Xavier University- Ateneo de Cagayan

School Year 2020-2021

FILIPINO 67 – Nakasulat na Ulat

Mga Kaugalian sa Pag-aasawa sa Ibaan,
Batangas

Ipinasa ni:
Hannah Grace R. Presillas

Ipinasa kay:
Ginoong Ryan Raran
Guro sa Filipino 67- E2A3
 Introduksyon

Hindi maikakailang karamihan sa mga babae ay nangangarap na maikasal. Sa

Ibaan, Batangas, labis ang saya na mararamdaman ng babaeng ikakasal dahil sa
kanilang kakaibang tradisyon. Dito, ang pag-aasawa ay isang okasyong baryo na
tumatagal ng ilang araw. Sinasabing mabigat ito sa parte ng lalaki sapagkat halos
lahat ng gastusin ay sasagutin ng kanyang pamilya at sila ang gagawa sa lahat ng
preparasyon para dito. Ngunit sa kabila nito, sulit naman ang lahat ng pagod at perang
gagastusin dahil makakasama na niya ang babaeng katuwang sa paghabi ng buhay
na kanilang pagsasaluhan.

Nilalaman

Baisanan (bai-sah-nan.)

• ang tawag sa kasalang namamanhik ang mga magulang ng kalalakihan sa

mga magulang ng kababaihan.
• Ito ay isang matandang kaugalian na nananatili at hindi naitaboy ng
makinisasyon mula sa mga bakuran at bukirin ng Ibaan.

Sa pamamaisan:

• Walang tao sa bahay ng mamamaisan sapagkat lahat sila ay buong sipag

at pagpapakasakit na tumutulong sa ano mang gawain sa bahay ng
binabaisan.
• Lahat ng mga kamag-anak at kapatid ng mga lalaki ang inaasahang
tutulong sa pagluluto at paglilinis.
- Mga batang lalaki- inaasahang mag-iigib ng tubig
- Mga dalaga- mamamahala sa paghahain at pag-iistima sa mga bisita.
- Mga may edad- magluluto at maghuhugas ng mga pinggan.
• Hindi nila mahihiling tumulong kahit sino man sa partido ng kadalagahan
sapagkat sila ang nanunuyo.

Mga Hakbang sa Pamamaisan

1. Patubigan
 ▪ Ang mga kamag-anak ng lalaki ay pupunta sa bahay ng mga pinsan ng
babae upang punuin ng tubig ang kanilang tapayan. Hindi mahalaga
kung ang bahay ng naturang pinsan ay nasa kabilang bayan pa; basta
rin lamang at mararating ng mga namamaisan ay tiyak na puno ang
kanilang tapayan.
▪ Ang pamilya ng lalaki ang inaasahang pupuno sa tapayan ng babae.
Dahil dito, hindi maiiwasang maging isang balita sa buong bayan ang
pamamaisan. Ang lahat ng mga tumulong sa patubigan ay tutuloy sa
bahay ng lalaki upang doon kumain.

2. Bulungan
▪ Sa hakbang na ito ay pupunta sa bahay ng babae ang mga magulang
ng lalaki na may dalang malaking isdang tambakol.
▪ Pag-uusapan na nila ang mga magiging ninong at ninang at mga abay
sa kasal, at petsa ng kasal at pati na ang ihahanda sa araw ng kasal.
Ngayon din itatakda ang halaga ng pamaraka.
▪ Ang pamaraka ang perang ipambibili ng gagamitin ng babaing
ikakasal.
▪ Lahat ng bagay, tungkol sa gagamitin ng babae, ay kailangang
gastusan ng lalaki.

Handa

o Kung ano ang igagayak ng kalalakihan ay gayun din ang igagayak ng

kababaihan. Lagi silang hati sa pagkaing ihahanda, tulad ng bigas at mga
hayop na kakatayin.
o Ang mga naturang hayop ay buhay na dadalhin sa bahay ng nobya upang doon
katayin at lutuin.
o Ang kasangkapang gagamitin ay nasa responsibilidad din ng kalalakihan.
Kailangan dalhin nila sa bahay ng nobya ang talyasi, kawali, kaldero, at tinidor,
at maging ang mga basahang ipamumunas

Anti-desperas (ikalawang araw bago ang kasal)

o Ang pagluluto ay sisimulan na.

 o Sa araw na ito ipadadala ang mga kahon ng mga alaala sa mga ninong at
ninang sa binyag, kumpil at kasal ng mga ikakasal.
o Ito ay naglalaman ng sangkapat na putol ng hayop na kinatay at labindalawang
klase ng tinapay na ipinasadya at ihahatid ito sa kani-kanilang tahanan ng mga
kamag-anak ng ikakasal kundi man ng mga magulang nila.

