Hand-out #3 – Finals

PANANALIKSIK
Anumang bagay na nakikita at nararanasan natin sa kasalukuyan na mga
pagbabago o pag-unlad ay bunga ng walang hanggang pananaliksik. Napakahalaga ng
papel na ginagam-panan ng pananaliksik sa buhay ng tao lalo na sa mga mag-aaral.
Nabibigyan ang mga mag-aaral ng pagkakataon na mapalawak ang karanasan,
maragdagan ang kaalaman at kamulatan na magiging kapaki-pakinabang sa kanyang
sariling pag-unlad, makilala at mapahalagahan ang komunidad at ang lipunang
kinabibilangan.

Kahulugan ng Pananaliksik

 Ayon kay Good, ang pananaliksik ay isang maingar, mapanuri, disiplinadong

pamamaraan ayon sa kalakasan at kalagayan ng suliranin na itinutuon para sa
kaliwanagan o kalutasan ng suliranin.
 Ayon kay Parel, ang pananaliksik ay isang sistematikong pag-aaral o
pagsisiyasat tungkol sa isang bagay sa layuning sagutin ang ilang katanungan.
 Ayon kay Treece at Truce, ang pananaliksik ay pagtatangkang makakuha ng
kalutasan sa mga suliranin.

Katangian ng Pananaliksik

 Obhektibo – Nakabatay sa nakikita o may katunayan / ebidensiya

partikular ang numerikong datos.
 Mayaman sa mga ginagamit na datos – Kinakailangan na may mga
mapagkukuhanan ng datos ang inyong sasaliksikin na paksa.
 Angkop na pamamaraan o metodolohiya – Sa bahaging ito
ipinaliliwanag ang partikular na instrumentong ginamit na makakatulong
sa ikahuhusay sa sulating pananaliksik.
 Dakumentado – Ang mga patotoo at ang baliditi ng sulatin pananaliksik
ay nakasalalay sa mga ihaharap na materyales bilang pagkilala sa
Gawain ng iba at mga datos na nakuha.
 Sumusunod sa tamang proseso ng pagsulat – Sistematikong
pananaliksik ay dumaraan sa masalimuot na yugto ng pagsulat.
 Nagsisimula sa pagtukoy sa suliranin.
 Pag-uugnay ng suliranin sa mga umiiral na teorya.
 Pangangalap ng mga datos.
  Pagsusuri at pagpapakahulugan sa mga datos.
 Pagbuo ng mga konklusyon at rekomendasyon.
 Kritikal – Magiging balido lamang ang isang pananaliksik kung ang
mga inilahad na ideya ay mapapanaligan at mapatotohanan sa tulong
ng mga ginamit na datos.

Layunin ng Pananaliksik
 Makatuklas ng mga bagong ideya, konsepto at impormasyon.
 Makapagbigay ng bagong interpretasyon o pagpapakahulugan sa lumang
ideya.
 Magbigay linaw sa isang usapin o isyung pinagtatalunan.
 Magbigay ng katotohanan sa mga bagay o paksang nangangailangan ng
paglilinaw.
 Makapagbigay suhestiyon batay sa historikal na perspektibo para sa isang
pangyayari.

URI NG PANANALIKSIK

PANIMULANG PANANALIKSIK (BASIC RESEARCH)

 Layunin ng pananaliksik na magpaliwanag. Binubuo ng mga teorya o
paliwanag na tungkol sa isang phenomenon o pangyayari. Ito ay
deskriptibo o naglalarawan.
PAGKILOS NA PANANALIKSIK (ACTION RESEARCH)
 Layunin ng pananaliksik na ito na lumutas ng isang tiyak na suluranin
sa isang programa, organisasyon o komunidad.
PAGTUGONG PANANALIKSIK (APPLIED RESEARCH)
 Layunin ng pananaliksik na ito na matulungan ang mga tao na
maunawaan ang kalikasan ng isang suliranin upang magkaroon ng
ideya kung paano ito kokontrolin ang suliranin. Inilalapat ito sa majority
ng populasyon.
 DISENYO NG PANANALIKSIK
Ang disenyo ng pananaliksik ay makakatulong upang mailarawan ang
pamamaraan ng pagsusuri sa isasagawang pananaliksik.

