ዋዜማ

መርኆሙ መዓልተ በደመና ፤ ወኵሎ ሌሊተ

በብርሃነ እሳት ወአውጾሙ ለሕዝቡ በትፍሥሕት ፣
ፈነው መልአኮ ወአድኃኖሙ እንዘ ሚካኤል የሐውር
ቅድመ ትዕይንቶሙ ለእሥራኤል።

1
በ፭ ለእግዚአብሔር ምድር በምልአ
በእደ መልአኩ ይዕቅበነ፤
ወይክስት አዕይንተ አልባቢነ፤
በእደ መልአኩ ይዕቅበነ።

እግዚአብሔር ነግሠ
ሚካኤል መልአክ ሰአል ወጸሊ በእንቲአነ፤
ወበእንተ ነፍሰ ኵልነ፤ መልአኪየ ይቤሎ እመላእክት
ሠምሮ መልአክ ኪዳኑ ለክርስቶስ። 2
ይትባረክ
ነዋ ሚካኤል መልአክክሙ ይስአል ለክሙ
ኀበ እግዚአብሔር ዘልዑለ ይሠርር ለመድኃኒተ ኵሉ
ዓለም በክልኤ ክንፍ።

3
ሰላም
ሃሌ ሉያ ሃሌ ሉያ ዳንኤልኒ ይቤ ነዋ ሚካኤል ፩ዱ
እመላእክት ፤ እምቅዱሳን ቀደምት ፤ መጽአ
ይርድአኒ ፤ አጽንአኒ ወይቤለኒ ኢትፍራሕ ብእሴ
ፍትወት አንተ ሰላም ለከ ፤ ጽናዕ ወተአገሥ ፤
ወእንዘ ይትናገረኒ ጸናዕኩ ፤ ወእብሎ ንግረኒ እስመ
አጽናዕከኒ ወይቤለኒ ፤ ሶበ ተአምር ዳዕሙ ሚካኤል
መልአክክሙ።
4
ማኅሌት

5
ሚካኤል ሊቀ መላእክት ሰአል በእንቲአነ፣
ወቅዱስ ገብርኤል አዕርግ ጸሎተነ።

፬ቱ እንስሳ መንፈሳውያን፣
ሰባሕያን ወመዘምራን፣
ሰአሉ በእንቲአነ፣
፳ወ፬ቱ ካህናተ ሰማይኒ አእርጉ ጸሎተነ።
6
ነቢያት ወሐዋርያት ፣ ጻድቃን ወሰማዕት፣
ሰአሉ በእንቲአነ፤
ምስሌክሙ ከመ ይክፍለነ፣
መክፈልተ ወርስተ ለኵልነ።

7
ማህበረ ቅዱሳን ወሰማዕት ሰአሉ በእንቲአነ፣
መላእክተ ሰማይኒ አእርጉ ጸሎተነ።

ማርያም እግዝእትነ፣
ወላዲተ አምላክ ሰአሊ በእንቲአነ፤
እስመ ረከብኪ ሞገሰ በኀበ እግዚአብሔር።

ረከብኪ ሞገሰ መንፈሰ ቅዱሰ ወኃይለ ሰአሊ አስተምሕሪ ለነ

ማርያም ወልድኪ ሣህሎ ይክፍለነ። 8
ኀበ ተርኅወ ገነት ወኀበ ተነፅፈ ዕረፍት ይክፍለነ
ነሀሉ ውስተ በዓቶሙ ለቅዱሳን። ፫ ጊዜ

⋘⋘ ጸሎት ⋙⋙

9
 መሪና ተመሪ ይበሉ
ስምዓኒ እግዚኦ ጸሎትየ ሃሌ ሉያ ሃሌ ሉያ
ወይብጻሕ ቅድሜከ ገዓርየ ሃሌ ሉያ ሃሌ ሉያ
ወኢትሚጥ ገጸከ እምኔየ።

