Kumapit ka sa akin… Kumapit ka sa akin… Hindi kita iiwanan… Kumapit ka lang
dahil konti na lang mararating mo na ang gusto at kinasasabikan mong mapuntahan. Tuwa at galak ang aking nadama nang marating ko ang tutok ng Mt. Napulak. Napulak, Napulak, Napulak, isa sa pinakasikat na rurok sa buong bayan ng Igbaras na binabalik-balikan ng mga turista lalo na ng mga dayuhan. Ito ay nasa taas na 1239 meters above sea level. Kaya sikat ang Napulak, hindi lamang sa taglay nitong ganda, sapagkat matatanaw mo dito ang 360-degree view ng mga bayan gaya ng Tubungan, Guimbal, Miag-ao at maging ang probinsya ng Antique at ang kamangha-manghang ganda ng Mt. Kanlaon. Ang Napulak ay sakop ng Brgy. Tigbanaba dito sa bayan ng Igbaras. May dalawang posibleng ruta paaakyat sa bundok, maari kang dumaan sa Brgy. Bagay, maaari ring dumaan sa Brgy. Tigbanaba. May iba pang sikat at kamangha-manghang mga lugar ang bayan ng Igbaras. Ito ay napapaligiran ng nga bundok gaya ng Mt. Taripis, Mt. Opao, at Mt. Loboc. Pero dinarayo pa rin sa lahat ang Mt. Napulak. Mararating mo ang tuktok ng bundok depende sa bilis ng iyong paglalakad. Sapagkat may kalayuan din naman talaga ito sa sentro ng bayan, marami ang nakakarating dito sa loob lamang ng apat hanggang limang oras ngunit ang ilan ay umaabot ng pito hanggang walong oras bago makarating sa tuktok ng bundok. Maliban sa maganda nitong tanawin ay makakalanghap ka dito ng preskong- preskong hangin. Isa rin itong magandang lugar para sa mga naghahanap ng hamon at karanasan. Mayroong hindi gaanong mahirap na daan at mayroon din namang madulas at pataas na daan kung saan kakailanganin mong kumapit sa mga damo pati na rin sa mga sanga at puno ng kahoy para lang makaakyat sa bundok. Kapag nauhaw ka kakalakad at kakaakyat, mayroong mapagkukunan ng malinis na tubig sa daan na pwedeng inumin. Sa tuktok ng Napulak, walang mapagkukunan ng tubig kaya kailangan mong magbaon ng maraming tubig paakyat dito. Ito ay napapaligiran ng maraming puno lalo na ng puno ng kape kung saan makikita mo ang mga bunga nito maging sa daan paakyat. Isa ito sa mga nagiging kabuhayan ng mga residente sa lugar sapagkat naibebenta nila ito sa halagang singkwenta pesos bawat pakete. Kung gusto mong manatili hanggang umaga, maaari kang magdala ng sarili mong tent o tulugan at mga angkop na damit upang hindi ka ginawin. Napakalamig sa lugar lalo na kapag papunta na sa umaga. Masisilayan mo rito ang paglubog at pagsikat ng araw na isa rin sa kinagigiliwan at kinasasabikang makita ng mga turista. Sa bundok ng Napulak, matatagpuan ang tinaguriang pinakamalaking bulaklak sa buong mundo, ang Rafflesia. Makikita mo rin dito ang mga karaniwang bulaklak gaya ng sunflowers at orchids maging ang mga karaniwang berries. Makakakita ka rin dito ng mga makukulay na insekto kapag gabi. Matatagpuan din dito ang Limbaong Falls na isa rin sa mga pinupuntahan ng mga turista kapag nakaakyat na sila ng bundok. Kaya kumapit ka sa akin… Kumapit ka sa akin..Dahil hindi kita iiwanan, dahil malapit na nating marating ang gusto nating mapuntahan, at narating ko na nga ito. Ito ang Mt. Napulak ng bayan ng Igbaras.