alay ng ilang linya mula sa awiting pinamagatang “Anak” na isinulat ni Fredie Aguilar. Ikaw nga ay biglang nagbago, Naging matigas ang iyong ulo, At ang payo nila’y sinuway mo.
At ang una mong nilapitan,
Ang iyong inang lumuluha, At ang tanong, “Anak, ba’t ka nagkaganyan?” Ana, bat ka nagkaganyan? Ang dating paslit na naglalaro lamang ng tumbang preso, ngayon ay isa ng batang nagpapasuso. Ang dating estudyanteng libro at panulat ang dala-dala, ngayon ay lampin at gatas na. At ito naman si Juan, sa murang edad ay nagbabanat na ng buto, imbis na nasa paaralan para sa kaniyang pagkatuto. Ilang Ana at Juan pa ba ang mabibitag ng patibong na ito? Isa, dalawa, tatlo, libo-libong mga bilang ng mga kabataan na dating bata lamang, ngayon ay may bata ng inaalagaan. Batay sa inilabas na datos ng National Demographic and Health Survey noong nakaraang taon, mahigit kumulang na limang libo’t siyam na raang mga kabataan na nasa edad labing lima hanggang labing siyam ang naitalang buntis. Hindi ba’t ito’y nakaka-alarma? Ang itinuturing na “PAG-ASA NG BAYAN” ay tila ba isang ibong walang direksyon at tila nawawalan na ng katanyagan. Katibayan, na ang isyu ng maagang pagbubuntis sa Pilipinas ay tila ba isang epidemya na patuloy na kumakalat at magpasa hanggang ngayon ay wala pa ring lunas. KAMANGMANGAN, kakulangan sa kaalaman at tamang pagtuturo hinggil sa usaping ito ang maituturing na dahilan ng patuloy na pagtaas ng kaso ng maagang pagbubuntis sa ating bansa. Ayon kay Chairperson Senate Committee on Basic Education, Win Gatchalian, “Mahalaga ang papel ng mga paaralan upang maturuan ang mga batang kababaihan laban sa mga panganib ng maagang pagbubuntis. Aniya, kailangang tiyakin na may akma at wastong edukasyon ang mga batang kababaihan upang mapangalagaan nila ang kanilang kalusugan at magandang kinabukasan,”. At ito ang Comprehensive Sexuality Education (CSE) sa ilalim ng DepEd Order Nos. 31 series of 2018. Ito ang magiging gabay at susi tungo sa pagkakaunawa ng mga kabataan sa kanilang sariling katawan, tamang pananaw sa kanilang damdamin, at kakayahang magpasya nang may kaalaman at responsableng pagkilos. Sa kabilang banda ang CSE ay dinisenyo hindi lamang para sa mga babae at lalaki, kundi para sa lahat ng kasarian. Sa pamamagitan ng CSE, mas magiging bukas ang kaisipan ng mga kabataan ukol sa kung sino at ano ang kanilang pagkatao at sekswalidad na makatutulong ng malaki upang maiwasan ang lumalaganap na karahasan at diskriminasyon ng kasarian sa ating lipunan. Hindi ang ari na namamagitan sa ating hita ang magdidikta ng ating kakayahan. Lalaki, babae, bakla, tomboy, anuman ang iyong kasarian, IKAW AY INSTRUMENTO NG MAUNLAD NA LIPUNAN. Nararapat lamang na ang ating kaisipan ay maging bukas at malawak, sapagkat hindi natin makakamit ang makabuluhang pagbabago kung tayo ay mananatiling nakakulong sa mga konserbatibong paniniwala na pinanday ng nakaraan at masasabing hindi na angkop sa kasalukuyan. Halina’t sama-sama tayong bumuo ng isang lipunang puno ng pag-asa at magandang kinabukasan. Kaya’t GISING KABATAAN ! Ako si KEITH JEWEL AGBAYANI, mula sa Bongabon National High School, isang BABAE AT HINDI BABAE LANG, MARAMING SALAMAT PO!