አንሺ
ስምዓኒ እግዚኦ ጸሎትየ ሃሌ ሉያ ሃሌ ሉያ
ወይብጻሕ ቅድሜከ ገዓርየ ሃሌ ሉያ ሃሌ ሉያ
ወኢትሚጥ ገጸከ እምኔየ። 10
ተመሪ
በዕለተ ምንዳቤየ አፅምእ እዝነከ ኀቤየ
ሃሌ ሉያ ሃሌ ሉያ
አመ ዕለተ እጼውዓከ ፍጡነ ስምዓኒ ሃሌ ሉያ ሃሌ ሉያ
በኅብረት
ለዓለም ወለዓለም።
ሃሌ ሉያ ዘውእቱ ብሂል፣
ንወድሶ ለዘሀሎ እግዚአብሔር ልዑል፣
ስቡሕ ወውዱስ ዘሣረረ ኵሎ ዓለመ በአሐቲ ቃል። 11
ስምዓኒ እግዚኦ ጸሎትየ ሃሌ ሉያ ሃሌ ሉያ
ወይብጻሕ ቅድሜከ ገዓርየ ሃሌ ሉያ ሃሌ ሉያ
ወኢትሚጥ ገጸከ እምኔየ።
በዕለተ ምንዳቤየ አፅምእ እዝነከ ኀቤየ ሃሌ ሉያ ሃሌ ሉያ
አመ ዕለተ እጼውዓከ ፍጡነ ስምዓኒ ሃሌ ሉያ ሃሌ ሉያ
ለዓለም ወለዓለም።
ሁለተኛ ማንሻ ሃሌ ሉያ ዘውእቱ ብሂል
ንወድሶ ለዘሀሎ እግዚአብሔር ልዑል
የመጀመሪያ ማንሻ
ስቡሕ ወውዱስ ዘሣረረ ኵሎ ዓለመ በአሐቲ ቃል። 12
በኅብረት ዜማ
ዳዊት ነቢይ በከመ ጸለየ፣
እጼሊ ኀቤከ እግዚአብሔር አምላኪየ፣
እንዘ እብል ከመዝ ጸወንየ ወኰኲሕየ፣
ወታድኅነኒ ሊተ እምጸላእትየ፣
ወዓቃቤየ ትከውነኒ ወእትዌከል ብከ ምእመንየ፣
ወዘመነ ፍርቃንየ ረዳእየ ወምስካይየ ወሕይወትየ፣
ወታድኅነኒ እምእደ ገፋእየ፣
ሃሌ ሉያ በስብሐት እጼውዓከ ንጉሥየ ወአምላኪየ።
13
ሚካኤል መልአክ ሰአል ወጸሊ በእንቲአነ፣ ወበእንተ ነፍሰ
ኵልነ ፤ መልአኪየ ይቤሎ፣ እመላእክት ሠምሮ መልአከ
ኪዳኑ ለክርስቶስ።
ሰላም ለክሙ ማኅበረ መላእክት ትጉሃን
ሰላም ለክሙ ማኅበረ ነቢያት ቅዱሳን
ሰላም ለክሙ ማኅበረ ሐዋርያት ፍንዋን
ሰላም ለክሙ ማኅበረ ሰማዕት ወጻድቃን
ሰላም ለክሙ ማኅበረ ሥላሴ ጉቡአን
ወሰላም ለማርያም ዘእሳት ክዳን።
ማኅበረ መላእክት ወሰብእ ተአይነ ክርስቶስ ወእሙ፣
ሰላም ለክሙ ሶበ እከስት አፉየ ለውዳሴክሙ፣
ፍሬ ማኅሌት እምልሳንየ ትቅስሙ፣
ምስሌየ ሀልዉ ወምስሌየ ቁሙ።

16
ይበል ካህን
ሰላም ለአብ ወለወልድ ቃሉ፣
ወለመንፈስ ቅዱስ ሰላም ዘአካሎሙ አካሉ፣
ለማርያም ሰላም እንተ ተሳተፈት ስብሐተ እሉ፣
ሰላም ለመላእክት ወለማኅበረ በኵር ኵሉ፣
ጽሑፋነ መልክእ ወስም በሰማይ ዘላዕሉ።

17
ሰላም ለአብ ገባሬ ኵሉ ዓለም፣
ለወልድ ሰላም ፤ ወለመንፈስ ቅዱስ ሰላም፣
ለማርያም ሰላም ወለመላእክት ሰላም፣
ሰላም ለነቢያት ወለሐዋርያት ሰላም፣
ለሰማዕታት ሰላም ወለጻድቃን ሰላም።
ሰላም ለአብ ዘእምቅድመ ዓለም ነጋሢ፣
ለወልድ ሰላም ሥጋ ማርያም ለባሲ፣
ወለመንፈስ ቅዱስ ሰላም ኃጢአተ ዓለም ደምሳሲ።
ኃይልየ ሥላሴ ወጸወንየ ሥላሴ፣
በስመ ሥላሴ እቀጠቅጥ ከይሴ።
ነግሥ
ሰላም ለጕርዔክሙ ስቴ አንብዐ ሰብእ ዘኃሠሠ፣
ብዑላነ ሞገስ ሥላሴ ኢታንድዩኒ ሞገሰ፣
እመ ትትኀየዩኒሰ ኢትኅድጉኒ ፅኑሰ፣
ሚካኤልኑ ለአውጽኦ ሥጋየ ጌሠ፣
ወእመ አኮ ገብርኤል ወሀበኒ ነፍሰ።

