1

ሚካኤል ሊቀ መላእክት ሰአል በእንቲአነ፣

ወቅዱስ ገብርኤል አዕርግ ጸሎተነ።
፬ቱ እንስሳ መንፈሳውያን፣
ሰባሕያን ወመዘምራን፣
ሰአሉ በእንቲአነ፤
፳ወ፬ቱ ካህናተ ሰማይኒ አእርጉ ጸሎተነ።

2
ነቢያት ወሐዋርያት ፣ ጻድቃን ወሰማዕት፣
ሰአሉ በእንቲአነ፤
ምስሌክሙ ከመ ይክፍለነ፣
መክፈልተ ወርስተ ለኵልነ።

3
ማኅበረ ቅዱሳን ወሰማዕት ሰአሉ በእንቲአነ፣
መላእክተ ሰማይኒ አእርጉ ጸሎተነ።

ማርያም እግዝእትነ፣
ወላዲተ አምላክ ሰአሊ በእንቲአነ፤
እስመ ረከብኪ ሞገሰ በኀበ እግዚአብሔር።

ረከብኪ ሞገሰ መንፈሰ ቅዱሰ ወኃይለ ሰአሊ

አስተምሕሪ ለነ ማርያም ወልድኪ ሣህሎ ይክፍለነ።4
ኀበ ተርኅወ ገነት ወኀበ ተነፅፈ ዕረፍት ይክፍለነ
ነሀሉ ውስተ በዓቶሙ ለቅዱሳን። ፫ ጊዜ

⋘⋘ ጸሎት ⋙⋙

5
 መሪና ተመሪ ይበሉ
ስምዓኒ እግዚኦ ጸሎትየ ሃሌ ሉያ ሃሌ ሉያ
ወይብጻሕ ቅድሜከ ገዓርየ ሃሌ ሉያ ሃሌ ሉያ
ወኢትሚጥ ገጸከ እምኔየ።

አንሺ
ስምዓኒ እግዚኦ ጸሎትየ ሃሌ ሉያ ሃሌ ሉያ
ወይብጻሕ ቅድሜከ ገዓርየ ሃሌ ሉያ ሃሌ ሉያ
ወኢትሚጥ ገጸከ እምኔየ። 6
ተመሪ
በዕለተ ምንዳቤየ አፅምእ እዝነከ ኀቤየ
ሃሌ ሉያ ሃሌ ሉያ
አመ ዕለተ እጼውዓከ ፍጡነ ስምዓኒ ሃሌ ሉያ ሃሌ ሉያ
በኅብረት
ለዓለም ወለዓለም።
ሃሌ ሉያ ዘውእቱ ብሂል፣
ንወድሶ ለዘሀሎ እግዚአብሔር ልዑል፣
ስቡሕ ወውዱስ ዘሣረረ ኵሎ ዓለመ በአሐቲ ቃል። 7
ስምዓኒ እግዚኦ ጸሎትየ ሃሌ ሉያ ሃሌ ሉያ
ወይብጻሕ ቅድሜከ ገዓርየ ሃሌ ሉያ ሃሌ ሉያ
ወኢትሚጥ ገጸከ እምኔየ።
በዕለተ ምንዳቤየ አፅምእ እዝነከ ኀቤየ ሃሌ ሉያ ሃሌ ሉያ
አመ ዕለተ እጼውዓከ ፍጡነ ስምዓኒ ሃሌ ሉያ ሃሌ ሉያ
ለዓለም ወለዓለመ ዓለም።
ሁለተኛ ማንሻ ሃሌ ሉያ ዘውእቱ ብሂል፣
ንወድሶ ለዘሀሎ እግዚአብሔር ልዑል፣
የመጀመሪያ ማንሻ
ስቡሕ ወውዱስ ዘሣረረ ኵሎ ዓለመ በአሐቲ ቃል። 8
በኅብረት ዜማ
ዳዊት ነቢይ በከመ ጸለየ፣
እጼሊ ኀቤከ እግዚአብሔር አምላኪየ፣
እንዘ እብል ከመዝ ጸወንየ ወኰኲሕየ፣
ወታድኅነኒ ሊተ እምጸላእትየ፣
ወዓቃቤየ ትከውነኒ ወእትዌከል ብከ ምእመንየ፣
ወዘመነ ፍርቃንየ ረዳእየ ወምስካይየ ወሕይወትየ፣
ወታድኅነኒ እምእደ ገፋእየ፣
ሃሌ ሉያ በስብሐት እጼውዓከ ንጉሥየ ወአምላኪየ።
9
ሚካኤል መልአክ ሰአል ወጸሊ በእንቲአነ፣
ወበእንተ ነፍሰ ኵልነ ፤ መልአኪየ ይቤሎ፣
እመላእክት ሠምሮ መልአከ ኪዳኑ ለክርስቶስ።
ሰላም ለክሙ ማኅበረ መላእክት ትጉሃን
ሰላም ለክሙ ማኅበረ ነቢያት ቅዱሳን
ሰላም ለክሙ ማኅበረ ሐዋርያት ፍንዋን
ሰላም ለክሙ ማኅበረ ሰማዕት ወጻድቃን
ሰላም ለክሙ ማኅበረ ሥላሴ ጉቡአን
ወሰላም ለማርያም ዘእሳት ክዳን። 10
ማኅበረ መላእክት ወሰብእ ተአይነ ክርስቶስ ወእሙ፣
ሰላም ለክሙ ሶበ እከስት አፉየ ለውዳሴክሙ፣
ፍሬ ማኅሌት እምልሳንየ ትቅስሙ፣
ምስሌየ ሀልዉ ወምስሌየ ቁሙ።

