Iba-iba ang pagpapakahulugan ng mga manunulat at dalubhasa sa panitikan. May mga nagsabing ang panitikan daw ay talaan ng buhay. Ayon kay Arrogante (1938), talaan ng buhay ang panitikan sapagkat dito naisisiwalat ng tao sa malikhaing paraan ang kulay ng kanyang buhay, ang buhay ng kanyang daigdig, ang daigdig ng kanyang kinabibilangan at pinapangarap. Ayon naman kay Salazar (1995), ang panitikan ay siyang lakas na nagpapakilos sa alinmang uri ng lipunan. Maaalalang nagsilbing titis sa mga Amerikanong may kulay ang pagkakabasa nila sa Uncle Tom’s Cabin ni Harriet Beecher Stowe upang kanilang ipakipaglaban ang kanilang pantay na karapatan sa mata ng batas at katarungan na humantong sa kanilang tagumpay sa Digmaang Sibil sa Amerika. Pinukaw naman ni Jean Jeacques Russeau sa kanyang Social Contract ang isipan ng mga Pranses. Sa pamamagitan ng akda ni Russeau, nabatid nilang sila’y biniyayaan din ng Diyos ng karapatan at katarungan at natutunan nilang iyo’y kanilang ipakipaglaban. Nang patuloy iyong ipagkait sa mga Pranses, ang pakikipaglaban nila sa katarungan at karapatan ay humantong sa isang himagsikan sa Pransya. Dito sa Pilipinas man ay makakatukoy ng napakaraming katibayan kung paano pinakilos ng panitikan ang lipunan. Nagsilbing inspirasyon ng mga Katipunero ang mga akda ni Rizal upang maglunsad ng isang himagsikan laban sa mga Kastila. Ang mga mapanghimagsik na dulang itinanghal noong panahon ng mga Amerikano ay ikinapiit ng mga may akda niyon at lalong nagpagalit sa maraming Pilipino. Sinikil ng datong Pangulong Marcos ang laya sa pamamahayag ngunit hindi niya napigilan ang paglaganap ng mga akdang naglalarawan. Sa pagmamalabis ng kanyang administrasyon. Iyon ang isa sa maraming dahilan ng pagwawakas ng kanyang pamumuno noong 1986 sa EDSA. Ayon naman kay Webster (1974), ang panitikan ay katipunan ng mga akdang nasusulat na makilala sa pamamagitan ng malikhaing pagpapahayag, aestetikong anyo, pandaigdigang kaisipan, at kawalang-maliw. Kung ang panitikan ay katipunan ng mga akdang nasusulat, maituturing bang panitikan ang mga tula, tugmaan, kasabihan, awit at iba pang nagpasalin-salin sa bibig ng tao lalo na noong panahong bago dumating ang mga Kastila sa ating kapuluan? Ang sagot ay oo, panitikan din ang mga iyon. Kailangang bigyang-diin na ang kahulugan ni Webster ay modernong pagpapakahulugan sa panitikan sa panahong ang tao ay marunong nang sumulat at sa panahong ang panitikang pasalin-dila ay naisalin na sa anyong pasulat. Kung tutuusin, maging ang palabuuan ng salitang panitikan ay nagbibigay-diin sa pasulat na katangian nito. Ang salitang panitikan ay nanggaling sa saling-ugat na titik, kung gayon, naisatitik o nasusulat. Ngunit lahat ba ng nasusulat ay maituturing na panitikan? Ang sagot naman sa tanong ay hindi. Kung babalikan natin ang kahulugang ibinigay ni Webster, matutukoy natin ang iba pang pangangailangan upang ang isang bagay na nasusulat ay maituturing na panitikan – malikhaing pagpapahayag, aestetikong anyo, pandaigdigang kaisipan at kawalang-maliw. Binanggit naman nina Atienza, Ramos, Salazar at Nazal sa kanilang aklat na pinamagatang "Panitikang Pilipino,” ipinapahayag na ang tunay na panitikan ay yaong walang kamatayan, yaong nagpapahayag ng damdamin ng tao bilang ganti niya sa reaksyon sa kaniyang pang-araw araw na pagsusumikap upang mabuhay at lumigaya sa kanyang kapaligiran at gayundin sa kanyang pagsusumikap na makita ang Maykapal.
Idinagdag ni Maria Ramos na ang panitikan ay kasaysayan ng kaluluwa ng
mga mamayan. Sa panitikan nasasalamin ang mga layunin, damdamin, panaginip ,pag- asa ,hinaing at guni-guni ng mga mamamayan na nasusulat o binabanggit sa maganda, makulay, makahulugan, matalinghaga at masining na mga pahayag. Sinabi naman ni Bro. Azarias na "ang panitikan ay ang pagpapahayag ng damdamin ng tao sa lipunan, sa pamahalaan, sa kapaligira, sa kapwa at sa dakilang lumikha. Ang pagpapahayag daw ng damdamin ng isang lumikha ay maaaring sa pamamagitan ng pag-ibig, kalungkutan, kaligayahan, galit o poot, pagkahabag, pag aalipusta, paghihiganti at iba pa. Ang panitikan ay hindi lamang lumilinang ng nasyonalismo kundi ito’y nag iingat din ng mga karanasan, tradisyon, at mga mithiin ng bawat bansa. Hinuhubog sa panitikan ang kagandahan ng kultura sa bawat lipunan. Dito nasusulat ang henyo ng bawat panahon. Ito;y walang paglipas hanggang may tao sa sandaigdigan. Ang panitikan ay isang ilaw na walang kamatayang tumatanglaw sa kabihasnan ng tao.
Sanggunian:
Palazo M.Z, D.C, et al. Panitikang Pilipino
Santiago E.M, A.H et al. Panitikang Filipino: Kasaysayan at Pag-unlad Pangkolehiyo
Villafuerte, Patriciano V. et al. Panitikang Panrehiyon sa Pilipinas