1

YESU HKRISTU A AP NAWNG DAW JAU AI LAI KASI

Yesu Hkristu gaw shawng ningnan sape ni hpe shaga ai shaloi “ngai kaw hkan rit, masha hpe
hkan hkwi na masha, shatai na made ai” ngu Simun yan Andre yan nau hpe tsun ai re. (MK 1:17). Dai
hpe yu ai shaloi masha hpe jet ai hte su hprang galu kaba wa nga ai sape ni tai hkra ap nawng daw jau
ra ai lam hpe madi madun nga ai re. “Nye a lam sharin la mu” (Mt. 11:29-30) ngu Yesu tsun ai lam ni
hpe yu ai shaloi yesu a kasi hpe sharin la nna, kaga masha ni a matu kasi tai let ali ama zawn mayam
zawn daw jau na matu re.

I. Jet Ai Sape Tai Na Matu Gaw Gap Ya Ai Ladat

Yesu dinghta mungkan hta sasana bungli galaw ai shaloi aten law law la nna shi a sape ni hpe,
jet ai sape kaja tai na matu sharin jahpat ai hte hkyen lajang ya ai hku nna daw jau wu ai.

A. Yesu Sape ni hpe shi hpang hkan na matu, shi a lam sharin la na matu hte shi gaw de ai Karai
Kasang a mungdan hta daw jau na matu shi nan shaga la ai re (Mt. 4:18-22; Mk.1:16-20; Lk. 5:1-11;
Yawhan 1:35-51). Dai gaw kam sham ai hte Yesu shi a ga madat mara ai hku asak hkrung na matu re.
Yesu shi nan Kawa K.K hta asak hkrung lam ma hkra hpe ap nawng ai hte K.K sharawng awng ai
lam hpe galaw gun hpai dan lai wa sai zawn, sape ni hpe mung dai hku asak hkrung na matu shaga la
ai rai nga ai.

B. Yesu gaw shi a lam hte Kawa K.K a lam hpe shawng sharin shahpat ya wu ai. Shi gaw Meshia re ai
lam, shi gaw Kawa K.K kaw na yu sa ai hte shinggyim masha ni hpe yubak ngarai kaw na hkye
hkrang la na matu re (Yawhan 3:16; 5:24) lam sharin ya ai. Yesu shi , jahpoi asawng, n ni nkri hte
wudang ntsa rai nsi hkam shi yang, shi a sape ni shi kadai re ngu ai hpe asan sha chye lu ai hte tsaw ra
kam sham wa lu hkra shawng sharin ya ai re. “nanhte mahtang ngai hpe kadai wa rai nga ai, nga nga
myit ta?” Simun Pertu “nang gaw Hkristu ngu ai a hkrung nga ai Karai Kasang a Kasha rai nga ndai”
ngu htai ai re.(Mt 16:15f) . Dai zawn san ai hte shangang shakang ya wu ai.

C. Yesu gaw shinggyim masha a sak hkrung lam ngu ai hpe ningmu ningnan hte chye mu na matu
sharin ya wu ai. “Asak gaw a shat hta, hkum hkrang gaw hpun palawng hta grau nga ma ai n rai
ni?”(Mt. 6:25). Mungkan masha ni manu shadan ai hte n htan shai ai hku Yesu tsun sharin ai hta
“Ngai hpang de sa wa mayu ai wa kadai rai ti mung, tinang a hkum hpe nyet kau lu na rai nna, shi a
wudang hpai let, ngai kaw hkan nang ru ga. Tinang a asak hpe hkye la mayu ai wa kadai mung, dai
sum mat na lu ai; nye a jaw e tinang a asak sum ai wa chyawm gaw, dai hpe mu lu na ru ai. Masha
gaw nga yawng nga pra awm dawm amyat lu la ninglen, tinang asak sum mat yang gaw, shi a matu
hpa akyu nga lu ta? Masha gaw hpa gawng malai hkungga hte wa tinang a asak hpe shaw la lu na a
ta? ( Mt. 16:24-26). Grau mayu ai wa kadai rai ti mung, nlang a hpang na wa hte, nlang a ali ama tai u
ga (Mk. 9, 35; Lk. 9:48). K.K kaw apnawng ai ngu ai gaw tsep kawp K.K hpe chyu sha kam hpa
manoi manat ai lam re ngu tsun sharin wu ai.