11
ይበል ካህን
ሰላም ለአብ ወለወልድ ቃሉ፣
ወለመንፈስ ቅዱስ ሰላም ዘአካሎሙ አካሉ፣
ለማርያም ሰላም እንተ ተሳተፈት ስብሐተ እሉ፣
ሰላም ለመላእክት ወለማኅበረ በኵር ኵሉ፣
ጽሑፋነ መልክእ ወስም በሰማይ ዘላዕሉ።

12
ሰላም ለአብ ገባሬ ኵሉ ዓለም፣
ለወልድ ሰላም ፤ ወለመንፈስ ቅዱስ ሰላም፣
ለማርያም ሰላም ወለመላእክት ሰላም፣
ሰላም ለነቢያት ወለሐዋርያት ሰላም፣
ለሰማዕታት ሰላም ወለጻድቃን ሰላም።

13
ሰላም ለአብ ዘእምቅድመ ዓለም ነጋሢ፣
ለወልድ ሰላም ሥጋ ማርያም ለባሲ፣
ወለመንፈስ ቅዱስ ሰላም ኃጢአተ ዓለም ደምሳሲ።
ኃይልየ ሥላሴ ወጸወንየ ሥላሴ፣
በስመ ሥላሴ እቀጠቅጥ ከይሴ።

14
መልክአ ሥላሴ
ሰላም ለአጻብዒክሙ እለ እምአጽፋር ኢይትሌለዩ፤
ለቤትክሙ ሥላሴ ዘኢየኃልቅ ንዋዩ፤
አመ አብዐልክሙ ሰብአ ድኅረ አንደዮ ጌጋዩ፤
ዘኢርእዩ እምቅድመ ዮም መላእክተ ሰማይ ርእዩ፤
ወአግብርተ ሰብእ መላእክት ተሰምዩ።

15
ዚቅ
ርእይዎ ኖሎት አእኰትዎ መላእክት፤
ለዘተወልደ እማርያም እምቅድስት ድንግል፤
ዮም ሰማያዊ በጎል ሰከበ።

ወረብ
ርእይዎ ኖሎት ርእይዎ ኖሎት አእኰትዎ መላእክት፤
ዮም ሰማያዊ በጎል ሰከበ ለዘተወልደ እምቅድስት
ድንግል። 16
ሰላም ለክሙ ሚካኤል ወገብርኤል፣
ሱራፌል ወኪሩቤል፣
ዑራኤል ወሩፋኤል ፣ ሱርያል ወፋኑኤል፣
አፍኒን ወራጉኤል ወሳቁኤል፤
ወሰላም ለቅዳሴክሙ
ትጉኀነ ሰማይ ዝክሩነ በጸሎትክሙ።

