Ang Bag ni Inang Kuwago Maikling Kuwento sa Filipino Para sa Ikalawang Baitang
Mga Kasanayang Nakapaloob sa Kuwento:
AP2PKK-IVa-2 • Natutukoy ang iba pang tao na naglilingkod at ang kanilang kahalagahan sa komunidad (e.g. guro, pulis, brgy. tanod, bombero, nars, doktor, tagakolekta ng basura, kartero, karpintero, tubero, atbp.) EsP2P- IIg – 12 • Nakatutukoy ng mga kilos at gawaing nagpapakita ng pagmamalasakit sa mga kasapi ng paaralan at pamayanan. Treasury of Storybooks
This storybook is a product of the National Competition on Storybook
Writing 2018 of the Department of Education.
Pursuant to the Intellectual Property Code of the Philippines, no copyright
shall subsist in this work of Government of the Philippines. However, prior approval of the Department of Education shall be necessary for exploitation of such work for profit. DepEd may, among other things, impose as a condition the payment of royalties. No prior approval or conditions shall be required for the use for any purpose of stutues, rules and regulations, and speeches, lectures, sermons, addresses, and dissertations, pronounced, read or rendered in courts of justice, before administrative agencies, in collaborative assemblies and in meetings of public character.
For the purpose of citation, the following is recommended.
Balacuit, Mariel G., Ang Bag ni Inang Kuwago, DepEd-BLR, 2019.
DEVELOPMENT TEAM
Writer: Mariel G. Balacuit
Illustrator: Neil J. Arado
Learning Resource Managers: Avelina C. Duquesa
Maripaz F. Magno
AGUSAN DEL NORTE
CARAGA REGION Ang Bag ni Inang Kuwago Hindi pa lumalabas si haring araw at tahimik pa ang paligid ngunit dinig na ni Hugo ang kaluskos sa kanilang kusina. Amoy na amoy na niya ang masarap na luto ni Inang Kuwago. Alam na ni Hugo na aalis na naman nang maaga ang kaniyang Ina. Dali-daling bumangon si Hugo at pumunta sa kusina. Tapos nang magluto si Inang Kuwago. Nakaligo na rin ito at nakabihis na. Bitbit na niya ang kaniyang malaki at kulay pulang bag. “Inay, ano na naman ang laman ng iyong bag? Bakit ba tuwing umaalis ka ay punong-puno itong maraming gamit?” tanong ni Hugo. “Ito ay mga bagay na kailangan ko sa aking trabaho,” nakangiting sagot ni Inang Kuwago. “Gusto ko pong sumama Inay. Nais kong makita ang lugar na pinupuntahan mo araw-araw,” nagmamakaawang sambit ni Hugo. “Hindi ka pa puwedeng sumama. Maliit ka pa, hindi mo pa kayang lumipad nang tatlong oras at tumawid sa dalawang ilog,” sabi ni Inang Kuwago. Maliit pa ang mga pakpak ni Hugo at hindi pa niya kayang lumipad nang malayo at matagal. Umalis na si Inang Kuwago at malungkot na naiwan si Hugo sa kanilang bahay. Hindi niya maintindihan kung bakit ayaw siyang isama ng kaniyang Ina. Mula sa kanilang maliit na bintana ay tanaw ni Hugo ang pag-alis ng kaniyang ina. Napapaisip siya kung bakit kahit malayo ang nilalakbay ni Inang Kuwago ay matiyaga pa rin nitong binibitbit araw-araw ang malaki nitong bag. Magtatakipsilim na nang umuwi si Inang Kuwago. Magulo ang buhok nito at halatang pagod na pagod. Dali-dali siyang sinalubong ni Hugo, nagmano ito sabay abot ng isang basong tubig at kinuha ang malaking pulang bag nito na walang laman. Naibsan ang pagod ni Inang Kuwago sa matatamis na ngiti at lambing ni Hugo. “Inay, tara na at maghanda na tayo ng hapunan,” wika ni Hugo. Tinulungan niya si Inang Kuwago sa pagluto ng masarap na hapunan. Pagkatapos kumain ay naghanda na si Inang Kuwago ng mga gamit na kaniyang dadalhin kinabukasan. Isa-isa niya itong ipinasok sa kaniyang bag. Nagtaka si Hugo dahil puro pintura ang laman ng bag ni Inang Kuwago. “Inay, para saan po iyang maraming pintura sa loob ng iyong bag?” tanong ni Hugo. “Gagamitin ko ito sa aking trabaho Hugo,” sagot ni Inang Kuwago. “Aha! Malamang isang pintor si
Inay,” sabi ni Hugo sa sarili.