D. Yaw shada ai lam (sh) myit sharawng ai lam gaw tinang a tinggyeng akyu a matu sha rai yang gaw
shut ai ngu tsun sharin wu ai. K.K a mying ningsang a matu hte masha wa a akyu matu rai yang she
dai gaw mai kaja ai lam re. Mungkan lam hku woi awn ai ningbaw/la ni a myit sharawng ai lam gaw
ja gum hpraw hte ahna hte power gaw gap la ai lam re.Yesu tsun sharin ai hta teng man ai hte hkik
hkam ai ningbaw/la gaw tinggyeng shagyawm kaw nna, kaga ni a akyu a matu daw jau ai lam re.
Masha ni daw jau na hpe hkam la na matu sharawng ai wa (sh) hkam la nga ai wa n re. Rank (sh)
position hpe yu nna n masat ai. Myit masin hte myit masa arawn alai ningja hte ta tut galaw gun hpai
ai marai nsam atsam ningja hpe she yu nna ningbaw/la atsam hpe daw dan ai baw re. Ningbaw ningla
kaja ngu ai gaw jam jau hkam nna hpang hkan ai ni a akyu a matu daw jau ai wa she re. K.K a
mungdan hta kadai wa grau kaba ai ngu ai gaw myit masin a ningja hte seng ai re. K.K gaw ja
gumhpraw , arawng aya hpe n yu ai myit masin hpe she yu ai re. K.K ningbaw/la hku shatsam ai gaw
myit shagrit shanem ai hte masha wa a matu daw jau na matu she re; ngu tsun sharin wu ai.
Yesu gaw sape ni a lagaw hpe kashin ya nna, dai zawn lagaw kashin ya ai gaw ningbaw ningla kasi re
ngu madun dan wu ai (Yawhan 13:15).

II. Yesu A Woi Awn Ai Lai Kasi

1. Yesu shi hkum shi kadai re ai ngu ai hpe atsawm chye ai hte woi awn ai.
K.K shangun ai bungli hta ap nawng daw jau nga ai ngu ai hpe atsawm sha chye ai. K.K hte
shinggyim masha lapran matut ya ai mungli re. Shi a bungli madung gaw ndai mungkan K.K
 2