17
ሰላም ለክሙ ሚካኤል ወገብርኤል፣
ሱራፌል ወኪሩቤል፣
ዑራኤል ወሩፋኤል ሱርያል ወፋኑኤል፣
አፍኒን ወራጉኤል ወሳቁኤል፤
ሊቃናተ ነድ ፣ ዘሰማያዊት ማኅፈድ፣
በእንተ በግዑ ዕቀብዋ ለዛቲ ዓፀድ።

18
ሰላም ለክሙ ሚካኤል ወገብርኤል፣
ሱራፌል ወኪሩቤል፣
ዑራኤል ወሩፋኤል ሱርያል ወፋኑኤል፣
አፍኒን ወራጉኤል ወሳቁኤል ወሰላም ለከናፍሪክሙ፣
ከመ ትዕቀቡነ ተማኅፀነ ለክርስቶስ በደሙ።

19
ሚካኤል ወገብርኤል ሱራፌል ወኪሩቤል
እለ ትሴብሕዎ
መላእክተ ሰማይ ሰአሉ ለነ አስተምሕሩ ለነ
ቅድመ መንበሩ ለእግዚእነ።

20
ሰላም ለከ ሊቀ መላእክት ሚካኤል፤
ወዲበ ሠናይትከ ዓዲ ለሰብእ ሣህል፤
አሐዱ እምእለ ይባርክዎ ለቃል፤
እዙዝ ዲበ ሕዝብ ከመ ትተንብል፤
በእንተ ሥጋሁ ነበልባል ርእሰነ ከልል።

21
ሰላም ለከ ንሥረ እሳት ዘራማ፣
ማኅሌታይ ሚካኤል መዓርዒረ ዜማ፣
ለረዲኦትከ ዲቤነ ሲማ፣
ለማኅበርነ ከዋላሃ ዕቀብ ወፍጽማ፤
እመራደ ነኪር አፅንዕ ኑኃ ወግድማ።

22
ሰላም ለሚካኤል ዘነድ ሡራኁ፣
ይትከሃን ወትረ በበምስዋዒሁ፣
እምቅዱሳን አሐዱ እምእለ ይተግሁ፣
ሐዋዝ በአርያም መኃልይሁ፤
ነጐድጓደ ስብሐት ግሩም ይደምፅ ጉህናሁ።

23
ሰላም ለልሳንከ መዝሙረ ቅዳሴ ዘነበልባል፣
ወለድምፀ ቃልከ ሐዋዝ ቀርነ መንግሥቱ ለቃል፣
ሞገሰ ክብሩ ሚካኤል ለተላፊኖስ ባዕል፣
አልቦ ዘይትማሰለከ በልማደ ምሕረት ወሣህል፣
እንበለ ባሕቲታ እህትከ ማርያም ድንግል።

24
ንዌጥን ዝክረ ውዳሴሆሙ ለነቢያት ወሐዋርያት፣
ለጻድቃን ወሰማዕት፣
ለአእላፍ መላእክት ዘራማ ኃይላት፣
ለምልዕተ ፀጋ ማርያም ቡርክት፣
ወለሥግው ወልዳ ነባቢ እሳት።

25
ንዌጥን ዝክረ ወድሶታ ለመንፈሳዊት ርግብ፣
ዘመና ልሁብ፣
እምከናፍሪሃ ይውኅዝ ሐሊብ፣
ተፀውረ በማኅፀና እሳት ዘኮሬብ፣
ወያውዓያ ነድ ወላህብ።

26
ማኅፀንኪ እግዝእትየ ማርያም ይከብር ምስብዒተ፣
እምጽርሐ አርያም ዘላዕሉ ወእምኪሩቤል ትርብዕተ፣
፱ተ አውራኃ ወሐምስተ ዕለተ፣
ፆረ ዘኢይፀወር መለኮተ፣
አግመረ ዘኢይትገመር እሳተ።

27
*ላይ ቤት በተቆመ ጊዜ የሚባል*
ይትባረክ ስምኪ ማርያም ዘአውጻእክነ እምጸድፍ፣
በርኅራኄኪ ትሩፍ፣
ይሴብሑኪ ኪሩቤል በዘኢያረምም አፍ፣
ሐራ ሰማይ ትጉሃን እኁዛነ ሰይፍ፣
አምሳለ ደመና ይኬልሉኪ በክንፍ።