KWANTITATIBO – Tumutukoy sa sistimatikong imbestigasyon ng paksa at

penomenong panlipunan sapamamgitan ng matematikal, estadistikal at mga
teknik na pamamaraan na gumagamit ng komputasyon. Kadalasan ay
gumagamit ito ng sarbey, eksperimentasyon at pagsusuring estadistikal.

KUWALITATIBO – Kinapapalooban ng mga uri ng pagsisiyasat na ang layunin

ay malalimang unawain ang pag-uugali at ang ugnayan ng mga tao at ang
dahilan na gumagabay rito. Ang disenyong ito ay pinapatnubayan ng
paniniwalang ang mga pag-ugali ng tao ay nakabatay sa mas malawak na
konteksto pinangyayarihan nito at ang panlipunang reyalidad katulad ng kultura,
ugnayan ng tao at iba pa na hindi maaaring masukat o mabilang.

MGA HAKBANG SA PAGSASAGAWA NG PANANALIKSIK

A. Pumili at maglimita ng Paksa

Isa sa pinakamahalagang dapat na isaisip sa pagsisimula ng isang pananaliksik
ay ang paksang aaralin.
Ilan sa mga sumusunod ay mga maaaring pagkuhanan ng paksa:
 Maaaring isang napapanahong isyu,
 Maaaring isang problemang nangangailangan ng solusyon o
paglilinaw.
 Maaaring mula sa isang lumang pag-aaral na pwede mong suportahan
ang naging resulta o di naman ay gumawa ng panibagong
interpretasyon mula sa unang resulta ng pag-aaral.
 Higit sa lahat, maraming datos na maaaring makuha.
Kapag may napili ng paksa, maaari umpisahan ang pagbuo ng pamagat ng
isasagawang pananaliksik.

Mga dapat tandaan sa pagbuo ng pamagat:

- Kinakailangan ito ay solution-based. Ibig sabihin ang pamagat ay malinaw na
sumasagot sa isang suliranin.
- Ang pamagat ay binubuo ng 10-12 salita.
 - Kinakailangan makita na sa pamagat ang tiyak na pag-aaralan, sino ang mga
tutugon at ang lunan ng pagdadausan ng pananaliksik.

Halimbawa:

Malawak na Pamagat:
Pag-aaral ng mga mag-aaral ng mga Panitikang Filipino.

 Malawak ito sapagkat hindi mo malinaw kung ano ang pag-aaralan,

sinong mag-aaral ang mag-aaral, saang paaralan, at anong mga
panitikang Filipino ang tinutukoy.

 Alamin ano ang nais aralin: Kadahilanan ba? Epekto ba? Motibasyon
ba?
 Sinong mga mag-aaral? Elementarya o Sekondarya o SHS? Anong
baitang?
 Saang lugar idadaos ang pag-aaral? Saang paaralan?
 Anong mga Panitikang Filipino? Nobela? Anong Nobela?

Mula sa mga gabay na tanong maaari kang makabuo nang mas tiyak na
pamagat.

Tiyak na pamagat:

Motibasyon sa pagkatuto ng Noli Me Tangere ng mga mag-aaral ng

Pamantasang De La Salle Araneta.

 Solution-based: Aalamin sa pag-aaral ang mga maaring maging

matibasyon upang mas maganyak mag-aral o matuto ang mga bata
ng Noli Me Tangere.

 Maliwanag na rin ang mismong aaralin (Mga motibasyon sa pagkatuto

ng Noli Me Tangere).

 Hindi na kinakailangan banggititn ang baitang ng mag-aaral sapagkat

ang Noli Me Tangere ay itinuturo lamang sa ika-9 Baitang.

