Agta sa Burabod

Ki Merlinda Carullo Bobis

nagbibilog an bulannamimilog na an sakuyang daghan

sa tubig, nagmamaris-mis na itom
nagkukutab-kutab na kublit nin diklom

digde sa burabod, pigkukugos ako kan banggi

pigkakarigos kan maliputon niyang huni,
piglilindungan kan tonog an kolor ko.
pighuhuruhinghing an sakong sikreto.

na nagbibilog an bulan,
asin namimilog na man an sakuyang daghan.
ay mahamoton an limonsito ngunyan;
namumula na an mga poon sa pampang

burubanggi kong sadiri an burabod na ini,

burubanggi kong sadiri an banggi.
ta an saldang dai minatugot magkatrigos ako –
pag an agta nahiling, daing maraning tawo

nagbibilog na an bulan
namimilog na an sakuyang daghan
namumuti an dalan ki kamya,
naglalaadlaad an bandera espaňola.

nagkakakolor naman an sakuyang boot

na natatago kan tapis kong naghihigot;
alagad an pagburak nin pagmawot dai ninda aram
ta an kublit ko nangingintab na baligang.

nagbibilog an bulan,
namimilog na an sakuyang daghan
an rosal, an kanda asin sampagita
nagpapaurogan sa pagkamestisa

alagad kakolor ko pa gilayon an daga-

ay, may! mamurak man an daghan kan agta,
dai ki makakahiling, ta daing pakilabot
an holwat na mata sa hardin kan boot

nagbibilog an bulan,
namimilog na an sakuyang daghan.
sa agang banggi, manghihilod ako ki husto
ta may barayle- na arog kan dati-dai ako imbitado

kaya ako mapabayle digde sa burabod,

imbitado sana su daing mga mata, su mga tawong- lipod,
sinda na namomoot sa banggi, sa tonog , sa itom,
sinda na nakakamate kan pagkugos, kan pagsayaw sako kan diklom