Ang bakuna ay isang sustansiyang nakakapagpalakas sa sistemang imyuno ng isang tao na
nakapagpapababa ng tyansa na magkaroon ng impeksiyon sa sistema ng tao. Ipinaglalaban nito ang sistemang imyuno natin laban sa mga bakterya na nagiging dahilan ng mga sakit. Marami ang nagsasabing ang pagpapabakuna ay isang hakbang upang masolusyonan at malabanan ang mga sakit na lumalaganap. Totoong ang pagiging maagap ay mas nararapat kaysa sa pag-iingat. Marami ang mga nagpapabakuna dahil gustong makaiwas agad sa pagkakaroon ng malalang sakit. Kilala rin sa kasaysayan ng mga sakit na marami na ang naisalbang buhay dahil sa pagpapabakuna. Ngunit dati pa man, mainit na usapin na rin ang mga taong hadlang dito. At lalo na ngayong panahon ng pandemya, kung saan ang mga tao, higit lalo ang mga Pilipino, ay nagiging alanganin ang desisyon sa usaping ito. Naiimpluwensyahan ang pagtanggi sa pagbabakuna ng isang tao dahil sa kakulangan ng tiwala sa mga namumuno sa kalusugan at minsan ay dahil sa takot sa magiging epekto nito sa kanilang katawan. Minsan ay mahalaga ang pagkakaroon ng ganitong lebel ng hindi pag sang-ayon dahil ang kalusugan ng tao ang nakasalalay rito. Walang makakasisi sa pagkakaroon nila ng pag-aalinlangan dahil una sa lahat, kung may maayos lamang na pagresponde at may malinaw na aksyon at pagtugon sa krisis na ito, hindi magdadalawang isip ang sinuman sa pagpapabakuna.