Pagtatayo ng sibi

o Sa bakuran ng nobya ay magtatayo pa sila ng sibi, na siyang magiging lugar

ng kainan sa bisperas at araw ng kasal. May mga yerong sadyang pinauupahan
para sa ganitong layunin kaya hindi na sila kailangang bumili.
o Bukod sa yero, aarkila pa rin ang mga kalalakihan ng mikropono na may
dalawang ispiker at radyong ponograpo na gagamitin sa bisperas ng kasal. Ang
pagpapatugtog ng mga plaka at pagsasahimpapawid ng imbitasyon para sa
mga kababaryo ay sisimulan sa umaga at magpapatuloy ito hanggang sa
kinabukasan.

3. Sabitan
▪ Sa gabi, matapos maghapunan ang mga bisita, ang mga bangko ay
iaayos nang pabilog sa harap ng bahay ng babaing ikakasal. Ang
kabinataan at kadalagahan naman ay magsisiupo sa naturang bangko
upang pasimulan ang pasayaw.
▪ Sa saliw ng malambing na tugtog ng plakang nakatapat sa dalawang
ispiker, ang magnobyo ay sasayaw bilang pagbubukas sa pambisperas
na pagdiriwang.
▪ Sa kalagitnaan ng tugtog, sila ay sasabitan ng pera ng kani-kanilang
partido. Ang partido ng kalalakihan ang magsasabit sa babae at ang
kababaihan ay magsasabit sa lalaki.
▪ Dito ay magpaparamihan ng maisasabit ang dalawang partido at di
umano, ang halaga ng naisabit ang siyang batayan ng pagkagusto sa
nobya o nobyo ng magiging biyenan nito. Kaya kung marami ang
isinabit ng partido ng kalalakihan, sadyang gusto nila ang naturang
nobya para sa kanilang binata.
▪ Ang halagang masasabit ang magiging pasimulang pondo ng mga
ikakasal.
Paghiling ng mga awitin

o Isusunod naman ang paghiling ng mga awitin sa mga kamaganak at kaibigan

upang bigyang-aliw ang mga nagtitipon at upang mapanatiling gising ang mga
tagaroon sa buong magdamag.

4. Kasal
▪ Sa umaga ng kasal, ang lahat ay sa bahay ng babae mag-aalmusal.
Mula doon ay tutuloy sa simbahan para sa panrelihiyong seremonya.
▪ Pagbalik sa bahay, ang sasakyan ng mga bagong kasal ay
sasalubungin ng mga paputok. Sasabuyan sila ng bigas at bulaklak sa
puno ng hagdanan. Magpapakiramdaman kung sino ang unang
tatapak sa baitang sapagkat may pamahiin sila na kung sino ang
mauna ay siya ang mananaig sa disposisyon kapag sila ay nagsasama
na.
▪ Bago naman pumasok sa mismong kabahayan, may mag-aalay ng
kalamay at inumin. Susubuan ng lalaki ang babae at gayundin ang
gagawin ng babae. Pagkainom ng tubig ng lalaki ay saka pa lamang
iinom ang babae.
▪ Pagpasok nila sa kabahayan, lahat ng naroroong matatanda ay
pagmamanuhan ng mag-asawa bilang paghingi ng bendisyon.

Kainan

o Ang kainan ay ginagawa sa ibaba ng bahay, doon sa itinayong sibi.

