Alam natin na ang pananaliksik ay isang proseso ng paghahanap ng kasagutan
sa ating mga katanungan o problema. Isa rin itong pamamaraan ng pagpapaunlad ng mga inobasyon at teknolohiya. Ito rin ay ginagamit sa pagtuklas ng mga bagay na maaaring maging kapaki-pakinabang sa lahat. Kung ang pagsasagawa ng pananaliksik ay nakapagdudulot na malaking ambag sa mga mamamayan, hindi ba’t dapat na mas lalo itong pag-igtingin ng ating gobyerno? Hindi ba’t higit na mas magiging kapaki- pakinabang ang talino at galing na mga Pilipino kung ito ay magagamit sa pagdiskubre ng iba’t-ibang bagay at solusyon? Sa ating panahon ngayon kung saan mayroong lumalaganap na pandemya, sa tingin ko ay mas lalong dapat na pag-igtingin ang pananaliksik upang matuklasan ang posibleng bakuna para rito. Ang mga malalaking bansa gaya ng Russia, America, at China ay pawang kumikilos upang madiskubre ang bakunang kokontra sa COVID-19 ngunit bakit tila ang Pilipinas ay naghihintay lamang sa kung anumang matuklasan ng ibang mga bansa? Sa aking mga napapansin, ang ating bansa ay sinusubukan lamang na pigilan pa ang pagkalat ng sakit ngunit hindi pinagbubuti ang pagtuklas para sa bakuna. Sa pagkakataong ito ay marapat na makita ng ating gobyerno kung gaano kahalaga ang pananaliksik sa panahon ng pandemya. Kung mas pag-iigtingin ito ay hindi malabong makatuklas din tayo ng posibleng bakuna laban sa COVID-19 na siyang tatapos sa paghihirap ng buong mundo. Bukod sa pagtuklas ng bakuna, mahalaga ring patuloy na saliksikin ang mga datos hingil sa bilang ng mga tinatamaan ng sakit, mga gumaling dito, at mga nasawi. Ito ay mahalaga upang mas maging alerto ang mga mamamayan sa kung ano na ba ang kalagayan ng bansa. Mahalaga rin ang pananaliksik sa estado ng ating ekonomiya upang malaman kung gaano na kalala ang naidulot ng pandemya. Ito ay nagagamit upang malaman ng gobyerno kung gaano ba karami ang nawalan ng trabaho, naghihirap, at nangangailangan ng pinansyal na tulong. Sa tulong rin ng pananaliksik ay malalaman nila ang mga maaaring gawin upang masolusyunan ang mga problemang ito sa abot ng makakaya habang wala pa ang inaasahang bakuna. Kung sa huli ay makatutuklas tayo ng bakuna sa sakit ay sa tingin ko ay mas magiging produktibo at sisiglang mula ang ekonomiya ng ating bansa na siyang magreresulta sa mas magagandang proyekto na nais isagawa ng mga ahensya ng pamahalaan. Halimbawa na lamang ay ang “Build, Build, Build Program”. Mas makakakilos ang mga manggagawa at mga inhinyero kung walang sakit na kumakalat at mas mapagbubuti ang ginagawang proyekto. Tunay na mahalaga ang pagsasagawa ng pananaliksik dahil sa magandang dulot nito hindi lamang sa bawat indibidwal kung hindi pati na sa buong lipunan. Kung kaya’t hindi natin dapat itong iwaksi at mas dapat na gawing priyoridad. Kung tayo ay magiging masipag at matiyaga, siguradong makapagbibigay tayo ng magandang bunga ng ating pananaliksik. Sana lamang ay huwag itong kaligtaan ng ating pamahalaan dahil alam ko na may malaking maiaambag ang pananaliksik para sa kaunlaran ng ating bayan.