K-12 Banghay-Aralin sa Araling Panlipunan

I. LAYUNIN

A.Pamantayang Pangnilalaman
Naipamamalas ng mag-aaral ang pang-unawa at pagpapahalaga sa kanyang mga
karapatan at tungkulin bilang mamamayang Pilipino

B. Pamantayan sa Pagganap
Nakikilahok sa mga gawaing pansibiko na nagpapakita ng pagganap sa kanyang tungkulin
bilang mamamayan ng bansa at pagsasabuhay ng kanyang karapatan.

C. Mga kasanayan sa pagkatuto

1. Naibibigay ang kahulugan ng kagalingang pansibiko
2. Natatalakay ang mga gawaing nagpapakita ng kagalingang pansibiko ng isang bahagi
ng bansa
3. Naipapakita ang kahalagahan ng kagalingang pansibiko

Isulat ang code ng bawat kasanayan

AP4KPB-IVd-e-4

II. NILALAMAN
Kahulugan at Kahalagahan ng Gawaing Pansibiko
A. Kagamitang Panturo
Mga pahina sa gabay ng guro
162-163
Mga pahina sa kagamitang pang mag-aaral
362-467
Mga pahina sa Teksbuk
Karagdagang kagamitan mula sa portal Learning Resource
-Aklat, telebisyon

B. Iba pang kagamitang panturo

III. PAMAMARAAN
A. Balik-aral sa nakaraang aralin at/o pagsisimula sa bagong aralin:
1.Balitaan: Ano ang ginagawa ni Pangulong Duterte upang masolusyunan ang problema
sa droga? Anong gawaing pansibiko ang ipinakikita niya?

2. Ano-ano ang mga tungkuling kaakibat ng bawat karapatan?

B. Paghahabi sa layunin ng aralin:

Tumawag ng boluntir. Gamit ang kanilang katawan, ipasulat ang mga letrang bumubuo
sa mga salitang Gawain at sibika. Ipahula sa pangkat o klase ang nabuong salita.

Itanong:

 Madali bang hulaan ang mga letra kapag isinusulat gamit ang katawan?
 Alam ba ninyo ang ibig sabihin ng salitang inyong nabuo?

Iugnay ang mga ito sa aralin.

C. Pag-uugnay ng mga halimbawa sa layunin ng aralin:

Talakayin ang mga impormasyon na nasa Alamin Natin LM, pahina 362-364

ALAMIN NATIN

Kahulugan ng Kagalingang Pansibiko

Ang salitang sibiko ay mula sa salitang Latin na ang ibig sabihin ay mamamayan. Noong
unang panahon sa lipunang Pranses, tinatawag na civique ang isang mamamayang nakapagbuwis
ng buhay para sa kaniyang kapwa. Naipagpapalit ito sa salitang civil o ‘sibilyan’ na isang
indibidwal na wala sa serbisyo ng pamahalaan o hindi nanunungkulan bilang sundalo subalit
nakatutulong nang Malaki sa kanyang bayan.
 Sa kasalukuyan, ginagamit ang salitang sibiko upang pormal na tukuyin ang mga
mamamayang bumubuo ng lipunan.kadalasan nang ikinakabit sa salitang ito ang mga katagang
“kagalinga” o welfare. Tinutukoy ng civic welfare o kagalingang pansibiko ang pinakamataas na
kabutihang makakamit at mararanasan ng mga mamamayan. Ang kabutihang ito ay natatamasa
sapagkat nanggaling sa kagyat na pagtugon at pagmamalasakit ng kapwa mamamayan.

Sa pagganap ng mga tungkulin sa lipunan, ang mga mamamayang may kamalayang

pansibiko ay higit na nakatutuwang sa pamahalaan. Ang kamalayang pansibiko ay kaisipan na
ang bawat isa ay may pananagutan sa kanyang kapwa. Ito ay pagkilala na ang indibidwal ay may
kakayahang paunlarin ang lipunan sa anumang paraang kaya niyang tugunan at gampanan. Ang
pagkukusang-loob, pagtulong nang walang inaasahang kapalit, at bayanihan ay mga susing
katangiang dapat taglayin sa gawaing pansibiko.

Maaari ding tingan ang gawaing pansibiko bilang malawakang pagsasama-sama ng mga
tao upang tiyaking nasa pinakamahusay silang pamumuhay lalo na ang pinakamahihirap.
Karaniwang sinasakop ng kagalingang pansibiko ang mga usapin hinggil sa edukasyon,
kalikasan, kabuhayan, pampublikong serbisyo, at kalusugan. Mula sa maliliit na bagay tulad ng
pagtulong sa isang matanda sa pagtawid sa kalye hanggang sa malalaking bagay tulad ng
pagpaplano para sa pagtatayo ng kabuhayan sa isang komunidad ay maituturing na kagalingang
panlipunan na nag-uugat sa gawaing pansibiko.

Kahalagahan ng Gawaing Pansibiko

Di matatawaran ang kahalagahan ng gawiang pansibiko sa isang bansa. Ito ay isang

paraan ng pagtiyak na ang mga mamamayan sa isang lipunan ay tunay na malaya, nagsasarili, at
kontento sa kanilang pamunuan. Malaya nilang naipapahayag ang sarili at nagagawa ang gusto
nang di lumalabis sa itinakda ng batas. Nagsasarili sila at kayang sustentuhan ang sarili at
pamilya. Kontento sila sa pamamalakad ng pamahalaan at sinusuportahan nila ito.

