“PANDEMYA’Y SUGPUIN, KATUTUBONG WIKA ATING GAMITIN, MAKA-FILIPINONG

BAYANIHAN ATING GAWIN”

ni: Paula P. Zapata

Lito, lungkot, takot! Mababasa sa mga mata ng bawat Pilipino

At ng sangkatauhan saanmang sulok ng mundo.
Pagsubok doon! Pagsubok dito, hinaharap araw-araw ng sinumang tao.

Bawat isa, anumang lahi! Anumang kulay!

Anumang antas mo sa buhay! Anumang antas mo sa lipunan!
Bata man o matanda, mahirap o mayaman
Ay di makakaiwas sa mabigat na hamon
Ng pandemyang kinakaharap natin ngayon.

Matinding kahirapan! Kawalan ng trabaho!

Gutom ang hinarap sa pagtiklop ng mga negosyo,
Sa limang buwan nating pakikipaglaban
Hanggang sa kasalukuyan
Malinaw na solusyon ay di pa rin matugunan!

Sino ang dapat sisihin? May dapat bang sisihin?

Sa pagdurusang kinakaharap ng bawat isa sa atin
Ano ba ang dapat nating gawin?
Tumunganga?! Maghintay?! Magsisihan?!

Kailan pa natin isa-katotohanan ang tunay na bayanihan at pagkakaisa?

Sa puso, sa isip, at sa gawa
Kung sa simpleng alituntunin, ay di masunod at di magawa.

Hihintayin pa ba natin na tayo’y lubusang lamunin,

Lubusang sakupin ng pandemyang Covid-19?
Tamang disiplina, wastong pag-iingat at pag-aalaga sa sarili
Ang pinakamainam na dapat nating gawin
Upang ang virus na ito ay sabay sabay nating pupuksain.

Tama na! tama na! lahat tayo ay nagdurusa

Kung katigasan ng ulo’y ang siyang mangingibabaw
Mundong kinagisna’y, wala ng kabuluhan.

Tayo na! Tayo na’t magtulungan, huwag ng magsisihan

Pagkakaisa ang siyang ating kailangan
Wikang katutubo ang ating gamitin
Sa gayon maintindihan ng bawat isa sa atin
Maka-Filipinong bayanihan ang lubhang kailangan
Sa pamamagitan ng pagdadamayan ng bawat mamamayan.

Tara na ! Luzon, Visayas at Mindanao

himukin ang BAYANIHAN ng sambayanan
Sa pagsugpo ng pandemyang ating nararanasan
Magbahagi ng mga datos o pabatid-publiko
Na nasa mga katutubong wika at sa Filipino.
At lagging paka-iisipin na ang
“Disiplina sa sarili at Wikang katutubo ang kasangkapan
sa lahat ng pangngailangan ng lipunang Filipino”.