“Naalala ko isang araw ay umuwi siyang maraming pinturang kulay berde sa kaniyang mukha. Kahit ang bag niyang pula ay may bahid din ng pintura.” Sa sumunod na araw ay nakita na naman ni Hugo na naglalagay ng maraming tinapay, gatas, kendi, at biskuwit si Inang Kuwago sa bag nito. “Aba! Inay, ang daming masasarap na pagkain. Para saan po ito?” nagtatakang tanong ni Hugo. “Gagamitin ko ito sa aking trabaho Hugo,” sagot ni Inang Kuwago. “Aha! Malamang isang tindera si Inay,” sabi ni Hugo sa sarili. “Siguro ay ibebenta niya ang lahat ng tina- pay, gatas, kendi, at biskuwit sa kani- yang pinagtatrabahuhan. Kawawa naman si Inay, sana ay puwede ko siyang tulungan sa pagbebenta ng mga ito.” Sa sumunod na araw ay nakita na naman ni Hugo na naglalagay ng maraming basahan, walis tingting at daspan si Inang Kuwago sa kaniyang malaking bag. “Inay, para saan po iyang maraming basahan, walis tingting, at daspan sa loob ng iyong bag?” tanong ni Hugo. “Gagamitin ko ito sa aking trabaho Hugo,” sagot ni Inang Kuwago. “Aha! Malamang ay isang dyanitor si Inay,” sabi ni Hugo sa sarili. “Kaya pala napakalinis at napakaayos din ng mga gamit sa loob ng aming munting tahanan. Kumikintab ang aming mga kubyertos, na tila maraming salamin sa aming kusina. Sa sumunod na araw ay sinilip ni Hugo ang laman ng bag ni Inang Kuwago. Nagtaka siya dahil puro gamot ang laman nito. “Inay, para saan po iyang mga gamot sa iyong bag?” tanong ni Hugo. “Gagamitin ko ito sa aking trabaho Hugo,” tanging sambit ni Inang Kuwago. “Aha! Malamang ay isang doktor si Inay,” sabi ni Hugo sa sarili sabay tingin sa ulap. “Naalala ko noong ako ay nagkasakit at nilagnat, dinala ako ni Inay sa doktor at nakita ko ang kaparehong gamot doon.” Patuloy sa pagtataka si Hugo kung ano nga ba talaga ang trabaho ng kaniyang Ina. Nais niyang sumama kay Inang Kuwago upang masaksihan ang pinagkakaabalahan nito. Ngunit maliit pa siya at hindi pa sapat ang laki ng kaniyang mga pakpak. Dumaan ang ilang buwan, unti-unting lumalapad ang mga balikat ni Hugo. Lumalaki na ang kaniyang mga pakpak, sapat nang makalipad sa malalayong lugar. Sa wakas! Maaari na siyang sumama kay Inang Kuwago gaya nang ipinangako nito. Isang magandang umaga ang bumungad kay Hugo. Ramdam niya ang haplos ng simoy ng hangin. Nalalasap rin niya ang sarap ng amoy ng luto ni Inang Kuwago. Sabik siyang bumangon at inunat-unat ang kaniyang mga pakpak. “Sa wakas ay makakasama na rin ako sa inyo,” masayang sabi ni Hugo sa Ina. Maaga silang umalis ng bahay at dala-dala pa rin ni Inang Kuwago ang malaki nitong bag. “O, hali ka na Hugo simulan na natin ang ating paglalakbay,” sabi ni Inang Kuwago. “Sundan mo lamang ako upang hindi ka mawala,” dagdag ng Ina. Aliw na aliw si Hugo sa kaniyang nakikita. Napakalawak ng himpapawid, kay puti