Ipinakikita ng gawaing pansibiko ang pinakamataas na lebel ng pakikipagkapuwa. Dahil

dito, kakikitaan ang mga tao ng pagmamalasakit sa isa’t-isa. Nagkukusang-loob silang
mapaglingkuran lalo na ang mahihirap at nakabababa. Kumikilos sila at tumutugon sa
pangangailangan ng iba kahit hindi pagsabihan o walang kumpas ng pamahalaan. May sarili
silang motibo at ito ay ang masidhing pagnanasang makapaglingkod sa kapwa kahit walang
posisyon at kabayaran.

Mahalaga ang kagalingang pansibiko dahil tinitiyak nitong ang bawat mamamayan ay
nabubuhay nang matiwasay at payapa. Higit na mapapadali ang serbisyo publiko kung ang bawat
isa ay handa sa paglilingkod at pagtulong. Mas malawak ang maaabot ng mga ahensiyang
pampamahalaan kung magsasama-sama ang mga institusyong binubuo ng mga indibidwal na ang
motibo ay mapahusay ang kalagayan ng lahat.

D. Pagtalakay ng bagong konsepto at paglalahad ng bagong kasanayan #1

1. Ano ang ibig sabihin ng Kagalingang Pansibiko?
2. Bakit ito naging mahalaga sa lipunan?
3. Ano ang maaaring maidulot nito sa ating bansa?

E. Pagtalakay ng bagong konsepto at paglalahad ng bagong kasanayan #2

Sabihin kung kagalingang pansibiko o hindi ang sumusunod na pahayag.
1. Pagtulong sa pamimigay ng relief goods
2. Pagtitinda upang kumita
3. Panlilibre sa barkada
4. Panonood ng sine
5. Pagpapakain sa mga batang lansangan

F. Paglinang sa Kabihasaan (Tungo sa formative assessment)

Hatiin sa tatlong pangkat ang mga mag-aaral. Ipagawa ang mga sumusunod na
pangkatang gawain.
Unang Pangkat- Magsadula ng isang kagalingang pansibiko
Pangalawang Pangkat- Magpantomime ng isang kagalingang pansibiko
Ikatlong Pangkat- Sagutan ang Gawain A sa pahina 365 ng LM sa AP 4.
G. Paglalapat ng aralin sa pang araw-araw na buhay
Bilang isang mag-aaral, paano mo maipapakita ang kagalingang pansibiko sa ating
bansa?

H. Paglalahat ng Aralin
Ano ang kahulugan ng kagalingang pansibiko?
Ano-ano ang mga gawaing nagpapakita ng kagalingang pansibiko?

I. Pagtataya ng Aralin
Isulat sa notbuk ang letra ng pinakaangkop na pagkilos sa sumusunod na mga sitwasyon.

1. May mga dumalo na nagkukwentuhan sa loob ng isang bulwagan. Magsisimula na ang

pambansang awit bilang panimula ng programa. Ano ang dapat mong gawin?
A. Huwag kumibo.
B. Sumali sa nagkukwentuhan.
C. Sawayin ang mga nagkukwentuhan.
D. Sabihan ang mga nagkukwentuhan na tumahimik muna at lumahok sa pag-awit.

2. Nakita mong tumatawid si Lola Tinay sa kalye Aurora. Ano ang gagawin mo?
A. Alalayan ang matanda.
B. Pabayaan siya at huwag pansinin.
C. Sabihan siya na mag-ingat sa pagtawid.
D. Maghanap ng pulis na magtatawid sa matanda.

3. Tila nakalimutan ni Lolo Mino ang daan pauwi. Paikot-ikot siya sa magkakapitbahayan. Ano
ang gagawin mo?
A. Hanapin ang pamilya ni Lolo Mino upang maiuwi siya.
B. Ipagbigay-alam ito sa mga barangay tanod.
C. Tanungin si Lolo Mino at tulungan siya.
D. Huwag pansinin ang matanda.

4. Katatapos lamang ng malakas na bagyo. Tulong-tulong ang mga tao sa inyong pamayanan
upang maglinis. Ano ang gagawin mo?
A. Manood sa mga taong naglilinis.
B. Manatili sa kuwarto at magpahinga.
C. Sumali sa paglilinis at gawin ang makakaya.
D. Ibalita sa media ang naganap na pagtutulungan sa komunidad.

5. Magpapakain para sa mga batang lansangan ang organisasyong pangkababaihan sa inyong

lugar. Ano ang maaari mong itulong?
A. Tumulong sa paghahanda at pagpapakain para sa mga bata.
B. Magboluntaryo sa susunod na pagpapakain.
C. Makikain kasama ang mga bata.
D. Umuwi na lamang.

J. Karagdagang gawain para sa takdang-aralin at remediation

Magtipon ng mga ginupit na balita hinggil sa mga taong may kamalayang pansibiko.
Humanda sa pagbabahagi nito sa klase sa susunod.

Shanaine Rose L. Corpuz

(Practice Teacher)