Ang paglipat ng borlas ng puting sumbrero ng “toga” mula sa kanan papuntang kaliwa ay simbolo ng opisyal na pagtahak paalis ng isang estudyante sa hayskul. Ito rin ang tanda ng panibagong paglalakbay, ng mas pinatinding hamong kailangang pagtagumpayan ng mga mag-aaral. Maligayang pagdating sa pagka-kole— Hep, hep, hep! Tiyakin mo muna sa iyong sarili kung ang kukunin mo bang kurso sa Kolehiyo ay pinal na. Ang apat hanggang limang taon kasi sa Kolehiyo ay maaaring maging anim pataas kung hindi pa malinaw ang iyong pasya. Maraming mag-aaral sa Kolehiyo ang lumilipat ng kurso na nagiging dahilan ng estado nilang “gradWAITING”. Mayroon ding mga manggagawa ang nakararanas ng job mismatch sapagkat hindi angkop ang kinuha nilang kurso sa trabaho nila ngayon. Lahat ng mga ito ay binibigyang-diin ang kahalagahan ng pagkakaroon ng tiyak na desisyon ukol sa pag-aaralang kurso sa Kolehiyo. Kung hindi ka pa desidido sa tatahakin mong kasanayan, marapat lamang na iyong alamin ang mga posibleng salik na nakaaapekto sa pagpili ng kurso. 1. Sariling Kagustuhan Kung gusto mong makamit ang iyong pangarap na propesyon sa hinaharap, sundin ang iyong mga pangarap. “Follow your heart,” ika nga nila. Maraming dalubhasa ang nagiging matagumpay at masaya sa kani- kanilang mga propesyon sapagkat mahal nila ang kanilang ginagawa. 2. Job Opportunities and Salary Kapag ikaw ay isang praktikal na tao, maaaring ibase mo ang iyong kukuning kurso sa trabahong may palagiang pagtanggap ng mga empleyado o sa trabahong kalakip ang mataas na suweldo. Kung gayon, maiiwasan ang “unemployment” pagkatapos makapagtapos ng pag-aaral at nang mas madali kang makahanap ng papasukang trabaho. 3. Mga Magulang Walang magulang ang walang pangarap para sa kani-kanilang anak. Sumangguni sa kanila nang sa gayon ay may paggabay sa kasanayang pag- aaralan. Ngunit pakatandaan, hindi kailangan na lagi mong sundin ang kursong iminumungkahi nila; sa huli ay nasa iyo pa rin ang kalayaan at karapatang umayon sa iyong pasya. 4. Badyet Isaalang-alang din ang salaping kayang ilaan para sa iyong pag-aaral. Mayroon kasing mga kurso ang aabutin ng napakaraming taon upang pag- aralan, mahal ang gagastusin depende sa paaralang papasukan, o ‘di kaya’y maraming kagamitan ang kinakailangang bilhin at gamitin. Ngunit kung hindi talaga kaya ng badyet ng inyong pamilya, sikaping maging iskolar. Sa katunayan, maraming scholarship grants at offers ang iniaalok ng iba’t- ibang paaralan, ng pamahalaan, maging ng ibang mga kumpanya. 5. Impluwensya ng mga Kaibigan Mahalaga rin ang opinyon o suhestiyon ng mga kaibigan nang mas magkaroon ka ng kaalaman patungkol sa kursong pinagpipilian o kukunin sa pamamagitan ng mga talakayan.
May oras ka pa upang pag-isipan ang mga bagay-bagay bago mo tuluyang
tahakin ang panibagong kabanata ng iyong buhay. Kapag tiyak na ang iyong mga plano, tsaka ka pa lamang namin babatiin ng: Maligayang pagdating sa pagka-kolehiyo!