B. Tukuyin kung anong teorya ang gagamitin sa pananaliksik

 Upang magkaroon ng gabay ang pananaliksik na isasagawa mahalagang may
teoryang maaring maging batayan o may kaugnayan sa isasagawang
pananaliksik.

Ano nga ba ang Teorya?

Teorya
 Isang pag-aaral gamit ang siyentipikong pamamaraan sa isang tao o
pangyayari.
 Ito ay isang paliwanag sa isang bagay na hindi pa napapatunayan o
wala pang matibay na ebidensiya.

Halimbawa :
Ang isasagawang pag-aaral ay patungkol sa kaugnayan ng wika sa lipunan.
Maaaring gumamit ng teoryang pang-wika na teoryang sosyolinggwistiko dahil
Ito ay ang teoryang tumatalakay sa mga salita, kilos at pahayag ng isang
indibidwal ay nagkakaroon ng kabuluhan kung ito ay nakapaloob sa konteksto
ng isang lipunan.

C. Pagbuo ng Balangkas Konseptuwal

 Ito ang balangkas ng isasagawang pag-aaral. Dito makikita ang daloy ng
magiging pag-aaral ng pananaliksik. Makikita rito ang suliraning
kinakaharap, prosesong ginamit upang matugunan ito at maging ang
pagbibigay ng kaukulang kasagutan sa nasabing suliranin.

INPUT PROCESS OUTPUT

D. Pagkalap ng mga datos

Isa sa pinakamatrabahong gawain ng pagsasagawa ng pananaliksik ay ang
pagkakalap ng mga datos na makakatulong upang masagot ang suliranin na
iyong sinusubukan hanapan ng solusyon.
 Sa pangangalap ng datos, unahin na bumuo ng mga tanong na magiging
gabay sa pagsasaliksik. Ito ang bahagi na “Paglalahad ng mga suliranin”.
Bumuo ng mga katanungan na hahanapan ng kasagutan na magiging
daan upang mahanap ang tinatangkang sagutin na problema sa
pananaliksik. Maaaring bumuo ng 4- 6 na katanungan o kung ilan ang
sapat na katanungan na kailangan sa isasagawang pananaliksik.
Magbigay lamang ng mga angkop at magkakaugnay na katanungan na
talagang makakatulong sa pagsagot ng suliranin.
Tandaan hindi ito paramihan ng katanungan. Mga mahahalagang tanong
lamang ang nararapat na isama sa paglalahad ng suliranin.
 Kapag may katanungan na, maaaring magsimula na sa pangangalap ng
mga kaugnay na pag-aaral o mga panitikan na magbibigay tibay sa pag-
aaral o maaaring maging katibayan na susuporta sa iyong isinasagawang
pag-aaral.
Sa pangangalap ng mga kaugnay na pag-aaral o mga panitikan ito
ang mga maaari mong maging gabay:
 Ang mga pag-aaral ay kinakailangan bago o ika nga ay
updated sa wikang Ingles. Ang mga pag-aaral ay kinakailangan
na naisulat ng mga 5 na taon pa lamang mula sa taon kung
kalian isinagawa ang pananaliksik. Maaaring magbase sa mga
naisulat nang higit pa sa 5 na taon kung ang pananaliksik ay
patungkol sa kasaysayan o di naman kaya ay base sa lumang
pag-aaral ngunit isinulat muli, duon maaari mong kuhanin ang
petsa o taon ng kung kalian ito muling naisulat upang masabing
ito ay updated. Bilang kabuuan, kinakailangan na 85% ng mga
nasa kaugnay na pananaliksik ay galing mga reperensiya sa na
isulat ng hindi tataas o hihigit ng 5 taon.
 Humigit kumulang 30 sanggunian o reperensiya ngunit hindi
tataas pa sa 50 na sanggunian o reperensiya ang kailangan
mong pagkuhanan ng mga impormasyon. Ngunit tandaan na
nakadepende pa rin ito sa isasagawang pananaliksik ang dami
ng ilalagay na sangunian, ang lagi lamang isaisip sa
pagkakalap ng mga impormasyon ay ang kasabihan na
“Quality over Quantity.” Mas mainam na bigyang pansin ang
kalidad kesa sa dami ng mga kinukuhang impormasyon.
 Kung walang tiyak na ibinigay ng panuto, maaaring ang isang
pananaliksik na may 15 pahina ang kaugnay na panitikan nito
ay may habang 2-3 pahina.
 Maaaring kumuha ng mga reperensiya sa aklat, dyornal,
internet at iba pa.
  Mga uri ng datos na maaari mong kolektahin o kalapin.