20
ዚቅ
አመ ይፈጥራ እግዚአብሔር ለምድር ፤ ኢዜነዎ ለሰማይ
ወኢተማከረ ምስለ መላእክቲሁ ወተከለ ፫ተ
ዕፀ ሕይወት ፣ በዲበ ምድር።

21
ሰላም ለክሙ ሚካኤል ወገብርኤል፣
ሱራፌል ወኪሩቤል፣
ዑራኤል ወሩፋኤል፣
ሱርያል ወፋኑኤል፣
አፍኒን ወራጉኤል ወሳቁኤል ወሰላም ለቅዳሴክሙ
ትጉኀነ ሰማይ ዝክሩነ በጸሎትክሙ።

22
ሰላም ለክሙ ሚካኤል ወገብርኤል፣
ሱራፌል ወኪሩቤል፣
ዑራኤል ወሩፋኤል ሱርያል ወፋኑኤል፣
አፍኒን ወራጉኤል ወሳቁኤል ሊቃናተ ነድ፣
ውስተ ሰማያዊት ማኅፈድ፣
በእንተ በግዑ ዕቀብዋ ለዛቲ ዓፀድ።

23
ሰላም ለክሙ ሚካኤል ወገብርኤል፣
ሱራፌል ወኪሩቤል፣
ዑራኤል ወሩፋኤል ሱርያል ወፋኑኤል፣
አፍኒን ወራጉኤል ወሳቁኤል ወሰላም ለከናፍሪክሙ፣
ከመ ትዕቀቡነ ተማኅፀነ ለክርስቶስ በደሙ።

24
ሚካኤል ወገብርኤል ሱራፌል ወኪሩቤል
እለ ትሴብሕዎ
መላእክተ ሰማይ ሰአሉ ለነ አስተምሕሩ ለነ
ቅድመ መንበሩ ለእግዚእነ።

25
ሰላም ለከ ሊቀ መላእክት ሚካኤል፤
ወዲበ ሠናይትከ ዓዲ ለሰብእ ሣህል፤
አሐዱ እምእለ ይባርክዎ ለቃል፤
እዙዝ ዲበ ሕዝብ ከመ ትተንብል፤
በእንተ ሥጋሁ ነበልባል ርእሰነ ከልል።

26
ሰላም ለከ ንሥረ እሳት ዘራማ፣
ማኅሌታይ ሚካኤል መዓርዒረ ዜማ፣
ለረዲኦትከ ዲቤነ ሲማ፣
ለማኅበርነ ከዋላሃ ዕቀብ ወፍጽማ፤
እመራደ ነኪር አፅንዕ ኑኃ ወግድማ።

27
ሰላም ለሚካኤል ዘነድ ሡራኁ፣
ይትከሃን ወትረ በበምስዋዒሁ፣
እምቅዱሳን አሐዱ እምእለ ይተግሁ፣
ሐዋዝ በአርያም መኃልይሁ፤
ነጐድጓደ ስብሐት ግሩም ይደምፅ ጉህናሁ።

28
ሰላም ለልሳንከ መዝሙረ ቅዳሴ ዘነበልባል፣
ወለድምፀ ቅልከ ሐዋዝ ቀርነ መንግሥቱ ለቃል፣
ሞገሰ ክብሩ ሚካኤል ለተላፊኖስ ባዕል፣
አልቦ ዘይትማሰለከ በልማደ ምሕረት ወሣህል፣
እንበለ ባሕቲታ እህትከ ማርያም ድንግል።

29
ነግሥ
ጐሥዐ ልብየ ጥበበ ወልቡና፣
ለውዳሴከ ጥዑመ ዜና፣
ቅዱስ ሚካኤል ልማድከ ግብረ ትኅትና፣
አንተኑ ዘመራሕኮሙ ፍና፣
ወአንተኑ ለእሥራኤል ዘአውረድከ መና።

30
ዚቅ
አዝነመ ሎሙ መና ይብልዑ ፀዓዳ ከመ በረድ ፤
ወርእየቱ ከመ ተቅዳ ኅብስተ እምሰማይ ወሀቦሙ አውኃዘ ሎሙ
ማየ ሕይወት ፤ ዘትረ ኰኲሕ ፈልፈለ
ነቅዕ ዘኢይነጽፍ ኅብስተ እምሰማይ ወሀቦሙ።

