Sa kabila ng kagandahang mayroon ang Kalinga ay likas na mayaman din ito sa kultura’t tradisyon. Isa na rito ay ang pagtinta sa katawan o pagta-“tattoo”. Ang mga disenyong inuukit sa katawan ng mga taga- Kalinga ay batay sa mga bagay na kanilang nakikita sa pang araw araw tulad na lamang mg hagdan, palayan at alupihan. Ang mga ito ay nagsisimbolo ng kalakasan, kagandahan at katandaan. Mambabatok ang tawag sa mga “tattoo artist” ng Kalinga. Isa sa pinakamatandang tradisyunal na mambabatok ng Kalinga ay si Apo Whang-Od sa edad na 92. Ang mga instrumentong ginagamit sa pagta-“tattoo” ay mula sa kawayan at mga tinik ng halaman na gawa ng mga tao roon. Habang ang tinta ay gawa sa pinaghalong tubig at uling. Ang tradisyon na ito ng probinsya ng kalinga ay ‘di gaanong tinatangkilik ng mga kababayan ngunit patok sa mga turista. Ang Lubuagan ay makikita sa pagitan ng munisipalidad ng Pasil sa hilaga; munisipalidad ng Tanduan sa silangan; munisipalidad ng Tinglayan sa timog at probinsya ng Abra sa kanluran. Ito ay may kabuuang sukat na 14,800 hektaryang lupain. Binubuo ito ng siyam (9) na barangay kabilang ang Dansoy, Mabilong, Mabongtot, Poblacion. Tanglag, Lower uma, Upper uma, Antonio canao, at Uma del norte(western uma). Ang populasyon ng Lubuagan ay may bilang na 9, 877; 5,113 na kalalakihan at 4,784 na kababaihan. Pagsasaka ang industriya ng Lubuagan at kape ang pinakamalaking produkto nito. Sa kabila nito maraming kabataan ng Lubuagan ang lumilipat sa tabuk at kalapit probinsya upang maghanap ng pagkakakitaan. Sa loob ng 300 taon ng pananakop ng Espanyol, wala ni isang batas ng espanyol ang napatupad sa Lubuagan at minsan pa itong naging kapital ng Kalinga. Ang Cadamayan Falls o sa iba pang tawag ay Asiwabu Falls ay isa sa tinatangkilik na pasyalan sa Cordillera. Ito ay matatagpuan sa munisipalidad ng Lubuagan, probinsya ng Kalinga. Ito ay nagsisilbing taga-pagitan ng mga munisipalidad ng Pasil, Labuagan, at Tinglayan. Mahabang byahe na susuungin kung mangagaling ng maynila kaya’t madaling araw pa lamang ay naisipan na naming bumyahe sa kabila nito hindi ganoon kahirap ang trasportasyon patungo sa lugar na ito sapagkat maraming alternatibong paraan upang makarating rito. Ang eksaktong lokasyon ng Cadamayan Falls ay sa Barangay Uma del norte o tinatawag ngayon na Western Uma, Isa sa mga barangay ng lungsod ng Lubuagan. Sa kabila ng hirap at pagod sa pagpunta sa talon na ito ay kabaligtaran ang naramdaman naming nang makarating dito. Nahaharangan ng mga nagtataasang puno at naglalakihang bato ang daanan kung kaya’t naging masusi kami sa bawat hakbang na aming binibitawan. Madulas at malambot din ang lupa dahil na rin siguro sa basa ito mula sa talon. Maraming beses na ako’y kamuntikan nang madulas at masubsob kaya puro putik na rin ang aking kamay at ibang parte ng kasuotan. Pagkarating ng mismong Cadamayan Falls, kami ay kumuha agad ng litrato. Aalis na sana kami ngunit ayon sa aking tila “tourist guide” ay mayroon pang ibang talon na umusbong sa ibang bahagi ng Cadamayan Falls. Naroon na rin naman kami ay nagpagdesisyunan naming pumunta narin. Sa una’y nagtaka ako sapagkat paano magkakaroon ng maraming Cadamayan Falls. Mga ilang minutong lakaran ay narating na rin naming ang isa pang Cadamayan Falls. Nawala ang aming pagtataka nang masilayan na namin mismo ang talon. Hindi lamang isang talon ang aming makikita sa lugar na ito kundi higit sa aming inaasahan. Ang dahilan kung bakit mayroong isa, dalawa, tatlo, apat at maraming bersyon ng talon ang Cadamayan Falls ay sapagkat sa lawak ng talon na ito ay umusbong sa iba’t-ibang parte ng barangay. Ilang minutong lakaran lamang ang tagal ng paglalakad sa pagitan ng mga nasabing talon. Ako’y natuwa sapagkat hindi lamang naibsan ang aking pagod kundi may pasobra pa. Maraming kaalama akong natuklasan at maibabaon sa aking paguwi sa maynila. Hindi lamang kagandahan ng mga talon o iba pang pasyalan ang maaalala ko sa lugar na ito kundi pati na rin ang kabaitan at busilak na puso ng mga tao. Sa ilang araw kong pananatili rito ay nakita ko ang hirap ng buhay ng mga tao rit. Matatarik na daanan ang nilulusob upang makarating sa isang lugar ngunit walang reklamo nila itong ginagawa. Matapos naming kumuha ng litrato ay pupunta pa kami sa iba pang talon, nakakatakot at nakakapagod pero tuloy parin. Iisang bagay ang makikita sa bawat talon na aming pinuntahan nguit ang nagsilbing kakaiba sa bawat talon ay ang pormasyon ng mga puno at bato.