sharawng awng ai mungkan tai wan a matu re. SHinggyim masha yawng K.k kasha hku galai shai
wan a matu re. Shi a shingran (vision) hte galaw nga ai magam bungli hpe sape ni hte hpang hkan ai
masha ni hpe asan sha chye na hkam la shangun ai hte hpang hkan ai masha ni mung dai shingran hku
Shi hpe kam hpa ai hte ap nawng gun hpai na matu woi awn ai re. Kawa K.K galaw ai magam bung li
hpe shi galaw ai zawn, sape ni mung Shi galaw ai magam bungli hpe galaw na hku woi awn wu ai.
2. Yesu shi a yaw shada ai lam ni dik tup wa na matu sape ni hpe bungli shatsam let woi awn ai.
Yesu shi a sasana magam gun hpai ai hte rau sape 12 hpe shaga lata la nna, sharing jahpat ya ai hte
K.K a mungdan a magam bungli a matu shangun dat ai wu ai. Yesu aten law law la nna, Shi kadai re
ai ngu ai hte shi galaw ai magam bungli ni hpe sape ni hpe asan sha chye na shangun ai. K.K a shaga
la ai ngu ai hpe sape ni hpe chye na shangun ai. Sape ngu ai a lachyum hte lit ni hpe sharin ya ai. Daw
jau ai ngu ai hte Shi a woi awn ai kasi hku woi awn na matu shatsam ai. Lapu zawn hpaji rwng nna,
hkrudu zawn myit shingdi ra ai lam (Mt 10:16); Zingri zingrat hkrum na lam,sharu shatsang law law
hkrum na lam, garen gari hkrum na lam sadi jaw ai hte myit mada shara hte jahtum e teng sha awng
padang ninglaw lu na re lam ni sharing ya wu ai.
3. Yesu gaw shi galaw ai magam bungli a yaw shada ai lam de du na matu gara hpe manu madung
shatai ra ai ngu ai hpe atsawm chye ai hte woi awn ai..
Yesu shi woi awn ai a yaw shada da ai shingran (vision) hpe atsawm chye ai hte dai shingran dik tup
wan a matu woi awn ai re. Shi hpang hkan ai ni hpe K.K a up hkang ai hpe hkam la nna, tsaw ra myit
hte daw jau na matu sharin ai, Hpyen wa a hpe du hkra pyi tsaw ra ra ai ngu sharing ai. Masha a ara
hkan ai wan re ai sha, K.K sharawng awng ai lam hku tsun shaga woi awn na matu; jaw ang ai lam
hpe teng man jaw ang ai hku atsawm sawn shachyaw nna woi awn na matu;Tinang byin mayu ai hpe
kyu hpyi la nna galaw ai n re ai sha, K.K galaw gun hpai shangun mayu ai lam hpe chye lu na matu
kyu hpyi ai hte woi awn na matu;dai ni hpawt ni na lam ni hpe myit machyu ai hku nnrai, htani htana
na lam hpe ahkyak shatai na matu; kaga ni hpe mara n shagun shi yang tinang hkum hpe shawn
dinglik jeyang yu na matu;K.K a ga madat ai hta npawt kridun tawn let woi awn chye na matu sharing
yaw u ai.
4. Yesu gaw shinggyim masha ni nga ai shara de nna (grau nna ra kadawn ai ni) shanhte hpe K.K a
kasha tai na matu woi awn ai.
Sumsing tingnyang tawn kau da nna shinggyim masha ni hpang de saw a ai wa re.Ra kadawn
ai ni kaw sa nna, myit mada shara n nga sai shinggyim masha ni hpe K.K a shangun ma hku myit
mada shag aw gap ya ai re. Palistina mung shara shagu sasana galaw ai aten hta masha hpan law law
hte hkrum ai. Shawa masha ni hpe tsaw ra matsan dum ai hte hkrum shaga ai, Sape ni hpe challenge
galaw ai lam ni hte shangang shakang ya ai hku nna sharing achyin ya ai. Rai tim , n jaw ai hku woi
awn nga ai makam masham ningbaw ningla ni hpe asung arung ngu daru sharing wu ai.
5. Yesu gaw myit masin dinghpring ai, tsaw ra myit hte shagu hkungga hkum zawn tai let woi awn ai
re.
Shi a mungdan hte dinghpring ai lam shawng tam nna hkang da ai. K.K hte shinggyim masha
hpe tsaw ra ai myit hte daw jau ai.Ahkrung nga ai hkungga zawn asak hkrung let woi awn ai re.
6. Mara raw dat ya ai hte woi awn ai..
Hpu nau wa shut ai mara hpe sanit shi e htam sanit lang du hkra mara raw kau ya ra ai ngu sharing ai
re (Mt 18:21-22).
7. Yesu shi woi awn ai masha ni a ntsa matsan dum ai myit hte woi awn ai.Lazaru si ai shaloi hkrap
ai (Hawhan 11:35). Yerusalem mare hpe yu nna hkrap ai (Lk. 19:41-44).
8. Shinggyim masha ni a ra kadawn ai lam ni hpe atsawm sha chye na ai hte, K.K a ra ahkyak
madung ni hpe tsun dan ai hte woi awn ai.
9. Yesu gaw grai yak hkak ai lam ni hpe asak dan kau nna ap nawng let woi awn ai.
Hkinjawng ni, hparishe ni, saduke ni, mung up du gyi salang ni a jahkrit shama, zingri zingrat ai
lapran hta shi yaw shada ai lam dik tup wan a matu tsin yam hkam sha ai hte woi awn ai re.
10. Yesu gaw K.K a yaw shada ai lam hte shai ai, tara ni hpe gwi gwi tawt lai nna, masha yawng shi
kaw sit sa lu na hku woi awn ai re.
Samari ni hte rau hkrum shaga ai, Mang gang kap ai ni, yubak mara lu ai ngu ai ni hte rau kanawn
mazum let, K.K mungdan a lam hpe hkaw tsun ai hku woi awn ai re. Ma ni du hkra Shi kaw sit sa mai
ai.
11. Yesu gaw hkring sa ai aten la ai hte woi awn ai re.
Shani shagu machyi masha ni hte shi hp era kadawn nna garum hpyi nga ai ni law law nga tim, shawa
masha kaw nah ka ai hte hkringsa la ai aten la ai re. Sape ni hpe mung dai hku sharing ai re (Mk. 6:31-
32). Dai gaw grau grau kaba ai amu bungli matut galaw lu na matu n gun awai la ai lam re.
12. Yesu gaw atsawm sha aten la nna plan galaw ai hte woi awn ai.
 3

