Riza Mae M.

Martorillas
2014-21241
PI 100 THR (Rebisang Papel)
Bilang ng Salita: 764
Batas Rizal: Bayan o Bayani?

Nakasaad sa Republic Act. 1425 o mas kilala bilang Batas Rizal, na marapat na maisama sa
kurikulum ng lahat ng pampubliko o pribadong kolehiyo at unibersidad ang kursong tumatalakay sa
buhay at mga akda ng ating pambansang bayani na si Dr. Jose Rizal. Kabilang sa kanyang mga nobelang
bibigyan ng pansin sa kurso ay ang Noli Me Tangere at El Filibusterismo. Hindi maiitatanggi na mabuti
ang mga layunin ng batas na ito. Itinataguyod nito ang dugong makabayan at pinag-aalab ang diwa ng
nasyonalismo sa bawat mag-aaral. Nilalayon ng kursong ito na gawing inspirasyon si Rizal at ang
kanyang mga makabayang adhikain upang mas maging malawak ang perspektibo ng mga estudyante
sa mga kasulukuyang isyu ng bansa. Malinaw ang mga nakasaad na layunin sa nasabing batas, ngunit
ito nga ba ay matagumpay na nakakamit sa apat na sulok ng paaralan? Napaiigting nga ba ang pagkilala
kay Rizal bilang bayani na dapat na humuhubog sa ating pagiging Pilipino? Naihuhulma nga ba tayo ng
kursong ito upang maging mas makabayan at mas mapairal ang nasyonalismo na paulit ulit na dinidiin
sa nabanggit na batas? Sa aking paningin, mas umiiral ang hindi. Binibigyan ng atensyon ng batas ang
pagmamahal sa bayan ngunit kung susuriin mabuti, mas nangingibabaw ang pagmamahal kay Rizal.

Nakalulungkot isipin ang realidad na ipinapakita ng karamihan sa kumukuha ng kursong ito.

Ang katotohanan na ang pangunahing nakakamit ng batas ay magawang pambansang simbolo si Rizal.
Ang kilalanin sya bilang mahusay sa larangan ng agham at pagsulat, bilang tagapagtaguyod ng
mapayapang himagsikan, bilang ang ating pambansang bayani. Mas kinikilala ang taong nasa piso,
imbis ang halaga, imbis na maisabuhay natin ang kanyang mga adhikain at mas lalong mapaigting ang
paulit ulit na binaggit na nasyonalismo. Kung susuriin sa malalim na pagtingin, ang Republic Act. 1425
o ang Batas Rizal ay hindi nagiging epektibo.

Maliban sa layunin nitong pagpapairal sa dugong makabayan, hindi rin naging mabisa ang
batas sa pagpapatupad ng ilan sa seksyon nito. Binigyang diin sa ikalawa at ikatlong bahagi ng batas
ang pagkakaroon ng sapat na kopya ng Noli Me Tangere at El Filibusterismo. Nakasaad na dapat
makapagmahagi ang mga barrio council at purok organizations ng libreng kopya sa mga nais na
magbasa sa mga nobela ni Rizal. Ngunit ang mga karapatan na ito ay hindi natatamasa ng mga
mamamayan. Nakasaad na obligasyon ito ng Lupon ng Pambansang Edukasyon ngunit bakit hindi ito
nagagampanan? Wala nga bang sapat na badyet o ang nakalaan na tatlong daang libong piso na kung
iisipin ay napakakulang, lalo’t sa panahon ngayon na lumalala ang inflation, ay ibinibulsa pa ng mga
kurakot? Walang makapagsasabi. Nawa’y bigyan ng konsiderasyon ang pagrebisa sa Batas Rizal. Dapat
mas maging mahigpit ang pagpapatupad sa batas na ito at bigyan ng karampatang kaparusahan ang

1
Riza Mae M. Martorillas
2014-21241
PI 100 THR (Rebisang Papel)
Bilang ng Salita: 764

sinumang magsasawalang bahala rito. Sa ganitong paraan, mas mabibigyang halaga at pagkilala ang
kursong gagabay sa kabataang Pilipino patungo sa pagpapaigting ng nasyonalismo.

Nasyonalismo, ayon sa depinisyon nito, ay isang kamalayan na nagmumula sa pagkakaroon ng

konsepto ng iisang wika, kultura, at kasaysayan. Nangingibabaw ang pagpapairal sa damdaming ito sa
Batas Rizal ngunit bakit ito isinentro lamang kay Rizal. Napakaraming mga bayani ang kakikitaan din
ng mga makabayang adhikain na magiging makabuluhan sa pagpapaalab ng pagmamahal sa bansa. Isa
pa, walang batas na nagsasabing si Rizal ang ating pambansang bayani kaya bakit nagiging “epitome
of nationalism” si Rizal kung susumahin ang batas. Kaya isa sa mga butas na nakita ko sa R.A. 1425 ay
tumututok ito sa pagtatag kay Rizal bilang pambansang simbolo na dapat alalahanin.

Lumipas na ang napakaraming panahon at sa aking paningin, hindi nagiging mabisa ang Batas
Rizal sa pagtupad ng mga layunin nito. Nakalulungkot isipin na may mga mag-aaral na matapos kuhain
ang kursong Rizal ay napapatanong pa rin kung ano bang kahalagahan nito sa kanilang larangan.
Nakalulungkot rin isipin na may mga institusyon at paaralan na hindi nabibigyan ng sapat na badyet
upang masuportahan ang kurso gaya ng nakasaad sa batas. Sa kabila ng pagkakaroon natin ng batas
ukol sa kursong nabanggit, bakit limitado pa rin ang kaalaman ng mga Pilipino kay Rizal. Hanggang sa
piso, Luneta, at iba’t ibang mga lugar na lamang ba na nakapangalan sa kanya ang ating matatandaan?
Napakalayo na ng narating ng ating teknolohiya, nawa’y mas magamit pa natin ito upang mas
mapatibay ang batas. Nawa’y mas maging maayos ang sistema at mas maging maayos tayo mismo.
Nawa’y gawin nating instrumento ang ating mga sarili sa pagpapalawig ng nasyonalismo kahit sa
simpleng pagbigay halaga sa kursong ito. Sa mga nararanasan natin ngayon, dapat na nating imulat
ang ating sarili at gumawa na ng aksyon dahil “Kung hindi ngayon, kailan pa?”.

SANGGUNIAN

Official Gazette GOVPH. (June 12, 1956). Republic Act No. 1425. Retrieved from
http://www.officialgazette.gov.ph/1956/06/12/republic-act-no-1425/

Mac Pascual. (August 27, 2008. RA 1425: A Refresher. Retrieved from

https://filipinopride.wordpress.com/tag/rizal-law/