay, sa oras na masimulang masolusyunan ang korapsyon ay magtutuloy-tuloy na ang pag-unlad ng Pilipinas at pagpigtas sa pagkakatali nang kahirapan.