o Sa unang hain, pupunuin ang mesa ng mga taong gumanap sa kasalan, mula
sa ninong at ninang hanggang sa batang nagsala at nagsaboy ng bulaklak sa
simbahan.
o Sa susunod na hain ay ang lahat naman ng kasapi sa partido ng kababaihan.
Walang miyembro ng pamilya ng kalalakihan ang makikitang nakadulog sa
mesa. Lahat sila ay inaasahang magsisilbi sa mga kumakain. Kung wala nang
iba pang kakain ay saka na lamang sila maaaring dumulog
5. Pagtitinda
▪ Ang mag-asawa ay pauupuin sa isang mesita na may lamang suman,
sigarilyo, at iba’t ibang uri ng puto at minatamis na pagkain.
▪ Ang mga naturang paninda ay may mga halagang mapagkakasunduan
ng mga nasa harapang yaon.
▪ Unang tatawagin sa mikropono, upang bumili, ang ninong sa binyag
ng lalaki, susunod ang ninang at saka lilipat sa ninong at ninang sa
binyag ng babae. Pangalawang tatawagan ang mga ninong at ninang
sa kumpil at ihuhuli ang ninong at ninang sa kasal.
▪ Ang mga taong ito ang inaasahang makapamimili ng pinakamalaking
halaga lalo na ang ninong at ninang sa kasal. Ang halaga ng kanilang
mabibili ay itatawag din sa mikropono, nahahaluan ng panunudyo kung
ang mga taong nakaharap ay hindi nasisiyahan sa halagang kanilang
binitiwan.
▪ Ang pagtatapos ng pagtitinda ay hudyat upang ang ibang mga bisitang
malayo pa ang uuwian ay makauwi na nang hindi maghihinanakit ang
may pakasal.
▪ Ang halagang mapagbibilhan ay magiging dagdag sa pondo ng mag-
asawa.
6. Dapit
▪ Sa dapit unang makatutuntong ang babae sa bahay ng kanyang
biyenan.
▪ Suot ang damit pangkasal, pangungunahan ng mag-asawa at ng mga
magulang ng lalaki ang munting parada mula sa bahay ng babae
patungo sa bahay ng lalaki.
▪ Bitbit nila ang kasangkapang ginamit, sunong ang mga talyasing
pinaglutuan at kipkip ang balutan ng mga basahang ginamit sa buong
panahon ng pamamaisan.
▪ Pagpanhik sa bahay ng lalaki ay uulitin ang seremonya sa hagdan.
Lamang, sa halip na bulaklak at bigas ang isasaboy sa mag-asawa ay
togeng nakababad sa alak. Ginagawa ito upang maging masagana ang
kanilang kabuhayan
Sa loob ng bahay:

o Pagpasok naman sa kabahayan ay sasalampak sila sa nakalatag na puting

kumot.
o Ang mag-asawa ay palilibutan ng mga kapatid ng lalaki upang hindi sila sugurin
ng hipag sa mga darating na araw.
o Sasabuyan sila ng barya habang sila ay nakaupo at may isang matandang
mangangaral na babae.
o Pagkatapos ay wiwisikan sila ng ina ng lalaki ng tubig buhat sa inuming natira
sa seremonya sa hagdan.
o Isusunod ang pagmamano sa mga nakatatanda at saka isa-isang pupulutin ng
babae ang mga baryang inihagis sa kanila.
o Titiklupin din nila ang inilatag na kumot bilang simula sa kanyang
pakikipamuhay sa kanyang mga biyenan.

7. Pagbibihis
▪ Bilang huling hakbang, ang babae ay magbibihis na ng damit
pangkasal.
▪ Ang pagbibihis ay sa bahay ng lalaki ginagawa upang ipahayag na ang
lahat ng angkin ng babae ay ipinaiilalim na niya.
▪ Dito aktuwal na nagtatapos ang pamamaisan.

Tirahan

o Sa unang gabi ay sa bahay ng babae matutulog ang mag-asawa.

Magpapalipat-lipat sila ng tutulugan sa loob ng isang linggo hanggang sa
mananatili na sila sa bawat bahay ng kung ilang linggo.
o Ganito ang kanilang magiging buhay sa unang taon ng kanilang pagsasama.
Kawalang utang na loob sa magulang kung agad silang bubukod at
mamumuhay nang sarili.

Wika

o Tagalog ang gamit na wika ng mga Batangueño. May pekyularidad din ito
depende sa komunidad na gumagamit nito dahil sa leksikon at ponolohiya,
morpolohiya at sa iba pang mga komponent ng speech act na batayan ni
Hymes (1975).
 Kongklusyon

Totoong labis na pinapahalagahan ng mga taga Ibaan, Batangas ang kanilang

tradisyon sa pag-aasawa. Para sa kanila, ang kasal ay dapat alalahanin habambuhay.
Ito ay isang selebrasyon ng pagmamahalan ng dalawang tao kaya dapat ipagdiwang
ito sa paraang hindi malilimutan.

Bibliograpiya

Batangas Wedding Tradition. (n.d.). Retrieved from batangas-philippines.com:

http://www.batangas-philippines.com/wedding-tradition.html

Salitang Batangas. (2010, August). Retrieved from

https://www.salitangbatangas.date/2010/08/b_11.html

Tagalog Dictionary. (n.d.). Retrieved from Pinoy Dictionary:

https://tagalog.pinoydictionary.com/word/baisanan/