 ቀጥለህ “ለዝክረ ስምኪ ዘመንክር ጣዕሙን” በል።

ገጽ 30 ላይ ይገኛል። 28
ምንተ አአስዮ ለእግዚአብሔር አሐተ፣
በእንተ ኵሉ ዘገብረ ሊተ፣
ርስዪኒ እሙ አሥምሮ ግብተ፣
ማርያም እግዝእትየ ዘሜጥኪ እሳተ፣
ድኅረ በጽሐ ልሣኑ ዘለኪ ቤተ።

29
ሰላም ለአፉኪ አፈ በረከት ትሩፍ፣
ወአንቀፀ ቅዱስ መጽሐፍ፣
አማኅፀንኩ ነፍስየ ለኪዳንኪ ውኩፍ፣
ኢይትሀፈር ቅድመ ወልድኪ ወመላእክቲሁ አእላፍ፣
አመ ሥርወ ልሳን ይትገዘም ወይትሀተም አፍ።

30
ሰላም ለዝክረ ስምኪ ዘመንክር ጣዕሙ፣
ለወልድኪ አምሳለ ደሙ፣
መሠረተ ሕይወት ማርያም ወጥንተ መድኃኒት
ዘእምቀዲሙ፣
ኪያኪ ሠናይተ ዘፈጠረ ለቤዛ ዓለሙ፣
እግዚአብሔር ይትባረክ ወይተአኰት ስሙ።

31
ዚቅ
መሠረታቲሃ ውስተ አድባር ቅዱሳን ወብእሲ
ተወልደ በውስቴታ።

ወረብ
መሠረታቲሃ መሠረታቲሃ መሠረታቲሃ ውስተ
አድባር፤
ወብእሲ ተወልደ በውስቴታ ወብእሲ ተወልደ
በውስቴታ ተወልደ። 32
ነግሥ
ሰላም ለልደትከ ኦ አማኑኤል፤
ዘቀዳሚ ወዘደኃሪ ብሉየ መዋዕል፡
ኢየሱስ ክርስቶስ ዘአብ ቃል፤
እፎ እፎ አግመረተከ ድንግል፤
ወእፎ እንዘ አምላክ ሰከብከ በጎል።

33
ዚቅ
በጎል ሰከበ በአጽርቅት ተጠብለለ፤
ውስተ ማኅጸነ ድንግል ኀደረ ፤
እፎ ተሴሰየ ሐሊበ ከመ ሕፃናት።

ወረብ
በጎል ሰከበ በአጽርቅት ተጠብለለ ፤ ኀደረ ማኅጸነ
ድንግል ፤
እፎ ተሴሰየ ተሴሰየ ሐሊበ ከመ ሕፃናት ተሴሰየ።
34
የመልክአ ኢየሱስ መግቢያ
ኢየሱስ ኢየሱስ ኢየሱስ ክርስቶስ ወልደ
እግዚአብሔር ዘሠረጽከ እምቤተ ሌዊ ኮሬባዊ
መለኮታዊ ቃል ሰማያዊ እምድንግል ተወልደ።

35
መልክአ ኢየሱስ
ሰላም ለዝክረ ስምከ ስመ መሐላ ዘኢይሔሱ፣
ዘአንበረ ቅድመ እግዚአብሔር በአትሮንሱ፣
ኢየሱስ ክርስቶስ ለዳዊት ባሕርየ ከርሡ፣
አክሊለ ስምከ እንዘ ይትቄጸል በርዕሱ፣
አህጉረ ፀር ወረሰ ኢያሱ።

36
ዚቅ
ሃሌ ሉያ ሃሌ ሉያ ንሰብክ ወልደ እምዘርዓ ዳዊት
ዘመጽአ ፤ ወተወልደ በሥጋ ሰብእ ፤ እንዘ
ኢየዓርቅ እመንበረ ስብሐቲሁ ፤ ውስተ ማኅጸነ
ድንግል ኀደረ ፤ ሥጋ ኮነ ወተወልደ ፤ ትጉሃን
የአምኑ ልደቶ ወሱራፌል ይቀውሙ ዓውዶ ፤
መጽአ ይቤዝወነ ውስተ ዓለም የሀበነ ሰላመ ፤ ጋዳ
ያበውዑ ቊርባነ።
37
ወረብ
ሃሌ ሉያ ሃሌ ሉያ ንሰብክ ወልደ እምዘርዓ ዳዊት፤
ወተወልደ በሥጋ ሰብእ።