Tsa dan gunglau hkam ai lam, sape ni hpe sharing ya ai lam hkrak galaw nna she, wudang
ntsa si hkam ai hte bai hkrung raw tai re.
Wahpang langchyi gaw mayu yang, dai ngut ram hkra gumhpraw law n law shawng sawn yu
ra ai.hkaw hkam langai mi kaga hkawhkam hpe gasat na maw yang, shawng hkyen lajang ra ai lam ga
shadawn ni hte sharing ai re (Lk. 14:28-31).
13. Yesu gaw tut nawng akyu hpyi ai hte woi awn ai.
Hkalup hkam la ngut ai hte nhtoi 40 ya shat gam akyu hpyi ai. Shawa masha kaw na hka nna
kyu hpyi n gut atsam la ai. Tsan lun bum kaw kyu hpyi ai.(Lk. 6:12). Lama ma hpe daw dan na rai
yang mung grai tin ai hku, myit n galu ai hku n daw dan ai. Atsawm aten la akyu hpyi nna she daw
dan ai re (Lk. 6:12-16).
14. Yesu gaw kaja ai hku myit chye ai myit jasat hte woi awn ai.
Hpyen ni hpe kaja ai myit hte tsaw ra ai, mara raw dat ya na matu K.K kaw hpyi nem ai .
Shinggyim masha ni n kaja ai ngu mu ai lam law law hpe mai kaja ai myit hte yu mada chye ai wa re.
15. Yesu gaw yawng a ntsa Wenyi n’gun atsam jaw ai hte woi awn ai.
Shi a tsun shaga ai lam hte galaw gum hpai ai amu bungli ni hku nna, hpang hkan masha ni
hpe wenyi n’gun atsam lu la shangun ai wa re.
16. Yesu gaw masha ni myit shang sha na zawn re ai arawn nsam/ ga shadawn ni hte tsun shaga let
woi awn ai.
Shi a ga madat la nga ai ni, shi a ga hpe myit shang sha hkra tsun shaga chye ai wa re. Shi
hpang de ganawng sa wa mayu ai, shi tsun ai ga ni hpe tut nawng madat la mayu ai, lu sha hte
mungkan a magam bungli yawng hpe malap kau da hkra sa madat la mayu ai, lam nib yin hkramyit
gang lu ai wa re.
17. Yesu gaw shi woi awn ai masha ni hpe gara de woi awn nga ai ngu ai shingran asan sha nga nga
chyalu re. Dai gaw – K.K a mungdan re.
18. Yesu gaw kadai hpe mung ahna hte shagyeng ai lam n galaw ai. Yesu a ga na nna, sape ni tinang
hkum tinang myit yu nna, tengman jaw ang ai hpe lata la nna, hkan sa asak hkrung wa ai sharin ladat
hte woi awn ai.
(1)Lak nak hte n rai kam sham ai, tsaw ra ai, myit mada ai lam hte (2) gumlang ninghkap ai hku n rai,
mai kaja ai bungli hte hpyen wa, n ju n dawng ai wa hpe dang la na hku (3) hkrit ai myit hte n rai,
tsaw ra myit hte asak hkrung na hku (4) masha a ara hkan ai hku n rai, teng man lam hpe shan hte
chye nna asak hkrung na hku (5) masu magaw, hkalem hkalau ai ga ni hte n rai, ga shadawn ni hte
myit masin hta hkawn hkrang wa ai hte asak hkrung na hku woi awn ai re.
19. Yesu gaw sape ni hte hpang hkan masha ni hpe jahkrit shama ai ladat hte n rai manang zawn, woi
awn ai hte shanhte a myit masin hpe gang la ai ladat hte woi awn ai.
Sape ni hkam la na akyu ni hpe atsawm manang zawn tsun dan nna, shi tsun ai ga hta kam hpa let
hkan nang na myit masin pru wa hkra woi awn wu ai (Lk. 18:26-30).
20. Yesu gaw Shi a sasana magam bungli awng dang na matu shi a myit masa arawn alai shingni ni
hpe n jahten kau ai sha woi awn ai.
Tsa dan gunglau ai arawng aya, sut gan arung arai, ahkaw ahkang position ni a matu shi a myit masa
arawng alai n jahten kau ai sha woi awn ai re.
21. Yesu Shi Kawa K.K kaw na lu la ai ngwi pyaw simsa lam hpe sape ni hte hpang hkan masha ni
hkam la lu hkra shakut let woi awn ai .
22. Mungkan hta hkrum hkra ai myitru myit yak lam, myit tsang lam, yawn hkyen lam, jam jau jam
hkau lam ni yawng a matu htani htana ngang grin ai ngwi pyaw lam lu la na mahtai hkam la lu hkra
woi awn ai . (Lk. 4:40-44, 9:37-43).Jahkring jahkra myit pyaw lam hpe gaw gap ya ai wa n re.
23. Hpang hkan ai ni K.K a mungdan hpe mu mada madu shang lu na matu, asan sha hte aloi sha
chye na lu hkra lam madun nna woi awn ai . (Lk. 5:1, 8:4-15, 13:22-30).
24. Shi a hpang hkan ai ni myit mu myit hkut hte shi hpe kam sham let, hkan nang hkra, shi kadai re
ngu ai hte shi galaw ai bungli a lam atsawm tsun dan, madun dan ai (Lk. 6:20-49).
25. Tinang hkrai atsam dat nna power gaw gap la ai hpe koi gam ai. K.K jaw ya ai power hta machyu
let woi awn ai (Lk. 3:22; Kasa 10:38).
26. Yak hkak kyin dut hkrum tim, myit daw myit hten lam hkrum tim, hkrit tsang ra ai lam hkrum tim,
zingri zingrat hkrum tim, galoi myit n daw ai sha K.K hpe kam hpa manoi manat ai hte ap nawng ai
hte woi awn ai re. (Lk. 2:45-51).
27. Sape ni langai hkrai hpe, atsam hta hkan nna shatsam ai lam, yu lahku ai lam galaw ai hte woi
awn ai re.
28. Aten masa hpe jaw ang ai hku chye maram ai hte woi awn ai re. Koi ra ai aten koi ai, hkringsa la
ra ai aten hkring sa ai,du daw sai hkaw ap nawng ra ai aten ap nawng ai.
 4

