Rainier E.

Mendoza PI 100
2013 – 38229 Prop. Rolando Dela Cruz

Ang solusyon sa kabiguan ng Batas Rizal (RA 1425)

Mahigit anim na dekada na ang nakalilipas mula ng ipatupad ang RA 1425 o Batas
Rizal na naglalayong mas mapaigting ang diwang makabayan lalong lao na sa mga kabataang
nasa kolehiyo at high school sa pamamagitan ng pagtuturo ng mga akda at sa naging buhay
ng ating pambansang bayani na si Dr. Jose Rizal. Kung ating sususuriin ang kasalukuyang
kalagayan ng ating bansa at ang lahat ng naganap sa ating kasaysayan sa nakalipas na
kalahating siglo mahihinuha natin na tila hindi naging matagumpay ang Batas Rizal sa
pangunahing layunin nito kaya’t napapanahon na upang ito ay amyendahan upang mas
mapalawak pa ang pagtalakay sa usapin ng nasyonalismo at pagiging makabayan.

Ayon sa Batas Rizal, mahalagang maituro sa kabataan ang mga akda ni Rizal lalong
lalo na ang Noli Me Tangere at El Filibusterismo sapagkat ang mga nobelang ito ay
pinaniniwalaang may kakayahang bumuhay ng diwang makabayan sa sinumang Pilipino na
makakabasa nito. Patunay na rin siguro dito ang naging malaking papel ng mga akdang ito
sa paghikayat sa ating mga bayani upang labanan ang malupit na pamamahala ng mga
Espanyol noon. Dahil dito, isinaad ng batas na ito na dapat ay magkaroon ng sapat na kopya
ng mga aklat na ito sa mga paaralan, pampublikong aklatan at maging sa mga bulwagan ng
baranggay sa buong bansa. Ngunit kung tayo ay magtutungo sa mga lugar na nabanggit,
makikita natin na hindi talaga nasusunod ang bahaging ito ng Batas Rizal. Nakakalungkot
mang isipin na marami pa ring mga Pilipino ang kailanman ay hindi pa nababasa ang mga
akdang ito at mas nakakalungkot na tila binabale-wala lamang ito ng mga lokal na
pamahalaan.

Pagdating naman sa pagtuturo ng mga ito sa high school at kolehiyo, masasabi ko rin
na hindi talaga nagagawa ng nakararaming maisapuso ang mga ideyolohiyang ibinabahagi ng
mga akdang ito dahil sa na mismo sa klase ng edukasyon na ibinibigay sa bansa. Ang sistema
ng edukasyon na umiiral sa ating bansa ay nakasentro sa paghubog sa mga mamayan upang
maging mga mahusay na manggagawa. Hindi gaanong napapahalagahan ang paglinang sa
kakayahan na mag isip ng kritikal. Mas binibigyang pansin ang pag aaral ng agham,
matematika at ng wikang Ingles habang isinasantabi ang mga aralin ukol sa Filipino,
kasaysayan at iba pang mga araling panlipunan. Nakatatak na sa nakararami na ang mga
asignaturang nabanggit ay mga “minor” subjects lamang kung kaya’t hindi sila naglalaan ng
karampatang pagpapahalaga ditto na katulad sa ginagawa nila sa agham at matematika.
 Ano nga ba ang nagging resulta ng hindi maayos na implementasyon ng batas na ito?
Kung tutuusin ay napakarami. Ang mga mamayan na nagiging panatiko at ang katapatan ay
nasa isang politico at wala sa bayan. Ang mga matatalinong lider ng ating bayan na sa halip
ay unahin ang bansa, pansariling interes ang mas pinahalagahan. Marahil ay maraming salik
ang nagging dahilan ng mga bagay na ito ngunit malaki sana ang maiaambag ng maayos na
pagpapatupad ng Batas Rizal upang maiwasan ang mga ito. Sa kabuuan, makikita natin na
tila mababaw ang ating pag unawa sa usapin ng nasyonalismo at pagiging makabayan.

Dahil dito, panahon na upang mas paigtingin ang pagpapatupad ng Batas Rizal upang
maisakatuparan ng batas na ito ang kanyang mga layunin. Panahon na upang ituro ang Noli
Me Tangere at El Filibustirismo sa mas malalim na konteksto. Dapat ay ituring na ang pag
aaral sa buhay ni Rizal at sa kanyang mga akda na isang mahalagang bahagi ng ating
edukasyon upang masiguro na ang katapatan ng ating mga mamayan sa hinaharap ay
nakalaan mismo para sa bayan.

Sa aking palagay rin ay nararapat na mas palawakin pa ang sakop ng Batas Rizal.
Bukod sa ating pambansang bayani, dapat ay matutunan rin natin ang mga naging buhay ng
ating ibang mga bayani katulad nila Heneral Antonio Luna, Apolinario Mabini at Andres
Bonifacio. Ang pag-aaral sa buhay lamang ni Rizal ay tila pag-aaral ng ating masalimuot na
kasaysayan mula sa mga mata ng iisang tao lamang. Mahalaga na makita rin natin ang ibat
ibang perspektibo mula sa iba nating mga bayani upang mas maunawaan natin ang dahilan
ng kanilang bawat tagumpay at mga kabiguan.

Marami na ang nangyari mula noong naipatupad ang Batas Rizal kung kaya’t dapat na
itong ma-amyendahan upang ito ay maging malapit sa ating mga damdamin sa kasalukuyang
panahon. Marami nang mga pangyayari ang sumubok at patuloy na sumusubok supilin sa
ating kalayaan at diwang makabayan. Kung ang pangunahing layunin ay paigtingin ang
diwang makabayan ng mga kabataan, naniniwala ako na marami pang ibang mga akda at
mga naratibo na maaaring pag-aralan upang maituro ang pagiging makabayan sa mga
Pilipino.