(bahagi ng Lektura 7 sa Serye ng E-Lektura 2020 ng Tanggol Wika: “Panimulang
Kurso sa Pagsulat ng Resolusyon, Posisyong Papel, Liham-Petisyon, Lobby Letter at Iba Pa”; Lektyurer: David Michael M. San Juan; 05 Hunyo 2020) ~~~ POSISYONG PAPEL NG SAMAHAN MGA MAKABAYANG MANANANGGOL (SMM) PARA SA AGARANG PAGBABASURA NG ANTI-TERRORISM BILL Ipinapahayag ng Samahan ng Mga Makabayang Manananggol (SMM) ang nagkakaisang paninindigan para sa agarang pagbabasura ng Anti-Terrorism Bill, sa pamamagitan ng posisyong papel na ito. Nakabatay ang nasabing paninindigan sa mga sumusunod na pangunahing punto: Una, sa panahon ng pandemya, pangangalaga sa kalusugan at kabuhayan ng sambayanan ang dapat na bigyang-prayoridad ng gobyerno; Ikalawa, mahigit 900 na ang namatay na Pilipino dahil sa COVID-19, habang 297 ang napaslang dahil sa terorismo ayon sa Global Terrorism Index 2019, kaya’t malinaw na mas dapat unahin ang pandemya, lalo na at libu-libo pang kababayan natin ang nagpapagaling pa sa COVID-19; Ikaapat, walang sapat na proteksyon laban sa mga abusado ang panukalang batas dahil inaalis na nito ang probisyon sa lumang batas na nagtatakda ng 500,000 piso kada araw na kompensasyon o bayaring danyos sa sinumang ikulong sa paratang na terorismo, na mapatunayang walang sala; Ikalima, sa esensya ay pagbaligtad sa kinikilalang prinsipyong legal na ang lahat ay inosente hanggang mapatunayang maysala, ang kabuuan ng Anti- Terrorism Bill na nagbibigay-kapangyarihan sa isang konseho na ipagbawal at ideklarang terorista ang isang grupo o indibidwal kahit wala pang pagdinig o hearing. Ikaanim, pinatunayan na sa karanasan ng maraming bansa na hindi kamay na bakal kundi mapagkalinga at makatarungang pagsasaalang-alang sa karapatan at kapakanan ng mga mamamayan ang tanging mabisang panlaban sa mga ugat ng terorismo. Sa ganitong diwa, binibigyang-diin ng SMM ang paninindigan para sa agarang pagbabasura ng Anti-Terrorism Bill. NILAGDAAN ngayong 05 Hunyo 2020 sa Pangkalahatang Asembliya ng SMM sa Lungsod ng Davao. ~~~ RESOLUSYON NG PARTIDO NG MGA OBRERO SA PILIPINAS (POP) NA HUMIHILING SA GOBYERNO NG PILIPINAS NA ITAAS ANG AYUDA SA PANAHON NG PANDEMYA SA 31,000 PISO KADA BUWAN MAN LAMANG, MULA SA KAKARAMPOT NA 5,000-8,000 PISO KADA BUWAN SAPAGKAT, kulang na kulang sa pangangailangan ng bawat pamilyang benepisyaryo ang ayudang 5,000 – 8,000 piso kada buwan sa ilalim ng Social Amelioration Program (SAP); SAPAGKAT, 31,000 piso ang family living wage o nakabubuhay na sweldo para sa isang pamilya na may 5 miyembro, ayon sa IBON Foundation; SAPAGKAT, sa datos mismo ng Philippine Statistics Authority (PSA), 10,727 piso ang poverty threshold o halagang kailangan ng isang pamilya para hindi sila ikategoryang mahirap sa opisyal na estadistika; at SAPAGKAT, ayon sa pag-aaral na “Economic Relief in the Time of COVID- 19: Rationale, Mechanics, Costing, and Prospective Impact of Temporary Value-Added Tax (VAT) Suspension and Income Tax Waiver for the Poor and the Middle Class in the Philippines,” tinatayang halos 2,500 – 6,000 piso ang nadagdag sa buwanang gastos ng bawat pamilya dahil sa pandemya; KAYA NGAYON, pinagpapasyahan ng Partido ng Mga Obrero sa Pilipinas (POP) na ilabas ang resolusyong ito na humihiling sa gobyerno ng Pilipinas na agarang itaas ang halaga ng ayuda sa panahon ng pandemya sa 31,000 piso kada buwan man lamang, mula sa kakarampot na 5,000-8,000 piso kada buwan. PINAGTIBAY AT NILAGDAAN ngayong 05 Hunyo 2020, sa Pangkalahatang Asembliya ng POP sa Lungsod ng Maynila. ~~~ RESOLUSYON NG NAGKAKAISANG MGA MANGGAGAWA SA SEKTOR PUBLIKO AT PRIBADO (NMSPP) NA HUMIHILING SA SENADO AT KONGRESO NA MAGPASA NG BATAS NA MAGPAPATUPAD NG SISTEMANG PENSION INDEXATION PARA SA LAHAT NG MGA MANGGAGAWA SA PILIPINAS SAPAGKAT, regular na tumataas ang presyo ng mga serbisyo at bilihin sa bansa ngunit hindi naman halos tumataas ang pensyon ng mga retiradong manggagawa; SAPAGKAT, ang mga retiradong pulis at militar sa bansa ay nakakaagapay sa gayong mga pagtaas ng bilihin kahit paano, dahil sila’y nagtatamasa ng benepisyong pension indexation na awtomatikong nagtataas sa pensyon ng mga retirado para pantayan ang sweldo ng mga kasalukuyang nasa serbisyo; SAPAGKAT, hindi lamang ang mga retiradong pulis at militar, kundi maging ang lahat ng retiradong manggagawa sa sektor publiko at pribado ang dapat makaagapay sa pagtaas ng presyo ng mga bilihin; at SAPAGKAT, lahat ng retiradong manggagawa ay pawang nag-ambag din sa paglikha ng yaman ng bansa; KAYA NGAYON, pinagpapasyahan ng Nagkakaisang Mga Manggagawa sa Sektor Publiko at Pribado (NMSPP) na ilabas ang resolusyong ito na humihiling sa Senado at Kongreso ng Pilipinas na magpasa ng batas na magpapatupad ng sistemang pension indexation para sa lahat ng mga manggagawa sa bansa. PINAGTIBAY AT NILAGDAAN ngayong 05 Hunyo 2020, sa pulong ng Pambansang Konsehong Ehekutibo ng NMSPP, sa Lungsod ng Cebu. ~~~