31
ንዌጥን ዝክረ ውዳሴሆሙ ለነቢያት ወሐዋርያት፣
ለጻድቃን ወሰማዕት፣
ለአእላፍ መላእክት ዘራማ ኃይላት፣
ለምልእተ ፀጋ ማርያም ቡርክት፣
ወለሥግው ወልዳ ነባቢ እሳት።

32
ንዌጥን ዝክረ ወድሶታ ለመንፈሳዊት ርግብ፣
ዘመና ልሁብ፣
እምከናፍሪሃ ይውኅዝ ሐሊብ፣
ተፀውረ በማኅፀና እሳት ዘኮሬብ፣
ወያውዓያ ነድ ወላህብ።

33
ማኅፀንኪ እግዝእትየ ማርያም ይከብር ምስብዒተ፣
እምጽርሐ አርያም ዘላዕሉ ወእምኪሩቤል ትርብዕተ፣
፱ተ አውራኃ ወሐምስተ ዕለተ፣
ፆረ ዘይትፀወር መለኮተ፣
አግመረ ዘይትገመር እሳተ።

34
በላይ ቤት
ይትባረክ ስምኪ ማርያም ዘአውጻዕክነ እምጸድፍ፣
በርኅራኄኪ ትሩፍ፣
ይዌድሱኪ ኪሩቤል በዘኢያረምም አፍ፣
ሐራ ሰማይ ትጉኃን እኁዛነ ሰይፍ፣
ኵላቌሆሙ አእላፍ፣
አምሳለ ደመና ይኬልሉኪ በክንፍ።

ቀጥለህ “ለዝክረ ስምኪ ዘመንክር ጣዕሙን” በል 35

በታች ቤት ሲቆም
ምንተ አአስዮ ለእግዚአብሔር አሐተ፣
በእንተ ኵሉ ዘገብረ ሊተ፣
ረስዪኒ እሙ አሥምሮ ግብተ፣
ማርያም እግዝእትየ ዘሜጥኪ እሳተ፣
ድኅረ በጽሐ ልሳኑ ዘለኪ ቤተ።

36
ሰላም ለዝክረ ስምኪ ዘመንክር ጣዕሙ፣
ለወልድኪ አምሳለ ደሙ፣
መሠረተ ሕይወት ማርያም ወጥንተ መድኃኒት ዘእምቀዲሙ፣
ኪያኪ ሠናይተ ዘፈጠረ ለቤዛ ዓለሙ፣
እግዚአብሔር ይትባረክ ወይትአኰት ስሙ።

37
ዚቅ
ንዒ ርግብየ ወንዒ ሠናይትየ ፤ ቃልኪ አዳም። ይጥዕመኒ
እምአስካለ ወይን ፤ አርአዮ ለሙሴ ግብራ ለደብተራ ወተናግሮ
በአምደ ደመና። እሞሙ ይእቲ ለሰማዕት ወእኅቶሙ
ለመላእክት፤
አርአዮ ለሙሴ ግብራ ለደብተራ ወተናግሮ በአምደ ደመና ።

38
፩ ሰላም ለዝክረ ስምከ (መልክአ ሚካኤል)
ሰላም ለዝክረ ስምከ ምስለ ስመ ልዑል ዘተሳተፈ፤
ወልደ ያሬድ ሄኖክ በከመ ጸሐፈ፤
ሶበ እጼውእ ስመከ ከሲትየ አፈ፤
ረዳኤ ምንዱባነ ሚካኤል በከመ ታለምድ ዘልፈ፤
ለረዲኦትየ ነዓ ሰፈሐከ ክንፈ።

39
ወረብ
ረዳኤ ምንዱባን ሚካኤል ረዳኤ ምንዱባን፣
በከመ ከመ ታለምድ ዘልፈ።

40
ዚቅ
ውእቱ ሚካኤል መልአከ ኃይል፣
ልዑል ውእቱ ልዑለ መንበር፣
ይስአል ለነ ረዳኤ ይኲነነ አመ ምንዳቤነ፣
ሰፊሆ ክነፊሁ ይጸልል ዲቤነ።

