Sa panahon natin ngayon, napakaraming problema ang di matapos tapos at napakahirap
solusyonan sa ating bansa. Dahil dito, napakaraming tao ang naaapektuhan dahil sa maling pamamalakad nito. Ang Repórma sa Lupà ay tumutukoy sa legal na pagbili ng pamahalaan sa malalawak na lupaing sakahan upang ipamahagi sa mga magsasaka. Isinasagawa ito sa tulong ng mga batas sa repormang agraryo. Hindi na kailangang pagdebatehan, ang kalagayan ng magsasakang Pilipino sa bansa. Mula Luzon, Visayas at Mindanao, sila ay nakalugmok sa kahirapan at kagutuman, bunga ng kanilang kawalang lupa, marginalisasyon at direktang pang-aapi at pagsasamantala. Sa magtatatlong taon ng administrasyong Duterte, nakalulungkot na binigo ng Pangulong Duterte ang kanyang pangakong iangat sa kahirapan ang mga kababayan nating magsasaka. Ang mga magsasakang walang lupa noon, ay wala pa rin ngayon, ang mga dating may sakahan naman, ay pinapalayas, at ang mga produktibong lupa ay winawasak at kinumkumbert para sa ibang gamit. Noong 2014, nag-expire na ang Republic Act 6657 Comprehensive Agrarian Reform Program o CARP. Ito orihinal na dapat lamang ipatupad ng 10 taon mula 1988. Bago nito, ang agrarian reform program ay ang Presidential Decree 27 ng diktaduryang Marcos. Ilang taon na ang nakalilipas, wala pa ring bagong batas para sa repormang agraryo, samakatuwid, wala nang madadagdag na benepisyaryo mula sa mga magsasakang hindi nailista, noong ipinapatupad ang CARP. Alam natin na hanggang sa ngayon ay hindi pa rin nasosolusyonan ang problema na ito. Napakarami pa ring magsasaka ang naghihirap at nagtitiyaga na maghintay sa gagawing solusyon ng gobyerno. Imbis na pagtuunan ng pansin ang problema sa mga magsasaka, mas pinagtutuunan nila ng pansin ang mga simpleng problema na kaya naman solusyonan agad. Para sa akin, sana naman ay masolusyonan agad ang problema sa mga magsasaka dahil sa kanila ay nabubuhay tayo araw araw. Napakarami nilang naisasakripisyo at naitutulong sa atin kaya dapat sila ang mapagtuunan ng pansin.