Dawi A Ningbaw Ningla Kasi

Chyum laika labau hta Israela hkawhkam Dawi baw hkik hkam ai ningbaw ningla langai re. Israela amyu malawng maga gaw
Dawi, hkawhkam rai n tai shi a aten kawn shi hpang hkan nang ma ai hte shi hpe kam hpa manoi manat ma ai. Yehowa Karai
Kasang mung “Nye a myit hte tup ai Yese a kasha” (Kasa 13:22) ngu shagrau wu ai. Dawi a ningbaw ningla kasi ni hpe lawu de
na lam ni hku sharin la mai nga ga ai.

1. Myit galu hkam sharing ai wa re (Patience) : Dawi gaw brangji ten kawn Israela hkawhkam tai wa na matu namman chya ya
hkrum ai wa re (I Samuela 16). Rai tim asak 30 ning hta she Hebron mare kaw hkaw dung nna Yuda mung hpe sanit ning e shata
kru tup up wu ai. Dai hpang asak 37 ning hta she Israela amyu sha yawng a hkawhkam tai wa ai re ( II Samuela 5:1-5).
Hkawhkam tai wa na matu Samuela nanman chya ya ngut ai hpang shaning 20 ning dram myit galu hkam sharang ngut ai hpang
she hkawhkam tai wa ai re. Shawlu hkawhkam a asak gyam ai lang hte lang hkrum sha re. Lungpu hkan, tara maigan ni a ga jarit
hkan lang hte lang hprawng makoi hkawm ra wu ai. Dawi shi Shawlu hpe sat kau lu na matu ahkaw ahkang yawm dik 2 lang lu
dam tim, myit galu hkam sharang wu ai (I Samuela 24). Yehowa Karai Kasang gaw yawng mayawng hpe up hkang nga ai re
majaw shi hpe Karai Kasang shagrau shatsaw la na aten nga na re ngu ai hpe kam sham ai wa rai wu ai.

2. Myit shagrit shanem ai wa re (Humble) : Myit shagrit shanem ai lam mung Dawi a ningbaw ningla atsam ningja langai rai wu
ai. Kawa, shi kahpu ni a matu lu sha sa sa shangun ai shaloi, hkawhkam tai wa na wa rai tim myit shagrit shanem ai hte madat
mara hkan galaw wu ai ( I Samuela 17:17-20). Shi a hkam la ai lam hta hkawhkam wa rai tim Yehowa Karai Kasang a shangun
ma n chyang mayam sha re ngu hkam la wu ai. Shi gaw hpa n hkaw ai wa she re, hkawhkam tai wa lu ai gaw Yehowa Karai
Kasang chyeju jaw shagrau da ai lam she re lam Karai Kasang a man hta yin la hkam la let Isreala hpe woi awn ningshawng ai re
( II Samuela 7:18). Awng dang lam mahkra mung Krai Kasang a chyeju she re lam hkam la ai wa rai wu ai.

3. Nden marai rawng ai wa re (Courage) : Hpilisti masha Goliat wa Isreala hpyen dap kaw na lata ai marai langai hte`gasat sat
hkat na dahkat ai (challenge) shaloi, dawng kru e lahkam mi tsaw ai, magri gup da ru gup nna, magri palawng hpun, magri laraw
raw nna, lahpa hta magri ri kaba hpai ai Goliat hpe grai hkrit ma ai (I Samuela 17:11). Hkum hkrang galu kaba ai Shawlu
hkawhkam (I Samuel 9:2) mung myit htum let grai hkrit wu ai. Dawi chyawm gaw ma sha naw rai tim (I Samuela 17:33), ‘a
hkrung nga ai Karai Kasang a hpyen laba ni hpe jahpoi ai majaw’ ‘hkanghkyi hte tsap a lata na ngai hpe hkye la ai Yehowa gaw,
dai Hpilisti wa a lata na mung hkye la na ra ai’ ngu Shawlu hpe tsun nna Goliat hpe gasat dang la ai re (I Samuela 17:326-37).
Ýehowa gaw nye a nhtoi hte hkye hkrang la ai lam rai nga ai, kadai wa hpe ngai hkrit nga nta?. Yehowa gaw nye a asak shingbyi
shara rai nga ai, ngai kadai wa hpe hkrit kajawng na rai nga a ta?’ (Shakawn kungdawn 27:1) ngu nna hpa majaw shi n den marai
rawng ai lam shakawn kungdawn da ai re. Dai lam ni hpe yu yang Dawi gaw shi a hpang e (Sh) shi hte rau Yehowa Karai Kasang
nga ai ngu ai hpe kam nna, Yehowa a hpung shingkang hta n den marai rawng ai lam wai wu ai.

