MGA SALITANG

GAMIT SA
KOMUNIKAYONG
IMPORMAL
 Wika ang tumutulong sa tao sa kaniyang pakikipagtalastasan sa iba. Dahil nagbabago
ang lipunan, karaniwang nagbabago at nag-iiba-iba rin ang gamit ng wika sa isang partikular na
panahon. Ayon kay Pamela Constantino (2016), kilalang propesor sa wika at panitikan,
ginagamit ang wika batay sa kinakailangang makuhang impormasyon. Ayon pa kay
Constantino, inaayon ng isang indibidwal ang kaniyang wikang ginagamit sa
pakikipagtalastasan batay sa kausap o kaharap.

Ang pakikipagtalastasan ay maaaring nasa impormal o pormal na lunan (setting). Sa mga

impormal na pagkakataon o yaong pakikisalamuha sa mga pangkaraniwang lunan, gumagamit
ang isang indibidwal ng impormal na wika at paraan ng komunikasyon. Sinasabing ang
impormal na wika rin ang mas naiintindihan at ginagamit ng nakararami. Ito rin ang dahilan
kung bakit mas madalas itong gamitin sa mga pahayagang tabloid na mas tinatangkilik ng
pangkaraniwang mamamayan.
Pansinin ang ilang antas ng wika na ginagamit sa mga impormal na
pagkakataon:

1. Lalawiganin – Ito ang wikang ginagamit ng isang partikular na lugar at

nalalaman lamang ng pook na pinaggamitan nito. Sa Pilipinas, tinatayang may 150
wika mula sa marami nitong kapuluan. Dahil din sa dami ng wika sa bansa,
maraming pahayagan ang gumagamit ng kani-kanilang rehiyonal na wika.

Halimbawa:
• Ilocano - Agyamanak ngarud {Salamat}
• Bicolano - Saen ka nag-iistar? {Saan ka nakatira?}
• Bisaya – Iloy {Ina} Amay {Ama}
2. Kolokyal – Ito ang mga terminong ginagamit sa pang-araw-araw na tila may tono ng
kagaspangan ngunit tinatanggap na rin sa pakikipagtalastasan.
Halimbawa:
• utol – kapatid • saan ba? – san ba?
• aywan – ewan • mayroon – meron

3. Banyaga – Ito ang mga terminong mula sa wikang banyaga, lalo mula sa Ingles, na
tanggap gamitin sa araw-araw na impormal na komunikasyon. Karaniwan ang code-switching o
ang pagsasalita gamit ang dalawa o higit pang wika sa impormal na komunikasyon.

Halimbawa:
• Pa-identify naman, please.
• Finish na ba yung homework mo?
4. Balbal - Ito ang tawag sa mga wikang madalas gamitin sa mga lunan na hindi
akademiko gaya halimbawa sa labas ng paaralan, palengke, at iba pang katulad ng
mga ito. May mga pagkakataong ginagamit ang antas na ito sa mga tabloid. Ito rin
ang mga pangkaraniwang salitang pinapalitan ng katawagan sa mga impormal na
lunan; at maaari ring nabubuo ng isang partikular na grupo sa lipunan.
Halimbawa:
• Mga gay lingo tulad ng girlalu (katumbas ng salitang babae) at luz valdez
(katumbas para sa salitang talunan
• parak – pulis
• atab – bata
• ermat – nanay
• erpat – tatay