41
ወረብ
ውእቱ ሚካኤል መልአከ ኃይል፣
ልዑል ውእቱ ልዑለ መንበር፣
ይስአል ለነ አመ ምንዳቤነ፣
ይስአል ለነ ሰፊሆ ክነፊሁ።

42
፪ ሰላም ለልሳንከ (መልክአ ሚካኤል)
ሰላም ለልሳንከ በነቢበ ጽርፈት ዘኢተሀበለ፣
በእንተ ሥጋሁ ለሙሴ አመ ምስለ ሰይጣን ተበሀለ፣
ሚካኤል ክብርከ እምክብረ መላእክት ተልዕለ፣
ቀዊምየ ቅድመ ስዕልከ ሶበ አወትር ሲኢለ፣
በብሂለ ኦሆ ፍጡነ አስምዓኒ ቃለ።

43
ወረብ
ቀዊምየ ቅድመ ስዕልከ ሶበ አወትር ሲኢለ፤
በብሂለ ኦሆ በብሂለ ኦሆ ፍጡነ አስምዓኒ ቃለ።

44
ዚቅ
ረሰዮ እግዚኡ ለውእቱ ሚካኤል እምኵሎሙ መላእክት ይትለዐል
መንበሩ ስዩም በኀበ እግዚኡ ምእመን።

45
ወረብ
እግዚኡ ረሰዮ ለውእቱ ሚካኤል፤
እምኵሎሙ መላእክት መላእክት ይትለዐል መንበሩ።

46
፫ ሰላም ለኅንብርትከ (መልክአ ሚካኤል)
ሰላም ለኅንብርትከ ኅንብርተ መንፈስ ረቂቅ፣
ዘቱሣሔሁ መብረቅ፣
ነግህ ነግህ አንተ በአዝንሞ መና ምውቅ፣
በገዳም ዘሴሰይኮሙ ለነገደ ኅሬ ደቂቅ፣
ሴስየኒ ሚካኤል ሕገከ ዘጽድቅ።

47
ወረብ
በገዳም በገዳም በገዳም ዘሴሰይኮሙ፤
ለነገደ ለነገደ ኅሬ ደቂቅ።

48
ዚቅ
ባሕረ ግርምተ ገብረ ዓረፍተ፣
ወበውስቴታ አርአየ ፍኖተ፣
በእደ መልአኩ ዓቀቦሙ በገዳም ለሕዝቡ ፵ ዓመተ፣ ወሴሰዮሙ መና
ኅብስተ ኪነ ጥበቡ ዘአልቦ መሥፈርተ።

49
ወረብ
ባሕረ ግርምተ ዓረፍተ ገብረ አርአየ ፍኖተ እግዚአብሔር።
በእደ መልአኩ ዓቀቦሙ ለ፳ኤል ፵ ዓመተ ለሕዝቡ በገዳም።

50
፬ አምኃ ሰላም (መልክዓ ሚካኤል)
አምኃ ሰላም አቅረብኩ ለመልክእከ ኵሉ፣
ለለ፩ዱ ፩ዱ ዘበበክፍሉ፣
ሚካኤል ክቡር ወልዑል መልአክ ኃይሉ፣
ተወኪፈከ አምኃየ እምኑኀ ሰማያት ዘላዕሉ፣
እሴተ ጸሎተየ ፈኑ ወአስብየ ድሉ።

51
ዚቅ
ተወከፍ ጸሎተነ ውስተ ኑኃ ሰማይ፣
ወስእለተነ ከመ መዓዛ ሠናይ፣
ተወከፍ ጸሎተነ ውስተ ኑኃ ሰማይ።

52
ወረብ
ተወከፍ ጸሎተነ ጸሎተነ ውስተ ኑኃ ሰማይ፤
ወስእለተነ ከመ መዓዛ ሠናይ ሊቀ መላእክት።

53
ምስባክ
አዝነመ ሎሙ መና ይብልዑ።
ወወሀቦሙ ኅብስተ ሰማይ።
ወኅብስተ መላእክቲሁ በልዑ እጓለ እመሕያው።

54
የዕለቱ ቅዱስ ወንጌል

55
እስመ ለዓለም በዜማ ቅኝት
ሚካኤል እመላእክት መኑ ከማከ ልዑል፤
አስተምሕር ለነ ሰአልናከ በ፲ቱ ወ፬ቱ ትንብልናከ፤ ሚካኤል
እመላእክት መኑ ከማከ ልዑል፤
ዓይኑ ዘርግብ ልብሱ ዘመብረቅ ሐመልማለ ወርቅ፤ ሚካኤል
እመላእክት መኑ ከማከ ልዑል፤
ይሰግድ በብረኪሁ እስከ ይመጽእ ሥርየት ለኃጥአን፤ ሚካኤል
እመላእክት መኑ ከማከ ልዑል፤
መኑ ከማከ ክቡር። 56
ምልጣን
ሃሌ ሉያ ውእቱ ሚካኤል መልአከ ኃይል ፤ ልዑል ውእቱ ልዑለ
መንበር ፤ ይስአል ለነ ረዳኤ ይኲነነ ፤ አመ ምንዳቤነ ፤ ሰፊሆ
ክነፊሁ ይጸልል ዲቤነ።