ng mga ulap na tila sumasabay sa kanilang paglipad. Tanaw niya mula sa ibabaw ang agos ng ilog at ang mga punong sumasayaw sa tugtog ng hangin. Sa kalagitnaan ng kanilang paglipad, naramdaman ni Hugo ang pangangawit ng kaniyang mga pakpak. Napatingin siya sa kaniyang Ina at nagtaka kung bakit hindi bakas sa mukha nito ang kapaguran. Sa halip ay ngumingiti pa ito at mas binilisan pa ang paglipad. Mataas na ang sikat ng araw nang masilayan ni Hugo ang telang parihaba na para bang sa kanila ay kumakaway. Sa likod nito ay isang maliit na kubo na napapalibutan ng makukulay na bakod. “Inay, ito na po ba ang lugar na iyong pinagtatrabahuhan?” namanghang tanong ni Hugo. “Oo Hugo, tara kanina pa sila naghihintay sa aking pagdating,” sagot ng kaniyang Ina. Pumasok sila sa kubo at namangha si Hugo sa kaniyang nakita. Bumungad sa kaniya ang isang berdeng pisara, sa gilid nito ay may maliit na kahong lalagyan ng mga gamot at sa isang sulok naman ay nakahanay ang mga gamit panlinis. Iba’t-ibang uri naman ng mga batang hayop ang nakaupo sa loob na matiyagang naghihintay sa pagdating ni Inang Kuwago. “Magandang Umaga Gurong Ku- wago!” sabay-sabay nilang bati. “Magandang umaga rin mga bata, mabuti naman at nandito na kayong lahat. Kasama ko nga pala ang aking anak na si Hugo. Sa susunod na taon ay magsisimula na rin siya sa pag-aaral,” wika ni Gurong Kuwago. Maya-maya ay inilabas ni Gurong Kuwago ang lamang mga pagkain mula sa kaniyang bag. Isa-isa niya itong ibinigay sa kaniyang mga mag-aaral. Nahaplos ang damdamin ni Hugo nang napagtanto niya ang trabaho ng kaniyang Ina. Nasagot na rin sa wakas ang mga tanong sa kaniyang isipan. “Ipinagmamalaki ko! Isang guro ang aking Ina.” Ang May-Akda
Si Mariel Galeon Balacuit ay ipinanganak at lumaki
sa Butuan City. Nagtapos ng Batsilyer ng Edukasyon sa Elementarya sa Father Saturnino Urios University bilang Magna Cumlaude. Siya ay kasalukuyang guro sa Elementarya. Nagwagi ng 2nd Place sa kauna- unahang National Competition on Storybook Writing for Kinder- garten Category sa libro nitong pinamagatang “Sa Bukid ni Bebot.”
Ang Tagaguhit
Si Neil Jovellar Arado ay ipinanganak at lumaki sa
Butuan City. Nagtapos ng Bachelor in Early Childhood Education sa Father Saturnino Urios University noong ika 27 ng Marso taong 2015. Siya ay kasalukuyang guro sa Paaralang Elementarya ng Kahayagan, Las Nieves District 2, Division of Agusan del Norte. Siya ang gumuhit sa librong “Sa Bukid ni Bebot” na Nagwagi ng 2nd Place sa kauna- unahang National Competition on Storybook Writing for Kinder- garten Category. Gaya ng ibang bata si Hugo ay palaging naiiwan ng Ina sa bahay upang magtrabaho. Ngunit palaging nagtataka si Hugo kung ano ba talaga ang trabaho ng kaniyang Ina. Alamin natin ito sa kuwentong Ang Bag ni Inang Kuwago.