Si Henri René Albert Guy de Maupassant o mas kilala bilang Guy de
Maupassant ay isang kilala at tanyag na manunulat na Pranses. Bilang isang manunulat, maraming akda na ang kaniyang nailimbag at kabilang na dito ang isa sa pinakatanyag niyang likha - ang maikling kwento na pinamagatang “Ang Kwintas”. Masasabing ito ay sumasalamin sa kultura at katangian ng mga taga-Pransya. Ang kwentong “Ang Kwintas” ni Maupassant ay patungkol sa kwento ng mag- asawang nagnais na dumalo sa isang selebrasyon, at dahil sa kagustuhan ng babaeng asawa na hindi mapahiya sa pagtitipon at makasabay sa mga taong naroroon ay naghangad ito na humiram ng mga kagamitang mamahalin sa kaniyang kaibigan – isa na nga rito ang mukhang mamahaling kwintas. Sa kalagitnaan ng pagsasaya, hindi nito napansin na nawawala na sa kaniyang leegan ang kwintas, hinanap niya ito paroo’t- parito, subalit hindi na natagpuan pa. Sa kagustuhan mapalitan ang alahas na hiniram, ginugol ng mag-asawa ang sampung taon ng kanilang buhay upang magtrabaho nang sa gayon ay mabayaran ito nang sapat. Laking gulat at dismaya ng mag-asawa nang malamang ang kwintas na ipinahiram sa kanila ay isang imitasyon at peke lamang, kung saan nabili lamang ito ng kanilang kaibigan sa murang halaga. Sa kabuuan ng bawat pahayag sa kwento, masasabing pinag-isipan nang maigi ang mga ito, kung saan maihahalintulad ito sa mga pangyayari sa totoong buhay na may mga taong mula noon hanggang sa kasalukuyan ang nagmamalabis, at hindi nakukuntento sa mga bagay na mayroon na sila. Halimbawa na lamang nito ay ang mga pulitiko lalo sa kasalukuyan kung saan ginagamit nila ang pera o kaban ng bayan upang bumango ang kanilang mga pangalan; sukdulang gumastos sila ng ilang milyon upang magmukhang marami silang natutulungan, subalit ang tulong na iyon ay peke lamang at nanggaling din sa bulsa ng mamamayan. Ang pangunahing ideya at punto ng akdang ito ay ang hindi pagiging kuntento ng tao sa kung ano ang mayroon sila at hindi pagharap sa karamihan ng tunay na pagkatao nila. Ang akdang ito ay naglalayon na maiparating sa kaniyang mga mambabasa na nararapat tayong matutong makuntento at maging masaya sa kung ano ang mayroon tayo. Gayundin, nais nitong ipahayag na dapat na maging tapat tayo at umamin sakali mang tayo nakagagawa ng pagkakasala.