JUAN, Yoana Alexis F.
BS Architecture 3
Liham ni Panganay kay Inay sa Brunei
By Charina Margarita Fe D. Nola
Ang panahon ay banoy sa himpapawid
Tila may bagwis sa matuling pagdaan
Kahapon lamang kami ng aking mga kapatid
Ang mga bisig ni Itay ay itinuring palaruan
Ang Inay na diwatang may may mapagpalang ngiti
Haplos na banayad ng lubos na paggiliw
Ang bilang ng tao’y masayang binate
Nguni tang ligaya ay tuluyan nang nagmaliw
Ako ngayo’y labing walong taong gulang
Walo lamang nang si Inay ay lumisan
Di inantala ang unos noon pala’y nakaabang
Kabugkis ang kanyang mabuting kapalaran
Sa sandaling lumakbay ang Inay
Kumayod at tumayong parehong magulang
Ang malawak na karagatan ay binaybay
Ilang taong pagsisilbi ang kanyang binilang.
Si Itay ang tumayong ilaw ng tahanan
Ang pag-aaruga sa ami’y kanyang pinasan
Naglingkod sa aming bawat kailangan
Bago tuluyang nagbago ayon sa kagustuhan
Edna ang ngalan niya
Mayumi ang pagpunas sa pawisang noo ni Itay
Bawat araw siya’y aming nakikita
Bihira ang mga sandaling sila ay magkahiwalay.
Hanggang ang isang hapunan ay sumapit
Sa kanyang damdamin, umamin ang Itay
Nakatagpo ng pag-ibig kay Ednang kay lupit
Tila hamog kaming nagsipulas sa bukang liwayway
Nagsimula ang pagbabago sa aming buhay
Lumisan ang Amang itinuring naming bayani
Sumama ng tuluyan sa kanyang bagong maybahay
Habang kaming apat sa kapalaran naging api.
Si Lydiang matalino, matalinhaga
Sa edad na labing-anim, bihag ng tukso ng laman
Noo’y tinitingala ng mga kaklase niya
Nakalaang magsilang sa susunod na buwan
Ang paborito kong Nomer na ubod ng bibo
Kasama sa paglalaro ng basketbol datirati
Pulos pasa ang kanyang kamao
Lulong sa alak pag-uwi mula sa malalim na gabi
At ang aming bunsong si Emily
Labing-dalawang taong gulang, malasutla ang kutis
Mahaba ang buhok, mapupula ang labi
Di na muling nangusap dala ng matinding hinagpis
Ako, si Juliong panganay ni Inay sa Brunei
Ang nagpatuloy sa krus na iniwan kay Itay
Pagsusumamo sa mahal na Inay, magbalik na sa amin
Pawiin ang pangungulila ng mga naliligaw na anak
Ating pasanin ang bigat nang magkapiling
Ilayo sana kami sa tuluyang pahamak
Di na alintana ang maliit na kita sa aming bayan
Ang inyong pagbabalik lamang ang tanging paraan
Upang ang buhay ‘di tuluyang matulad
Sa batong nirupok ng alon ng mapanuksong dagat.
JUAN, Yoana Alexis F.
BS Architecture 3

LIHAM NG PAGBABAGO NI ITAY PARA KAY PINAY

By Arnalyn P. Bula

Nang ika’y lumisan nagpasyang mangibang-bayan

Malaking pagbabago aking naramdaman
Lubos na nagulila sa iyong pag-aaruga
Ni hindi ko nasuklian sa iyo ng tama.

Aking naalala, pag-gising sa umaga

Mga kailangan ko ay naihanda mo na
Ngunit sa isang iglap ang lahat ay nag-iba
Ang dating gawain mo ay ginagawa ko na.

Kung noon beerhouse ang puntahan gabi- gabi

Ngayon sa paglalaba’t paglilinis inaabot ng gabi
Dati ay massage parlor ang laging tambayan
Ngayon kapiling ng mga anak bahay tunay na pahingahan.

Ngayon alam ko na at lubusang napagtanto

Hindi pala madali ang maging katulad mo
Lahat ng pagpapasakit na idinulot ko sa iyo
Sa akin bumalik ang hirap na dulot nito.

Nagsisisi ako’t di ko man lang pinansin

Ang sakripisyo mo at pagmamahal sa akin
Mga kahinaan ko pinilit mong unawain
Kahit nasasaktan ang iyong puso’t damdamin.

Sana sa liham na ito ay aking maiparating

Ang pasasalamat ko na galing sa damdamin
Dahil sa paglisan mo natanaw at narating
Daan ng pagbabago na dapat kong tahakin

Dalangin ko sa Diyos ang iyong kaligtasan

Sa banyagang lugar na iyong kinalalagyan
Sa iyong pagbabalik ay maaasahan mo
Isang nagbagong mukha ang sasalubong sa iyo.