REGINE G.

ABINES BFE-II
2S-FIL. 02
PANIMULANG LINGUISTIKA
PROF. FE A. QUISIL

FLA Blg. 1

PAPEL ANALISIS
KAHALAGAHAN, KASAYSAYAN AT KATANGIAN NG WIKA SA
DAIGDIG AT SA PILIPINAS

Walang sino man ang nabubuhay para sa sarili lamang. Hindi natin lubos maisip
ang mundo na walang pag-uusap o pakikipaghalubilo sa isa’t isa. Sa ganitong
pagkakataon, ang wika ay gumaganap ng pinakamahalagang papel sa daigdig bilang
bahagi ng pakikipagtalastasan. Napakahalaga ng wika sa sangkatauhan dahil kung
walang wika ay maaaring matagal nang pumanaw ang sangkatauhan at ang
sibilisasyong ating tinatamasa ngayon.

Ang wika ay kalipunan ng mga simbolo, tunog at mga kaugnay na batas upang
maipahayag ang nais sabihin ng kaisipan. Sa pamamagitan ng paggamit ng wika at
pagsasaalang-alang na rin ng mga wasto o tamang paraan ng pananalita o
pakikipagtalastasan ay makakamit ng bawat isa ang pagkakaunawaan at
pagkakaintindihan ng ating magkakaibang pananaw at opinyon sa buhay. Wika ang
ating ginagamit bilang instrumento ng komunikasyon. Ito ay ang pangunahing
kasangkapan ng tao sa pagpapahayag ng damdamin at kaisipan. Dahil dyan, ang mga
bansa ay nagkaka-ugnay at nagkakaunawaan. Iba-iba man ang wika ng mga bansa,
nakahahanap pa rin sila ng komong wika na kanilang kinakasangkapan upang
magkaroon ng pagkakaunawaan. Ano na kaya ang mangyayari sa ating daigdig kung
walang wika o kung hindi epektibo ang paggamit ng mga bansa sa wika?

Bukod sa gamit ng komunikasyon, ang wika din ay may mahalagang papel sa

pag-iingat at pagpapalaganap ng kaalaman. Sinasabing ang kaalaman ay sinasalin sa
bawat lahi o henerasyon nang sa gayun ito ay mapakinabangan o magamit sa mas
mabuti pang paraan. Halimbawa na lamang ang mga sulatin ng atong pambansang
bayani na si Dr. Jose Rizal. Lahat ng mga iyon ay kaniyang isinulat ilang daang taon na
ang nakalipas ngunit ito ay nanatili parin at napapakinabangan sa ating panahon dahil
may wikang nagkanlong rito at nag-ingat hanggang sa kasalukuyan.
Sa kabilang banda, magkakaiba ang ating paniniwala maging ng mga palaaral
tungkol sa kung ano man ang pinagmulan ng wika at kung marami o iisa ba ang
pinagmulan ng wika sa daigdig. Kung ang ating tatanungin ay isang dalubwika gaya na
lamang ni Alfonso O. Santiago, sa kanyang aklat na “Panimulang Linggwistika” ang
ganitong palaisipan o ganitong bagay ay tulad lamang ng iba’t ibang paniniwala tungkol
sa pinagmulan ng tao. Kaya nga’t kung tayo’y maniniwala na ang tao sa buong daigdig
ay nagbubuhat sa iisang angkan lamang, masasabi rin natin na ang iba’t ibang wika sa
daigdig ay nagbuhat din sa iisang angkan. Dadapwat sa kabilang dako, kung ang
pinaniniwalaan natin ay ang kabaligtaran ng kaisipan o paniniwala tungkol sa ating
pinagmulan at ng pinagmulang angkan ng ating wika ay natural lamang na tanggapin
din nating hindi iisa ang pinagmulan ng iba’t ibang wika na ngayon ay laganap sa buong
mundo.

Ayon naman sa isang papel na sumasagot sa katanungang “What is language?”

ni Archibald A. Hill, ang wika raw ay ang pangunahin at pinakaelaboreyt na anyo ng
simbolikong gawaing pantao. Ang mga simbolong ito ay binubuo ng mga tunog na
nilikha ng aparato sa pagsasalita at isinasaayos sa mga klase at patern na lumilikha sa
isang komplikado at simetrikal na istruktura. Ang mga simbolong ito ay mayroon ding
kahuluganng arbitraryo at kontrolado ng lipunan. Ang pagpapakahulugang ito ay
sinuportahan o sinang ayunan din ni Gleason sa wika. Ayon sa kanya, ang wika raw ay
masistemang balangkas ng salitang tunog na pinipili at isinasaayos sa paraang
arbitraryo upang magamit ng mga taong kabilang sa isang kultura. Ang mga kaisipan o
pagpapakahulugan ng dalawang dalubwika ay may katuturan at parehong tumutukoy sa
pangunahin at unibersal na katangian ng wika.

Ayon nga sa aklat na ikinumpuni ni Gng. Ana Liza S. Ponio, ang wika ay
masistemang balangkas. Ano mang wika sa daigdig ay sistematikong nakaayos sa
iisang tiyak na balangkas. Dagdag pa niya, walang wika ang hindi nakaayos sa
balangkas na ito. Lahat na wika ay nakabatay sa tunog. Ito ay tinatawag na Ponema –
ang makahulugang tunog ng isang wika. Ponolohiya naman ang tawag sa makaagham
na pag-aaral ng mga ito. Bukod pa sa pagkakaroon ng masistemang balangkas ng
wika, ito rin ay sinasalitang tunog. Hindi lahat ng tunog ay wika sapagkat hindi lahat ng
tunog ay may kahulugan. Ang ibang mga tunog ay nagbubuhat sa ating kapaligiran,
maging sa mga hayop man o sa mga bagay bagay. Sa tao, ang pinakamakahulugang
tunog na nililikha natin at kung gayo’y kasangkapan ng komunikasyon sa lahat kung
hindi man lahat ng pagkakataon ay ang tunog na sinasalita. Sa makatuwid, ito ang mga
tunog na nililikha ng ating aparato sa pagsasalita.

Ano o ilan man ang pinag mulan ng wikang sinsambitla natin ngayun,
magkakaiba man tayo ng paraan ng pagpapahiwatig ng ating saloobin o kaisipan, ang
katotohanang ang wika ang nagbubuklod sa ating pagkakaiba-iba bilang indibidwal ay
nananatili at hindi kalian man nagbabago. Ang mga katangiang tinataglay ng ating wika
ay habang buhay nating isinasaisip at isinasapuso sa pagkat ang lahat ng mga ito ay
bahagi na ng ating buong pagkatao.