ዓዲ
ውስተ ማኅጸነ ድንግል ኀደረ ውስተ ማኅጸነ ድንግል
ኀደረ ሥጋ ኮነ ፤
ወተወልደ በሥጋ ሰብእ ሥጋ ሰብእ በሥጋ ሰብእ።
38
መልክአ ኢየሱስ
ሰላም ለአጽፋረ እዴከ ዘኅበሪሆን ጸዐዳ፤
በምግባር ወግእዝ እለ ይትዋሐዳ፤
ኢየሱስ ክርስቶስ ምስፍና አባሉ ለይሁዳ።
ለመንግሥትከ ሰፋኒት እንዘ ይትመሐለሉ ዐውዳ፤
ሰብአ ሰገል አወፈዩ ጋዳ።

39
ዚቅ
አንፈርዓጹ ሰብአ ሰገል አምኃሆሙ አምጽኡ
መድምመ ረኪቦሙ ሕፃነ ዘተወልደ ለነ።

አመላለስ
አንፈርዓጹ ሰብአ ሰገል አንፈርዓጹ ሰብአ ሰገል ፤
አምኃሆሙ አምጽኡ መድምመ።

40
እምኵሉ ይኄይስ በሥላሴከ ተአምኖ፣
ወበወላዲትከ ተማኅጽኖ፣
ኢየሱስ ክርስቶስ እምቤተ መንግሥት ወተክህኖ፣
ተሰብኦተከ እምቦ ዘያስተሐቅር መኒኖ፣
ያንኰርኵር ታሕተ ደይን ግዱፈ ከዊኖ።

41
ዚቅ
ወካዕበ ተምኅጸነ በማርያም እምከ ፣ እንተ ይእቲ
እግዝእትነ ወትምክህተ ዘመድነ በወሊዶተ ዚአከ።

ወረብ
ትምክህተ ዘመድነ ትምክህተ ዘመድነ በወሊዶተ
ዚአከ፤
ይእቲ እግዝእትነ እግዝእትነ ማርያም ድንግል። 42
ማኅሌተ ጽጌ
ኦ ዝ መንክር በዘዚአኪ አምሳል፣
ኮከበ ትንቢት ዘቦቱ መልክአ ሕፃን ሥዑል፣
ሠረቀ ያርኢ ተአምርኪ ድንግል፣
ወመርሖሙ ለሰብአ ሰገል እምርኁቅ ደወል፣
ጽጌኪ ኀበ ሀሎ ይሰክብ በጎል።

43
ዚቅ
ወኖሎት በቤተልሔም አንከሩ እምዘርእዩሰ ወሰምዑ
፤ ሰብአ ሰገል ርእዮሙ ኮከበ መጽኡ እምርኁቅ
ብሔር ከመ ይስግዱ ለወልድኪ ወይገንዩ ለኪ።

44
ምስባክ
ነገሥተ ተርሴስ ወደሰያት አምኃ ያበውኡ።
ነገሥተ ሳባ ወዐረብ ጋዳ ያመጽኡ፡
ወይሰግዱ ሎቱ ኵሎሙ ነገሥተ ምድር።

45
የዕለቱ ቅዱስ ወንጌል

46
እስመ ለዓለም በቅኝት
ተወልደ ኢየሱስ በቤተ ልሔም ዘይሁዳ፤
አዋልደ ጢሮስ አሜሃ ይሰግዳ፤
ሰብአ ሰገል አምጽኡ ሎቱ ጋዳ፤
ወይትሐሠያ አዋልደ ይሁዳ።

47
ምልጣን
ሃሌ ሉያ ዮም ፍሥሐ ኮነ በእንተ ልደቱ ለክርስቶስ፤
እም ቅድስት ድንግል ውእቱ ኢየሱስ ክርስቶስ ፤
ዘሎቱ ሰብአ ሰገል ሰገዱ ሎቱ ፤ አማን መንክር
ስብሐተ ልደቱ።