29. Tinang a arawng sadang, mying dan hkung lam hpe galoi n gaw gap ai sha, K.K a amying
ningsang, hpung shingkang a matu ap nawng let woi awn ai re.
30. Up hkang ai du gyi salang ni hte mung masa ladat; sut su ai ni hte sut masa ladat; ni n lang ai.
Sumsing mung dan hte de a manu ngu ai tsaw ra myit, ngwi pyaw sim sa lam, tara rap ra lam ngu ai
lam yan hte asan sha sasana bungli galaw ai re.
31. Yesu gaw hkum dingdek hte wuhpawng galai shai wa hkra woi awn ai re.

III. HKye Shalawt Dat Ai Masa Hpe Jai Lang Let daw Jau Ai
Yesu a shalawt dat ai masa hpe jai lang let, W.P sha ni a shalawt dat ai hte seng ai Karai masa hpe gin
shalat la ra ga ai. Yesu a ladat gaw (1) Jep ai tara hta mahta nna wuhpawng hpe gaw gap ai masa kaw
na, Karai Kasang a mungdan hte Karai Kasang a up hkang ai lam (the reign of God) hta mahta nna
gaw gap ai Yuda wuhpawng shatai kau dat ai ladat re; (2) Yubak lu ai ni hte ding hpring ai ni ngu
Yuda wuhpawng hta sawn la hkrum ai ni yawng hpe Karai Kasang a up hkang ai lam hpe hkam la
shangun nna, lak lai galai shai ai sak hkrung lam de galai shai ya ai re. Dai hku nna, Karai Kasang a
hkye hkrang la ai mahkrum madup namchyim hpe hkam la lu shangun ai ladat re; (3) wuhpung
wuhpawng ni a hkrang tara masa ni yawng mung Karai Kasang a mungdan a kasi hte maren tsaw ra
ai, tara rap ra ai, ngwi pyaw sim sa ai ngu ai lam masa ni hte gaw gap mat wa shangun ai, ladat rai nga
ai. Dai hku nna, Yesu gaw shinggyim masha langai hkrai hpe galai shai wa shangun ai zawn (personal
transformation); wuhpung wuhpawng hpe mung galai shai mat wa shangun mat wa ai re (social
transformation). Yesu gaw shinggyim masha langai hkrai hpe yubak ngarai kaw na hkye shalawt la
nga ai sha n’ga; shinggyim masha shada da lapran nhkru nshawp ai hku maw mawn ai majaw byin
pru wa ai lam ni (matsan jam jau ai, dip sha roi sha ai, n tara n rap ra ai, tsaw ra myit hte ngwi pyaw
simsa lam nnga ai, shinggyim masha a sari sadang n lu la mat ai, etc.) yawng kaw na mung hkye
shalawt la nga ai re.

Ginlen Shalai Ai,

Lahpai Awng Li
Professor & Director of Judson Research Center
MIT, Insein.