TIPID TUBIG SA BAGUIO

Si Michael ay isang estudyante sa isang kolehiyo sa

Baguio City. Siya ay nakatira sa isang panlalaking
dormitoryo. Sa unang araw ng summer class, gumising
siya para maligo. Laking gulat niya na walang tubig na
lumabas sa gripo. Buti na lang, siya ay may tubig na
pang-inom at iyon ang kanyang ginamit sa panghilamos
at pangsipilyo. Nagtanong siya sa administrasyon ng
dormitoryo. Sinabi sa kanya na hindi sapat ang supply ng
tubig sa Baguio kapag tag-init o summer dahil maraming
turista. Sa ganitong pagkakataon ang tanging solusyon
ay pagkakaroon ng schedule kung kailan magkakaroon ng
tubig ang bawat lugar, kaya sa gabi lamang nagkakaroon
ng tubig sa dormitoryo.
Dahil sa pangyayaring ito, naisip ni Michael na
dapat siyang gumawa ng paraan para makatipid sa
paggamit ng tubig. Ginawa niya na iklian ang oras ng
kanyang pagligo ng isa o dalawang minuto para
makatipid ng tubig. Pinapatay na niya ang shower habang
siya ang nagsha-shampoo ng buhok at nagsasabon ng
katawan. Habang naliligo naglalagay din siya ng timba o
palanggana malapit sa tapat ng shower head upang ang
nakolektang tubig ay maaring gamitin para pang flush ng
toilet. Isinasara na rin niya ang gripo habang nagsisipilyo
para makatipid din. Higit sa lahat sinasara niya ang gripo
ng mahigpit matapos itong gamitin.
Nahirapan siya sa una ngunit nasanay din siya.
Ibinahagi nya ito sa kanyang mga kasamahan sa
dormitoryo nang sa gayon sila ay makatulong sa
pagtitipid ng tubig. Ito ang kanilang paraan upang
makatipid at may magamit sa oras ng pangangailangan.