48
አመላለስ
አማን በአማን አማን በአማን መንክር፤
መንክር ስብሐተ ልደቱ መንክር ስብሐተ ልደቱ።

ወረብ
ዮም ፍሥሐ ኮነ በእንተ ልደቱ ለክርስቶስ፤
እምቅድስት ድንግል ድንግል ውእቱ
ኢየሱስ ክርስቶስ። 49
ተወልደ ኢየሱስ በቤተ ልሔም ዘይሁዳ፤
አዋልደ ጢሮስ አሜሃ ይሰግዳ፤
ሰብአ ሰገል አምጽኡ ሎቱ ጋዳ፤
ወይትሐሠያ አዋልደ ይሁዳ።
ወረብ
ተወልደ ኢየሱስ በቤተ ልሔም በቤተ ልሔም
ዘይሁዳ በቤተ ልሔም፤
አዋልደ ጢሮስ አሜሃ ይሰግዳ አሜሃ ይሰግዳ
በቤተ ልሔም። 50
ዕዝል
ሃሌ ሉያ በጎል ሰከበ በአጽርቅት ተጠብለለ፤
ውስተ ማኅጸነ ድንግል ኃደረ፤
ዮም ተወልደ እግዚእ ወመድኅነ ቤዛ ኵሉ ዓለም

ምልጣን
በጎል ሰከበ በአጽርቅት ተጠብለለ እግዚእ
ወመድኅን ቤዛ ኵሉ ዓለም ዮም ተወልደ ቤዛ
ኵሉ ዓለም ዮም ተወልደ። 51
ሰላም
ተሣኃልከ እግዚኦ ምድረከ ሃሌ ሉያ ሃሌ ሉያ
ንሰብክ ወልደ እምዘርዐ ዳዊት ዘመጽአ ወተወልደ
በሥጋ ሰብእ እንዘ ኢየአርቅ እመንበረ ስብሐቲሁ፤
ውስተ ማኅጸነ ድንግል ኃደረ ሥጋ ኮነ ወተወልደ።
ትጉሃን የአደምኑ ልቶ ወሱራፌል ይቀውሙ ዓውዶ፤
መጽአ ይቤዝወነ ውስተ ዓለም የሀበነ ሰላመ ጋዳ
ያበውዑ ቍርባነ መጽአ ከመ ይቤዙ ዓለም፤
የሀበነ ሰላመ ጋዳ ያበውዑ ቍርባነ። 52
ኪዳን

53
ዝማሬ
በፈቃደ አቡሁ ወረደ እምሰማይ ዲበ ምድር፤
ወተወልደ በተድላ መለኮት እማርያም እምቅድስት
ድንግል፤ በእንተ ልደቱ ለክርስቶስ አድባር ኮኑ
ኅብስተ ሕይወት፤ ወዕፀወ ገዳምኒ ፈረዩ አስካለ
በረከት ፤ ወማይ ባሕርኒ ኮነት ሐሊበ ወመዓረ ፤
ወመላእክትኒ ታጋቢኦሙ ሰፍሑ ክነፊሆሙ ወጸለሉ
ኀብ ማርያም ወበህየ ገብሩ በዓለ።
54
ይህ የአምላካችን የጌታችንና የመድኃኒታችን የኢየሱስ ክርቶስ ልደት ክብረ በዓል ሥርዓተ ማኅሌት ተንሸራታች ትዕይንት (Slide Show)
በኮለምበስ ኦሐዮ ደብረ ገነት ቅዱስ ሚካኤል ቤተ ክርስቲያን ካህን በሊቀ ኅሩያን
ቀሲስ ሀብቴ ኩሩ ገብረአብና በአቶ ኃይሉ ደስታ በቀለ ተዘጋጀ።
ታኅሣሥ ፳፯ ቀን ፳፻፲፪ዓ.ም
January 6, 2020
Columbus, Ohio USA

የጌታችን የአምላካችንና የመድኃኒታችን የኢየሱስ ክርስቶስ ሰላም ፣ ቸርነትና ይቅርታ አይለየን።

አነሣሥቶ ላስጀመረን አስጀምሮ ላስፈጸመንክብርና ምስጋና ለአምላካችን ይሁን።
ለዘለዓለሙ አሜን።

55