1

Mungga gaw lagaw a pyendin hte Hkrun lam a nhtoi

Chyum ga: Na a mungga nye a lagaw a pyendin hte, nye a hkrun lam a nhtoi rai nga ai (119:105).

Dai ni masha law law wa akyu gaw grai hpyi ai rai tim laklai ai shaman chyeju n lu la ai. Hpa
majaw nga yang, Yehowa a tara hta awng nga nna, shi a tara hpe shani shana myit mang ai lam n nga
ai sha akyu sha hpyi ai lam gaw, Karai Kasang a man hta myiman lu na n rai, shaman chyeju lu la na n
rai. Asak hkrung lam hta Karai a mungga n nga ai sha akyu hpyi ai lam gaw gaman bye bye sha rai na
ra ai. Akyu hpyi ai lam ni mung Karai sharawng awng ai hku akyu chye hpyi na n re majaw, Karai
sharawng awng ai asak hkrung lam mung lu la na n rai nga ai.

Dawi hkawhkam gaw shi prat hta myit dik ai lam lu la ai aten rai tim, myit dik lam n lu la ai
aten rai tim, awng dang ai aten hta rai tim, hkrat sum ai aten hta rai tim, hkrit tsang hpa hta rai tim,
shim lum ai aten hta rai tim Karai mungga hta maju jung ai re. Myit yawn hkyen ai aten hta mung
Karai mungga gaw shi a matu myit maju jung, n-gun la ai lam rai wu ai. Dawi gaw aten shagu hta
Karai mungga hpe myit mang ai hta pyaw ai wa rai wu ai. Pyaw ai aten, duk hka tsin yam hkrum ai
aten, yawn hkyen garen ai aten ni hta mung Karai mungga hta sha asak hkrung ai, mungga hpe
myitmang ai, Karai a tara hta a nga ai wa rai wu ai. Dai rai nna, shi a prat hta Karai mungga a majaw
myit pyaw ai lam lu la ai, myit sim sa ai lu la ai zawn, Karai Kasang hpe hkrit hkungga ai lam, tsaw ra
ai lam ni mung lu la wu ai. Dawi a prat hta shi a myit masin hkam sha lam ma hkra gaw Karai mungga
hta n pawt de myit maju jung nga ai rai wu ai. Karai mungga hpe ningdang ai ni/ n kaw n law di ai ni
hte rau nga/bungli rau galaw ai aten, myit n pyaw ai/ myi prwi si pru ra wu ai. Myit htum hpa
dingnye lam rai nga ai ngu hkam sha wu ai.

Dai ni anhte langai hkrai a asak hkrung lam mung Karai mungga hta mahta nna asak hkrung
ra ga ai. Jahpawt shagu Karai mungga chyum laika hpe hti ra ai. Karai mungga hpe tsaw ra ra ai. Karai
mungga hta tsun da ai mahkrum madup hte myit masin hkam sha lam hku myit masin hta hkam sha
chye ra ai. Dawi zawn Karai mungga hta tut nawng htinglu htinglai kanawn mazup nga ai lam gaw,
asak hkrung lam a ahkyak dik ai lam re. Karai mungga hpe hkan tam magang asak hkrung lam hta
shaman chyeju grau grau hkam la lu wa magang rai wa ai. Karai mungga chyum laika shani shagu hti
shangun ai gaw dam jaw ai lam n re. Karai Kasang shani shagu chyum mungga hti shangun ai lam
gaw, shani shagu shaman chyeju jaw mayu nna hti shangun ai re ai hpe atsawm chye na hkawn
hkrang ra ai.

Karai Kasang gaw mungga hte nga yawng dang hta hpe hpan shalat dat ai re. Dai majaw dai
Karai mungga hpe hti sumru nga ai shaloi, Karai a shaman chyeju jaw ai lam gaw anhte a asak hkrung
lam hta dik tup wa na re. Karai gaw hpan da ai lam hta nhtoi tai u ga ngu tsun ai shaloi, tsun ai hte
maren nhtoi tai wa ai re. Dai hte maren Karai mungga chyum laika hpe anhte hti ai shaloi, mungga
kaw tsun da ai hte maren anhte a asak hkrung lam hta dik tup wa na ra ai. Karai mungga gaw simsa u
nga jang anhte a asak hkrung lam hta simsa ai lam lu la wa na ra ai/awng dang na nga jang, awng
dang wa ai. Karai mungga hta tsep kawp maju jung nna asak hkrung ai shaloi mau hpa shaman
chyeju ni hkam la lu wa ai. Dawi gaw sagu rem ai prat kaw nna hkawhkam tai lu ai prat de shaman
chyeju hkam la lu ai. Mungga gaw shi a prat hta chyoi pra ai san seng ai asak hkrung lam hpe jaw ya
ai, mai kaja lam, awng dang lam, hpaji ni jaw ya ai re.

Dai ni anhte langai hkrai a prat hta mung myit dik ai lam lu la ai aten rai tim, myit dik lam n lu
la ai aten rai tim, awng dang ai aten hta rai tim, hkrat sum ai aten hta rai tim, hkrit tsang hpa hta rai
tim, shim lum ai aten hta rai tim Karai mungga hta maju jung ra ga ai. Kari mungga hpe tsaw ra ra ai,
ningshawng dat ra ai. Dai ni Karai mungga a majaw kabu gara lam lu la ai ni law law nga ai, myit
simsa lam lu la ai ni law law rai nga ai. Karai mungga hpe n madat mara ai ni, sadi n dung ai ni a
majaw shanhte a myit masin hta myit machyi lam ni, myit yawn ai lam ni, myit hki lit li ai lam ni, kaya
hkrum ai lam ni, hkrat sum ai lam ni law law hkrum nga ai re. Yehowa a tara hta awng nga nna, shi a
tara hpe shani shana myit mang ai rai yang, ningnan hpan ai atsam chyeju lu la na, chyoi pra san seng
 2

ai asak hkrung lam lu la na. Mai kaja lam hte awng dang ai lam a matu hpaji jaw ya ai lam hpe lu la na
re. Tinang a prat, dinghku a prat, nawku hpung a prat, amyu sha ni a prat ningnan ningnan re ai
chyeju hte hpring na. Shawng lam a matu mung lam shagu hta mai kaja dik ai hku hpaji jaw la, lam
madun la ai hkam la lu na ga ai law!