Yachachiq: Inocencio Flores Romero

WASKHAMAN PHINKISPA PUKLLANA

Imataq waskawan pukllana

Waskhawan phinkispa pukllanaqa juk waskhata jap’iytawan sapallanchik, manaqa

achkhamanta pukllayta atinchik.

Pikunataq pukllanku

Tukuy runa pukllanku, astawanqa wawakuna pukllanku, chantapis tukuy pachapi,

tukuy ima pukllanku.

Imaynatataq pukllakun

Sapallanchik waskhata muyuchispa pukllasunman, ajinallataq achkhamanta

pukllasunman. Kunanqa achkhamanta pukllanata yachasunchik.

Wakichikuy

Juk phichqa thatkiyuq waskha, achkha yachakuq ima kanan tiyan.

Pukllaynin

Juk pampapi, iskay yachakuq waskhata sapa puntamanta jap’inku, chaypitaq

khiwispajina waskhata muyuchinku. Chaymantaq juk yachakuq yaykun, paytaq
waskhap ukhunta pachanpi phinkin, phinkispa waskhata mana sarunanchu tiyan.

Wakin kutiqa mana jukllachu yaykun, iskay, kimsa ima khuska phinkinku. Pichus
waskhata sarun chayqa lluqsipun, wakñataq yaykun. Ajinata unayta pukllanchik.
Yachachiq: Inocencio Flores Romero

WAK PUKLLANATAWAN ÑAWIRIYTA ATIWAQ

PALAMA PUKLLANA

Imataq palama pukllana

Kay pukllanaqa P’utuqsi suyumanta wakin ayllukunapi pukllanku, chaypi runa

wañusqata yuyarichkaspa sillp’a murmu rumita chuqaspa pukllanku.

Pikunataq pukllanku

Waynakuna, jatun runakuna astawan pukllanku, paykunaqa Todos Santos raymipi

mana chayqa runa wañusqap jisq’un p’unchwaninpi pukllanku.

Imaynatataq pukllakun.

Iskaymanta, manaqa achkamanta pukllanku, paykunaqa iskay qututa ruwanku,

chaypitaq sapa qutu atipanaman rinku. kyjinamanta:

Wakichikuynin

Ñawpaqta iskaymanta, manaqa tawamanta sapa qututa ruwanku, chaymanta juk

pampata akllanku, chaypitaq juk jatun rumita sayachinku, chaymanta chunka
phichqayuq thatkita tupunku. Chaymanta sapa juk iskay sillp’a murmu rumita
jap’inku.

Pukllaynin

Ñawpaqta lluqsinankupaq chawchakunku, pichus atipaq chuqayta qallarin, juk

qutumanta qallarin, chaymantaq juk qutumantañataq chuqan, pichus chay jatun
rimiman (china) astawan qayllachiq yupakun, ajinata juk chuqan, jukñataq chuqan,
chaymanta mayqin qutuchus chunka iskayniyuq manaqa chunka phichqayuqa
yupaman chayaq atipan.

Chaypi aqhamanta, manaqa qullqimanta pukllanku, unay pukllaspa tanatanku,

chaytataq almayuqman qupunku.