ABSTRAK

PANGALAN: ROSALIE B. TANGONAN

PAMAGAT: PAGBUO NG KURIKULUM SA PAGTUTURO NG

FILIPINO BILANG IKALAWANG WIKA SA MGA DAYUHANG
MAG-AARAL SA ISANG PRIBADONG PAARALAN

MAHAHALAGANG KURIKULUM, FILIPINO, IKALAWANG WIKA, DAYUHAN,

KONSEPTO: PERSONALIZED EDUCATION

DEGRI: MASTER SA SINING NG EDUKASYON

ESPESYALISASYON: PAGTUTURO NG FILIPINO

TAGPAYO/GURONG Dr. Voltaire M. Villanueva

TAGAPATNUBAY: Dr. Niña Christina L. Zamora

Layunin ng pag-aaral na makabuo ng tatlong antas ng kurikulum para sa kursong

Special Class sa Filipino ng isang pribadong paaralan. Tinutugunan nito ang mga layuning:

1) Matukoy ang pangangailangan ng mga dayuhang mag-aaral ng Filipino; 2) Maisa-isa ang

mga aralin, konsepto, at kasanayang lilinangin sa kurikulum; 3) Makapaglahad ng mga

mungkahing estratehiya, gawain, at pagtataya sa bawat aralin; at 4) Maebalweyt ang

nabuong kurikulum.

Naging batayan sa pagsasagawa ng pananaliksik ang sa mga simulaing inilahad ng

Personalized Education Program (PEP) na isang pedagohiyang tinatayang maaaring

maging mabisa sa pagtuturo ng ikalawang wika. Inilapat ito sa disenyo ng kurikulum na

1
binuo ni Van Lier (1996) na AAA Curriculum upang matugunan ang mga kasanayang

inilahad sa nabuong balangkas nina Mabanglo at Ramos (2012) mula sa una hanggang sa

ikaapat na antas ng pagkatuto ng Filipino bilang ikalawang wika at mga kasanayang

kabilang sa umiiral ba kurikulum na K-12 (2013) kaugnay sa pagtuturo ng Filipino sa antas

sekundarya. Upang mapag-ugnay ang mga kasanayan at nilalaman ng kurikulum, ginamit

ang tiyak na mga metodong mailalapat mula kay Yule (1985) at mga estratehiya mula kay

Cohen (1998) at upang maging mas makabuluhan naman ang nilalaman o mga paksang

tatalakayin, naging sandigan ang mga paksang nailahad sa nabuong balangkas nina

Mabanglo at Ramos (2012) mula sa una hanggang sa ikaapat na antas ng pagkatuto ng

Filipino bilang ikalawang wika. Binigyang-pansin din sa pagbuo ng kurikulum ang Affective-

Filter Hypothesis ni Krashen (1984) at ang Socio-Educational Approach ni Cook (2001)

kung saan pinagtutuunan ang sariling damdamin at motibasyon sa pagkatuto ng ikalawang

wika bilang pag-aangkop sa pangkalahatang layunin ng kurikulum na tiniyak sa

pamamagitan ng mga katangiang inilahad ni Nunan (2009) kaugnay sa komunikatibong

pagtuturo ng wika.

Upang makatugon sa mga layuning inilahad, isinagawa ang sumusunod: Una,

Pagtukoy sa mga kasanayang kinakailangang matamo ng mag-aaral ng ikalawang wika;

Ikalawa, Pagtukoy sa nilalaman ng kurikulum; Ikatlo, Paghahanay ng mga angkop na aralin

at layunin sa paksa. Ikaapat, Paglalapat ng mga estratehiya sa pagtuturo; Ikalima,

Pagpapasuri sa eksperto ng kurikulum; Ikaanim, Pagpapasubok sa mga gawain at

estratehiya; at Ikapito, Pagrerebisa batay sa resulta ng pagtataya.

Binubuo ang kurikulum para sa mga dayuhang mag-aaral ng tatlong antas. Bawat

antas ay may sampung araling nakatuon sa komunikatibong gamit ng wika. Iniugnay rin dito

ang ilang kaalamang kultural at pagpapahalagang Pilipino. Sa pagtataya ng nabuong

2
kurikulum, natukoy ang mean na 3.76 na nangangahulugang sinang-ayunan ito ng mga

mag-aaral. Lubos itong sinang-ayunan ng kaguruang sa mean na 4.53. Para sa mga

eksperto, 4.01 ang mean nito na nangangahulugang sinang-ayunan din ito.

Mula sa kinalabasan ng pananaliksik, nabuo ang sumusunod na kongklusyon: 1)

Labis na pinahahalagahan ng mga mag-aaral ang makapagbahagi ng nalalaman at

maunawaan ang kanilang kapwa sa ikalawang wika; 2) Habang tumataas ang antas ng pag-

aaral ng ikalawang wika, lumalawak ang mga paksang pinaglalapatan nito.; 3) Binibigyang-

pansin ng kaguruan ang pag-uugnay ng talasalitaan, pagpapahalaga, at kultura sa aralin.;

4) Mahalagang kasangkapan ang mga larawan, awtentikong kagamitan, at mga karanasan

sa pag-unawa ng aralin.; at 5) Ang malawak na uri ng pagtataya ay sumusukat sa

kaalaman, kasanayan, at pagkamalikhain sa paggamit ng ikalawang wika.

Kaugnay ng kinalabasan ng pananaliksik, nabuo ang sumusunod na

rekomendasyon: 1) Magsaliksik ng mga estratehiya batay sa pangangailangan ng mag-

aaral; 2) Magsagawa ng pagtataya ang mga mag-aaral na nakapagtapos sa kurikulum; 3)

Makipag-ugnayan sa tahanan ng mag-aaral upang magkaroon ng suporta sa pag-aaral ng

ikalawang wika; 4) Magsaliksik sa kapakinabangan ng kurso sa mga mag-aaral na

dayuhang kumuha nito; 5) Maipagamit ang kurikulum sa iba upang mapagbuti ito; at 6)

Magsagawa ng iba pang pananaliksik kaugnay sa pag-aaral ng Filipino bilang ikalawang

wika.