SA AKIN KA AT SAYO AKO
Tatanawin ko bawat pagtanggap at pag-alaga mo
Mahal makinig ka sa sasabihin ko
Uulitin ko bawat salitang lumabas sa bibig mo at
tuluyang naging pangako
Ipapaalala ko kung paano ka nangakong simula
nang araw na minahal mo ako hanggang ngayon,
sa akin ka at sayo ako.
Ipapaalala ko kung gaano kadaming plano na
ang nabuo kahit kung sakali mang magkahiwalay
tayo.
Ipapaalala ko bawat planong pagsakay sa
eroplano, pag ikot sa lahat ng lugar sa mundo pati
pagpapatayo ng ating sariling palasyo.
Ipapaalala ko kung paano natin pinaghahandaan
ang mga maaaring mangyari kung magkahiwalay
man.
Kung paanong bawat araw ay pinupuno natin ng
masasayang alaalang babaunin natin sa paglipas
ng panahon.
Mahal masaya ako masaya ako na ang mga
plano ay nananatiling buhay.
Masaya ako na lagi ka pa rin sa tabi kong
nagtatama sa mga kamalian ko.
Masaya ako na bawat ngiti, bawat tawa bawat
halakhak ang dahilan koy ikaw.
Na kahit sa paunti-unting pagbawas ng araw na
magkasama ay siya ring pagdami ng
pinagsamahang pang habang buhay na ibubulsa.
Mahal masayang masaya ako.
Sa patuloy mong pagtanggap sa pasmado kong
mga kamay upang punan ang mga espasyo sa
pagitan ng iyong mga daliri.
Sa pagsilong mo sa mga yakap ko kapag
nalulungkot ka o masaya.
Sa pagsama sa akin sa daan-daan na nating mga
litrato.
Maswerte pala talaga ako.
Maswerte ako sa pagsagot mo sa tawag ko kahit
bihira kang sumagot ng telepono.
Maswerte ako sa di maputol-putol na yakap sa
tuwing magpapaalam tayo.
Sa pagbuo ng sarili nating diksyunaryo.
Diksyunaryong binubuo ng mga salitang tanging
tayo lang ang nakakaintindit nakakaalam.
sa mga regalong ibinibigay ko.
Bawat pagtugon mo sa pagsabi ko ng mahal kita.
Sa pagsunod mo sa bawat utos at pag iwas sa mga
ayaw ko.
Mahal konting panahon na lang ang natitira.
Hindi ko maiwasang isipin at makaramdam ng tila
unti-unting pagsiklab ng apoy na nagdudulot ng
matinding hapdi.
Bagay na nagdudulot ng tila lubusang pagpiga sa
kaloob-looban.
Malapit nang mawala ang mga tawanan bago
umuwi.
Ang mga kalokohang sabay nating ginagawat
tinutunghayan.
Sa wakas ay makakalaya ka na sa pasmado kong
mga kamay.
Minsan mo na lang marinig ang malakas kong
paghalakhak at pagsigaw.
Sa tingin koy magiging karamay ko na lamang ang
unan
Mabubusog ang hangin sa letra ng iyong
pangalan
Ngunit mahal tandaan mo
Panghahawakan ko pa rin ang pangako mo na
kahit anong mangyari, tayo pa rin hanggang dulo.
Panghahawakan ko bawat salitang binibitawan
mo na tumatatak sa utak ko at puso.
Na mamahalin mo ako
Na kahit anong mangyari, ako parin ang pipiliin at
ipaglalaban mo
Mahal panghahawakan ko na minsan naging
mundo kita at naging mundo mo ako.
Hanggang sa makalimutan mo bawat pangakong
binitawan mo, mahal ikaw lang
Ikaw lang at ikaw pa rin
Mahal makinig ka sa sasabihin ko
Dahil uulit-ulitin ko bawat salitang lumabas sa bibig
mo at tuluyang naging pangako
Ipapaalala ko kung paano ka nangakong simula
nang araw na minahal mo ako hanggang ngayon,
sa akin ka at sayo ako.
Mahal na mahal kita.