57
አመላለስ
ሰፊሆ ክነፊሁ
ክነፊሁ ይጸልል ዲቤነ ክነፊሁ ይጸልል ዲቤነ።

58
እስመ ለዓለም
ሚካኤል እመላእክት መኑ ከማከ ልዑል፤
አስተምሕር ለነ ሰአልናከ በ፲ቱ ወ፬ቱ ትንብልናከ፤ ሚካኤል
እመላእክት መኑ ከማከ ልዑል፤
ዓይኑ ዘርግብ ልብሱ ዘመብረቅ ሐመልማለ ወርቅ፤ ሚካኤል
እመላእክት መኑ ከማከ ልዑል፤
ይሰግድ በብረኪሁ እስከ ይመጽእ ሥርየት ለኃጥአን፤ ሚካኤል
እመላእክት መኑ ከማከ ልዑል፤
መኑ ከማከ ክቡር። 59
አቡን
ሃሌ ሉያ በ፮ ዝስኩሰ ሚካኤል ሊቀ መላእክት፤
ይስአል ለክሙ ኀበ ንጉሠ ስብሐት ፤ ሥዩም በኀበ እግዚኡ ምእመን
ረሰዮ እግዚኡ ለውእቱ ሚካኤል እምኵሎሙ መላእክት፤ ይትለዓል
መንበሩ ስዩም
በኀበ እግዚኡ ምእመን በጽሑ መላእክት ፤ ወቦሙ መዘምራን
ማእከለ ደናግል ዘባጥያተ ክበሮ። ስዩም በኀብ እግዚኡ ምእመን ነዋ
ሚካኤል መልአክክሙ ይስአል ለክሙ በእንተ ምሕረት።
60
ዓራራይ
ሐምልማለ ወርቅ ልብሱ ዘመብረቅ ሚካኤል ሊቅ፤
ሐምልማለ ወርቅ ክንፊሁ ዘእሳት አድኅን እግዚኦ ዛቲ ሀገረ
ወካልዓተኒ አህጉረ በሐወርተ በኃይለ መላእክቲከ እለ እምዓለም
አሥመሩከ ረዳኢየ አንሰ ኪያከ ተወከልኩ።

61
ሰላም
መልአከ ሰላምነ ሊቀ መላእክት ሚካኤል ፤ ሰአል ወጸሊ በእንቲአነ
አዕርግ ጸሎተነ ቅድመ መንበሩ ለንጉሥ ዐቢይ።

62
ኪዳን

63
ዝማሬ
ኅብስተ እምሰማይ ወኀቦሙ ሃሌ ሉያ
ወኅብስተ መላእክቲሁ በልዑ ዕጓለ እምሕያው ሃሌ ሉያ ወወሀቦሙ
ለፍትወቶሙ ወኢያኅጥኦሙ፤ እምዘፈቀዱ እንዘ ሚካኤል የሐውር
ቅድመ ትዕይንቶሙ ለእሥራኤል።

ኃደ / ጌተ-HaDe / GeTe Columbus, OHIO 2019

64
ይህ የኅዳር ቅዱስ ሚካኤል ክብረ በዓል ሥርዓተ ማኅሌት በሊቀ ኅሩያን ቀሲስ ሀብቴ ኩሩ ገብረአብ ፣ የኮለምበስ ኦሐዮ ደብረ ገነት ቅዱስ ሚካኤል ቤተ
ክርስቲያን ካህንና በአቶ ኃይሉ ደስታ በቀለ ተዘጋጀ።
ኅዳር ፲፩ ቀን ፪ሺህ፲፪ ዓ.ም
November 21st, 2019
Columbus, Ohio USA

የሊቀ መላእክት ቅዱስ ሚካኤል ረድኤትና በረከት በሁላችንም ላይ ይደርብን ። አነሣሥቶ ላስጀመረን አስጀምሮ ላስፈጸመን
ክብርና ምስጋና ለአምላካችን ይሁን።
ለዘለዓለሙ አሜን።

65