Biktima na nga ng karahasan, Lugmok pa sa kahirapan,
Kamatayan pa ang kahahantungan. Ano bang silbi ng demokrasya? Nasaan na ba ang hustisya? makakamtan pa nga ba?Tunay nga bang patas ang batas sa Pilipinas? Tulad ng mga sinasabi ng mga manananggol o abogado sa ating bansa? Ang sabi nila, may piring si katarungan ngunit bakit maraming nakakulong sa municipal jail o city jail ang walang kasalanan. Inabot ng mahabang panahon bago sila makalabas sa mga piitan, ang iba namatay na at hindi man nakasuhan. Bakit ganoon ang hustisya sa ating bansa? Mahirap ba siya kaya hindi niya makamit ang hustisyang kanyang hinihiling? o mayaman siya kaya pera na lamang niya ang kapalit ng hustisyang lahat ay minimithi? Nakasilip nga ba ang tagahatol mula sa kanyang pagkapiring? Kaya't pagkamit sa hustisya ay sadyang kay hirap kunin.
Hustisya, kakambal ng salitang katarungan, ninanais ng mga
taong nawalan ng ari-arian, namatayan, nawalan ng dangal at karapatang pantao. Isang halimbawa nito ay ang mga kababaihang nawalan ng dangal dahil sa makamundong pagnanasa ng mga kalalakihang halang ang kaluluwa. Mga sigaw, paghihinagpis, at sakit ang namayani sa taong ginawan ng krimeng ito. Mga hinagpis at iyak ang unang maririnig sa taong pinagsasamantalahan. Isang malaking kawalan ang kanyang mararanasan kahit siya’y makatakas dito. Sa tulong ng batas ang mga mapagsamantala ay napaparusahan ngunit mas madami pa rin ang nakatatakas. Hindi lingid sa ating kaalaman ng ating bansa ay binubuo ng dalawang uri ng pamumuhay; ang mahirap at mayaman.
Sa panahon ngayon, may mga pulitiko na hindi pa man
nadadampian ng posas ang braso, pinalaya na. Dahil ba nagpiyansa ng kalahating milyon? Ngunit kapag ikaw ay mahirap maaaring ang kaso mo ay mapapawalang bisa dahil hindi mo kayang magbigay ng sapat na halaga. Sinasabi ng marami na ang pera'y kayang bilhin lahat ngunit naisip ba natin na kayang bilhin ng halaga ang buhay na pinahiram lamang sa atin?Na ang iba ang kukuha nito at hindi ang Diyos na lumikha? Minsan tayo ay napapaisip kung paano nila kayang baliktarin ang salaysay ng isang kaawa-awang biktima kapalit ng malaking halaga ng pera na kung iisipin ay malaking pagkakasala nila, ngunit hindi nila ito naisip dahil sa pagkasilaw nila sa pera. Ano man uri ng krimen ang ginawa ng isang tao dapat itong magbayad dahil saan man ito tignan sa natural na batas ay may karampatang parusa. Sa makabagong henerasyon ngayon marami na ang nagbago pero huwag sana mawala ang pagkakapantay-pantay natin dahil lahat tayo ay may karapatan na ipagtanggol ang ating katarungan at kalayaan. Dapat na tayong magising sa katotohanan, na hindi lahat ng bagay ay nabibili ng pera. May mga bagay na dapat gawing tama para magkaroon ng pantay na hustisya at katarungan sa isang bansa. Tratuhin ang bawat mamamayan bilang isang tao hindi kung ano ang pamumuhay nito. Ang hustisya ay mahalaga sa bawat tao dahil kapag walang hustisya ay hindi makakamit ang katarungan. Huwag matakot sapagkat mayroon tayong karapatan upang makamit ang tunay na katarungan.