 KWANTITATIBONG DATOS – Ito ay mga datos na numero o mga

graphs at maaaring suriin sa pamamagitan ng pamamaraang
estadistika. Makukuha sa pamamagitan ng mga sarbey o resulta ng
mga gawain na ginagamitan ng komputasyon.
 KUWALITATIBONG DATOS - Ito ay mga datos na pasalita o
paglalarawan na maaaring suriin sa pamamgitan ng pagbibigay
interpretasyon at pagtukoy ng kinabibilangang kategorya.
Makukuha ito sa pamamagitan ng mga panayam sa mga tao o
grupo ng taong may kinalalaman sa iyong pinag-aaralan. Maaari rin
gumamit ng sarbey ngunit walang kailangang estadistikal na
pamamaraan bagkus ay pagtukoy lamang sa kategoryang
kinabibilangan nito. Maaari rin makuha ang mga datos gamit ang
ethnography isang pamamaraan kung saan ang mananaliksik ay
makikipamuhay sa isang komunidad upang masuri o mapag-aralan
niya ang kaugalian o mga pag-uugali, pamumuhay at kultura ng
mga tao sa isang tiyak na komunidad.

E. Pagsusuri at pagpapakahulugan sa mga datos

Ang pagsusuri at pagbibigay pagpapakahulugan sa mga nakalap na datos ay
isang proseso ng pag-aaral sa mga datos na nakolekta gamit ang angkop na pama-
maraan upang makatulong sa mananaliksik na mabigyan nang angkop na kahulugan
ang mga datos at makabuo ng may katuturang konklusyon.
Sa makatuwid, may mga dapat isagawa bago makabuo ng isang
makabuluhang konklusyon:
 Pag-aanalisa ng mga datos – Ito ang proseso ng pagtukoy,
pagsasalansan at pagbubuod ng mga datos mula sa mga kasagutan ng
mga katanungan na ginamit sa pananaliksik.
 Pagpili ng pamamaraan o disenyo ng pagbibigay ng interpretasyon – Ito
ay makakatulong sa mananaliksik na magkaroon ng kahulugan ang mga
datos numerikal na nakolekta. Dito magaganap ang mga komputasyon
kung ang mga datos ay kwantitatibo at pagbibigay interpretasyon naman
ng mga nakolektang datos kung kuwalitatibong datos ang kailangan
iproseso.
  Maaari gumamit ng mga iba’t ibang graphs o chart upang mas maipakita
ang mga interpretasyon o resulta ng mga nakalap na datos.

F. Pagbuo ng mga konklusyon at rekomendasyon

 Ito ang bahagi ng pananaliksik na ilalahad na ng mananaliksik ang

kabuuang nagging resulta at katuturan ng isinagawang pananaliksik.
 Sa bahagi rin na ito kailangan masagot ang katanungan na “Ano ang
patunguhan ng isinagawang pananaliksik?”.
 Sa huli, kinakailangan magbigay ng mga rekomendasyon upang
magbigay ng mga posibleng kasagutan sa suliranin at magbigay ng
suhestiyon sa pagbuo ng mga bagong programa. Ang bahaging ito ay
makakatulong sa mga susunod na mananaliksik na magtatalakay ng
kaugnay na paksa sa isinagawang pananaliksik.