pagmamay ari ng pamilya Garcia. Nakapanayam ko si lola Lolita Biguas, siya ay animnaput anim (66) na taong gulang. Sabi ni nanay, ang bahay ay itinayo taong 1952. Ito ay itinayo ng kanilang magulang bago palang sila ipinanganak kaya si lola at ang kanyang anim (6) na kapatid ay dito na din isinilang at sabay sabay nang lumaki. Araw- araw makikita at maririnig mo sa bahay na ito ang tawanan at kwentuhan ng buong pamilya. Ibinahagi ni lola ang masasayang karanasan at ala-ala nila kasama ang kanyang mga kapatid at magulang sa bahay na ito. Tuwing hapon, noong sila’y bata pa, ang magkakapatid ay palaging gumagawi sa harap ng kanilang bahay upang maglaro ng patintero at habulan. Pagsapit ng ikalima ng hapon, makikitang papasok sa bakuran ang kanilang ama na galing sa trabaho at maririnig na din nila ang tawag ng kanilang ina upang utusan na silang maglinis ng kanilang mga katawan at para sabay na ring kumain. Ang mag-anak ay masayang-masaya at simpleng namumuhay ng payapa. Sabi ni lola Lolita, sila ay kontento at masaya na noon kung ano ang meron sila at kung ano ang nakahain sa kanilang hapag-kainan. Nabanggit din ni lola na dito nila inalagaan ang kanilang ama at ina noong sila’y nag kasakit at sa kasawiang palad, sila ay dito na din namalaam. Pagsapit ng edad dalawaput- apat (24) ni lola Lolita, siya ay nakapag asawa at lumipat na din ng tirahan, gayundin ang kanyang anim (6) na kapatid. Kasalukuyang naninirahan rito ang kanilang panganay na kapatid na si lolo Wilfredo Garcia, 70 taong gulang kasama ang kaniyang asawa na si lola Salome Garcia at isang anak na si Joseph Garcia na 38 taong gulang na. Kaya patuloy pa din na nalalagyan ang bahay na ito ng ibat ibang ala-ala. Kwento ni lola Lolita, saksi ang bahay na ito sa mga ibat ibang uri ng kalamidad tulad ng bagyo at lindol kaya makikita natin sa litrato na ito ay sobrang luma na at malapit ng masira. Dahil na din sa kalumaan, ito’y rumurupok at inaanay na. Nabanggit din ni lola na ang kanilang dating bahay ay isa sa mga matagal ng nakatayo sa kanilang barangay dahil ang iba ay naayos at napaganda na. Minsan, nagkakaroon ng pagkakataong nag kikita-kita ang pitong magkakapatid upang dito matulog. Sila ay sobrang saya tuwing pinagmamasdan nila ang kanilang dating bahay. Hindi malilimutan ng magkakapatid ang lahat ng ala-ala ng kanilang pamilya kasama ang lumang bahay na ito. Kanila daw itong pangangalagaan at mamahalin hanggang silay nabubuhay pa.