4. Makam masham kaba ai wa re (Faith): Makam masham kaba ai lam gaw Hkristan ningbaw ningla ni a lak lai ai atsam ningja
rai mali ai. Dawi a prat labau hta mung Yehowa Karai Kasang hpe kam hpa manoi ai the sak hkrung ai sha n-ga Israela amyu sha
ni hpe hkik hkam dik ai hkaw hkam langai hku woi awn lai wa ai hpe mu mada lu ga ai. Shi a ma prat aten hta sagu rem ai shaloi
‘hkanghkyi tsap sa nna, sagu hpung na sagu kasha la sha mat wa yang, shi hkan shachyut nna, sagu kasha hpe shi a n-gup na
shaw la lu ai lam ni; shi hpe htim kawa wa yang, shi a mun hta magra shading da nna, kayat sat kau lu ai lam ni’ ma hkra mung
Yehowa Karai Kasang a chyeju hte she re ngu kam ai zaw, Goilat hte gasat na shaloi mung Yehowa hpe kam sham ai hte gasat
dang la ai re (I Samuela 17:34-36). ‘Ngai chyawm gaw, nang hta shamyet nga nngai, Yehowa e, Nang gaw nye a Karai Kasng rai
nga ndai…nye a aten aprat na a lata hta rai nga li ai,gumlau ni the hkan shachyut ai ni a lata na ngai hpe mawai la e’ (Shakawn
Kungdawn 31:14-15) ngu nna shi a prat hta Karai hpe sha kam let asak hkrung nga ai lam tsun ai re.

(5) Madat mara ai wa re (Obedience): Yehowa Karai Kasang a ga madat mara ai lam mung Hkristan ningbaw ningla ni a laklai
ai atsam ningja re. Dawi gaw Shawlu hte n bung ai sha, Karai Kasang a ga madat mara ai hta sharawng awng ai wa re. Kawa a ga
hkungga la ra madat mara ai sha n-ga, Karai Kasang a amying ningsang hta Israela amyu ni hpe aroi ara nga atsun ai hpyen ni
hpe gasat yeng seng kau ai wa re. Bathsheba hte sex ganawn mazum shut ai mara, Uriah hpe majan hta si na matu shut ai masha
sat mara ni hpe myihtoi Nathan hku nna Yehowa Karai Kasang shadum sharin ai shaloi madat mara ai hte Yehowa kaw tawng
ban hpyi nem sit shang ai re. ‘Karai Kasang e na a chyeju hte maren ngai hpe matsan dum la e, na a n-gaw nnyeng myit kaba nga
ai hte maren, nye a mara arut kau ya e. Nye a shut hpyit ai hpe atsai awai kashin kau ya e, nye a yubak kaw na ngai hpe jaseng la
e’(Shakawn Kungdawn 51:1-3) ngu nna Karai Kasang ra ai lam hta madat mara hkan nang hkasa na matu ayan myit masin hkyen
lajang ai wa re.

(6) Akyu grai hpyi ai wa re (Prayerful) : Dawi gaw lam shagu a matu Karai Kasang hpe numbat langai tawn nna hpyi nem sit
shang ai wa re. Karai hte hku hkau kanawn mazum lam hpe akyu hpyi ai hku sit shang gaw gap ai wa re. Shut shai ai lam ni hpe
mung yin la hkam la let hpyi nem sit shang ai wa re. Shi a shakawn kungdawn ga ni yawng mung Karai a man hta hpyi nem sit
shang ai lam hku nna shakawn kungdawn ai lam ni rai wu ai.

Lahpai Awng Li (Ph.D)

MIT.

အျဗဟံ မွဣသေရလလူ မ်ိဳးေ