Lorenzo Miguel R.

Molina
HUMSS 12B
Sintesis 1

Ang Pagiging Malikhain Ng Isang Sanaysay

“Write the story that only you can write”

Francisco Arcellana

Ang malikhaing sanaysay ay isang kategorya ng pagsusulat na gumagamit ng mga iba’t ibang
istilo ng pampanitikan at kasiningan upang magpahayag ng mga katotohanang salaysay. Ang salitang
“malikhain” ay tumatalakay sa kasanayan ng isang manunulat na magsulat ng mga kwentong totoo sa
malinaw, makabagbag-damdamin at madulang paraan. Ang layunin nito ay gumawa ng mga kwentong
nakabase sa katotohanan na nakakabighaning basahin tulad ng isang katha. Ito ay naglalahad ng mga
opinyon, kaisipan, reaksyon at saloobin ng isang manunulat. Tangi sa roon, ang kaibahan nito sa mga
ibang panitikan partikular na sa isang akademikong pagsusulat ay ang istilo nito. Sa pagsulat ng isang
akademikong papel, importante ang ang istruktura at ang mga patnubay nakapaloob nito. Sa kabilang
dako, ang pagsulat ng isang malikhaing sanaysay ay malaya at nakatuon ito sa istilo ng manunulat.

Sa katunayan, hindi pantay ang tingin ng mga manunulat sa mga sanaysay at sa mga drama
noon dahil na lamang ayon kay Hidalgo, “lahat ay nakakasulat ng sanaysay”. Gayunpaman, dahil sa
pagsasama ng mga sanaysay bilang mga lehitimo na kategorya sa mga gantimpala sa bansa,
pinag-aaralan na ito ng mga manunulat ngayon at dinagdag ito sa kursong ​creative writing ​sa mga
paaralan at unibersidad sa bansa. Sa katotohanan, ang pagsulat ng mga malikhaing sanaysay ay
mababalik noong panahon ng propaganda laban sa mga Espanyol kung saan sumusulat ang ating mga
kababayan sa La Solidaridad, isang dyaryong pampanitikan at lumago ito noong panahon ng mga
Amerikano. Sa panahong ito ay sumibol ang mga iba’t ibang literatura tulad ng mga repleksyon, sulat,
lakbay sanaysay at anekdota. Pagkatapos ng Pangalawang Digmaang Pandaigdig, umunlad ang mga
iba’t ibang katangian sa paggawa ng malikhaing sanaysay. Nag-umpisa rito ang pagsulat ng mga tao ukol
sa kanilang mga karanasan bago, habang at pagkatapos nilang maranasan ang digmaan. Nagkaroon ng
pagkakaiba sa pagitan ng paglalantad at pagsasalaysay. Humigpit sa produksyon ng mga sanaysay
noong panahon ng Martial Law at nagsara ang mga kompanyang naglilimbag ng mga papel. Pagkatapos
ang makasaysayang rebolusyon sa EDSA, nabigyan muli ng pagkakataon ang mga estudyante, mga
guro, mga manunulat at mga ordinaryong tao ng kalayaan magpahayag. At hanggang ngayon, binibigyan
na ng pansin ang malikhaing sanaysay. Sa katunayan, nalimbag na ang mga iba’t ibang malilikhaing
sanaysay ngayon na may mga paksa ukol sa kasarian, pananaw ng mga kababaihan at politika. Malaya
na at magkakaiba na ang mga istilo sa pagpapahayag ng mga malilikhaing sanaysay.

Sa pagsulat ng malikhaing sanaysay kailangan isaalang-alang ang sarili. Naniniwala ako na sa

darating na mga panahon, ang anyo ng malikhaing sanaysay ay magiging makulay at ​diverse​. Ito ay
magiging rebolusyonaryo at nakakatakot dahil na rin sa paglaganap ng teknolohiya sa ating mundo.
Aangat ang ating kamalayan sa mga ganap sa ating kapaligiran at lalo tayong mag-uusisa sa
katotohanan at katotohanan lamang. At higit pa rito, maalagaan natin ang ating mga kapwa at ang ating
sarili dahil na lamang sa mga bagong istorya na tapat at puno ng simbuyo ng damdamin.