Metodat hulumtuese (kërkimore) cilësore bazohen në analizën e të
dhënave nga vëzhgimet dhe fjalët e thëna ( Wimmer, Dominick). Çfarë nëkupton hulumtimi cilësor? Problemi që shtrohet që në fillim është vetë termi “cilësor”. Ende nuk ka një përcaktim të qartë (definicion) për cilësor dhe disa studiues refuzojnë të definojnë termin me arsyetimin se kjo do të kufizonte teknikat në procesin e kërkimit shkencor. Sidoqoftë, fjala cilësor, në kërkimin shkencor i referohet: 1.Një filozofie të gjerë dhe qasjeje në kërkim 2.Metodologjisë së kërkimit 3.teknikave të kërkimit. Lidhur me metodat hulumtuese cilësore ekzistojnë disa qasje: -pozitiviste, -interpretative (shpjeguese), -kritike. Këto qasje dallohen nga njëra tjetra, por e përbashkëta është se fokusohen te hulumtime në aspektin cilësor dhe kjo nënkupton se nga kundërshtarët kritikohen sidomos për numrin e vogël të respodentëve (mostra të vogla). Por, mostrat e vogla mund të rriten dhe kjo dëshmon se metodat e hulumtimit cilësor do të bëhen të krahasueshme me ato sasiore. Dallimi kryesor, sipas studiuesve, nuk është te mostrat e vogla, por te mënyra se si bëhen pyetjet. Hulumtimi cilësor përdorë qasje fleksibël gjatë parashtrimit të pyetjeve. Edhe pse paraprakisht përgatitet një listë me pyetje bazike që i bëhen çdo respodenti, prapëseprarë gjatë procesit të intervistimit mund të ketë nënpyetje dhe pyetje të reja që shtohen. Pra, realizimi i intervistave për kërkimin cilësor, është i ngjashëm me procesin e intervistimit në gazetari! Procesi i mbledhjes së të dhënave fillon që fazën e parë të hulumtimit dhe në forma të ndryshme. Që nga shënimet që studiuesi mban gjatë bisedave të para me palë të ndryshme, vëzhgimet vetanake në terren, transkriptet e intervistave, dokumentet, ditarët, shkrime të ndryshme në media etj., të gjitha bëhen pjesë e bazës së të dhënave që do të përdoret në fazat e mëvonshme të përpunimit të të dhënave. Për të lehtësuar punën me shumësinë e të dhënave që mblidhen gjatë analizave cilësore, studiuesit i organizojnë ato duke i klasifikuar fillimisht bazuar në elementin kohë. Kjo dmth që të dhënat që mblidhen klasifikohen sipas muajve, apo viteve kur janë mbledhur apo kur janë dhënë deklaratat që mund të përdoren si të dhëna për hulumtimin. Renditja kronologjike duhet të përfshijë edhe burimin e të dhënave, ashtu si edhe kopje të çdo të dhëne (fotokopje të intervistave, screen shot të dokumenteve etj.). Pra, duhet ndërmarrë të gjitha veprimet e nevojshme që gjithçka të jetë e dokumentuar dhe të mbetet e tillë. Renditja kronologjike mund të mos jetë elementi i vetëm mbi të cilin bazohet kategorizimi i të dhënave. Studiuesit e ndryshëm mund të përdorin teknika të ndryshme. Përzgjedhja e teknikave për kategorizimin, apo sistemimin e të dhënave, varet nga objekti i hulumtimit, nga metoda që përdorni për hulumtim apo edhe nga manyra që përdor studiuesi përkatës. P.sh. në një kërkim cilësor për programet radiofonike për fëmijët, të dhënat e mbledhura nuk është e thënë që të sistemohen sipas renditjes kronologjike. Studiuesi mund të vendos që të dhënat t’i organizojë bazuar në kategoritë e përgjigjeve që ka siguruar nga grupi i intervistave me autorë të programeve të tilla dhe nga prindër të fëmijëve, që ndjekin programet e tilla. Diskutime me studentë: -Përcaktojmë tema që mund të jenë objekt i hulumtimeve cilësore dhe diskutojmë mënyrat e përshtatshme për organizimin e të dhënave që mblidhen gjatë procesit të kërkimit (hulumtimit); -Diskutojmë për organizimin e të dhënave dhe procesin e përpunimit të tyre, në rastet kur kërkimi bëhet jo nga një, por nga disa studiues (grup kërkimor); përdorimi i qasjes “analytical wallpaper” si mundësi për diskutimin dhe thjeshtëzimin e të dhënave për disa anëtarë të grupit kërkimor. Besueshmëria dhe vlefshmëria e të dhënave Gjagtë hulumtimit cilësor, studiuesit duhet të kenë kujdes ndaj shqetësimeve që lidhen me besueshmërinë dhe me vlefshmërinë e të dhënave dhe rezultateve nga kërkimet e tyre. Çështje të diskutueshme në këtë proces janë: -plotësia e të dhënave- Nëse studiuesi për shembull vetëm mban shënime gjatë intervistave, por nuk i ka të plota ato të incizuara apo nuk ka përgjigje me shkrim, atëherë ekziston mundësia që ai të bëjë interpretime të gabuara. Kjo ndodh sepse është e pamundur që të mbahen mend të gjitha deklarimet e të intervistuarve! -perceptimi selektiv- Ky është shqetësim dhe problem që del gjatë kërkimeve cilësore dhe që lidhet me objektivitetin e studiuesit. Gjatë procesit të kërkimit mund të ketë edhe deklarata apo të dhëna të cilat janë në kundërshtim me këndvështrimin e studiuesit. Njësoj si në raportet gazetareske, edhe në hulumtimin shkencor, këto të dhëna duhet të analizohen dhe për to të ofrohen sqarime. -reaktiviteti-kur akti i vëzhgimit e ndryshon situatën e vëzhguar. Çështja që shtrohet në disa raste të kërkimeve është: a do të ndodhnin të njëjtat gjëra sikur studiuesi të mos ishte present? Reaktiviteti është problem që tejkalohet vështirë por, studiuesit duhet të provojnë ta minimizojnë sa të jetë e mundur. Të tre këto faktorë dëshmojnë se studiuesit në kërkimet cilësore, njësoj si edhe ata në kërkimet sasiore, duhet të kenë kujdes të veçantë për besueshmërinë dhe për vlefshmërinë e të dhënave të tyre. Përderisa në kërkimet sasiore gjithçka është e matshme, në hulumtimet cilësore, besueshmëria dhe vlefshmëria, sigurohen përmes disa faktorëve: -përdorimi i disa metodave njëkohësisht në mbledhjen e të dhënave – p.sh. në një kërkim cilësor për pozitën e gazetarëve nëpër kompanitë mediatike, mund të përdorni intervistat dhe vëzhgimin personal. -ofrimi i të dhënave të mbledhura për të tjerët – studiuesit tjerë do të kenë në dispozicion të dhënat origjinale, që ju keni përdorur për hulumtimin tuaj. -kontrolli i të dhënave – në këtë teknikë pjesëmarrësve në hulumtim iu kërkohet që të lexojnë shënimet dhe konkluzionet tuaja dhe të thonë nëse ju i keni përshkruar me saktësi deklarimet e tyre. -ekipet e kërkimit – kjo nënkupton që pjesëtarët e ekipit kërkimor janë të ndershëm në raport me interpretimet e njëri tjetrit. Në disa raste kërkohet që persona të tjerë (vëzhgues të jashtëm) të monitorojnë procesin kërimor dhe prej tyre kërkohet që të ngrisin çështje rreth anshmërive eventuale apo keqinterpretimeve të të dhënave.