O Mahal na Birhen ng Santo Rosaryo, alang-alang sa pagpapakita mo sa
Fatima kami’y buong pamimintuho at pagmamahal na dumudulog at nagbibigay-dangal sa iyo. Noong ikaw ay nasa lupa, lubusan kang nakikiisa kay Hesus sa pagtubos sa sangkatauhan. Ngayong nariyan ka sa langit, taglay ang katawan at kaluluwa, sa maluwalhating luklukan ng iyong pagka-Reyna, patuloy ka pa ring kaisa ni Hesus na walang tigil na namamagitan sa kapakanan naming iyong mga anak na makasalanan. Kung kaya’t pumaroon ka sa Fatima, upang bigyan kami ng babala, para maiadya kami sa kapahamakang naka-amba. Narito kami ngayon, O butihing Ina, na tumutugon sa iyong babala at kami’y taimtim na dumadalangin, buong katotohanang nagbabalik-loob, nagbabayad-puri sa napakabuting Ama sa langit, at nagpapakasakit dahil sa karumal-dumal na mga pagkakasala ng sanlibutan. Ipadama mo sa amin ang iyong pagmamahal upang kami’y mapuspos ng maalab na pag-ibig sa Diyos at kami’y maging mulat at gising, na sa katauhan ng aming kapwa, lalo na’t sa aba at kapus-palad, ay aming makita, tanggapin, igalang at mahalin si Kristo. Pawiin mo sa amin ang kasakiman, ang kamandag ng pagkamakasarili at pag-iimbot, ng pagsasamantala at pang-aapi. Ikintal mo sa aming puso ang hinahon, ang pagtitimpi at kababaan ng loob, upang tulad mo, maihasik namin sa lahat ang kapayapaan, ang katarungan, pagmamalasakitan, at pagmamahalan. Tanglawan mo kami ng liwanag ng pananampalataya upang sa lahat ng bagay ang hanapin lamang namin ay ang lalong ikaluluwalhati ng Diyos at ang ikauunlad ng aming sarili, ng aming kapwa at ng sambayanan. Loobin mo sanang maisabuhay namin ang Salita ng Diyos at sa aming tunay na ugali at kilos, maipamalas namin ang aral at halimbawa ni Kristo. Itulot mong maipahayag namin sa aming kapaligiran ang Magandang Balita ng Kaligtasan upang tunay na magkaroon ng Kristiyanong Kapatiran. Inang Birhen ng Fatima, alisin mo sa aming mga mag-anak at sa lahat ng mag-anak ang pagkakawatak-watak. Pag-isahin mo kami sa pagkakasundu-sundo at sa pag-ibig sa kabanalan. Iligtas mo kami sa kapahamakan at lalung-lalo na, igawad mo sa amin ang tanging biyayang kailangang-kailangan namin ngayon. (Banggitin ang mga natatanging kahilingan) O Mahal na Birhen ng Fatima, dinggin mo nang buong giliw ang aming taimtim na dalangin. Ama naming makapangyarihan, ipagkaloob mong kami’y magkamit kailanman ng kalusugan at kagalingan sa aming katawan at kalooban. Pakundangan sa pagdalangin ng laging Birheng si Santa Mariang mahal kami nawa’y mahango sa hapis sa kasalukuyan sa pamamagitan ni Hesukristo kasama ng Espiritu Santo magpasawalang hanggan. Amen.