Mga igsuon diha ni Cristo, maayong buntag diha kaninyo!
Niining Ikaduhang Domingo sa Pagkabanhaw, atong gisaulog ang kapistahan sa Diosnong Kaluoy. Ang atong Salmo nag-awit sa Diosnong Kaluoy nga "molungtad hangtod sa kahangturan". Diha sa Ebanghelyo gipakita ni Jesus sa iyang mga tinun-an ang uwat sa samad sa iyang mga kamut ug sa iyang kilid nga gidughang sa bangkaw diin mibuhagay ang dugo ug tubig nga maoy buhing timaan sa iyang busagak nga kaluoy ug gugma alang kanatong mga makasasala. Tungod niini, iyang gigasahan ang iyang mga apostoles sa Espiritu Santo nga naghatag kanila'g gahom sa pagpasaylo sa mga sala. Ang ilang pagtuo sa nabanhawng Ginoo naghiusa kanila sa kasingkasing ug kalag ug nag-aghat kanila sa paghigugma sa usa’g usa. Uban ni Rev. Fr. Banny Pardillo, Jr. DCD nga maoy mangulo sa atong Santos nga Misa karun, manindog kita ug atong awiton ang pasiunang awit. KATILINGBANONG PAG-AMPO P: Bulahan ang mituo bisan wala makakita sa Ginoo.” Mga igsuon,’ bulahan kita nga nagkahiusa karon alang sa pagpadayag sa atong mga panginahanglan kay mituo kita nga ania Siya sa atong taliwala nag-uban ug nagpakabana sa atong mga pag-ampo, moingon kita. Ginoo, dungga ang among pag-ampo. a. Nga ang atong Santo Papa, Obispo, kaparian ug mga layko magmalig-ong mobarug sa kamatuoran nga ang pagtuo sa katawhan sa nabanhaw’ng Cristo maoy nakapausab sa dagway sa kalibutan. Mag-ampo kita sa Ginoo. b. Nga ang nasud Pilipinhon nga nagsaulog sa ika-Lima ka gatos nga katuigan sa Kristiyanismo, mahimong buhing saksi sa nabanhawng Kristo ngadto sa tibuok kalibutan. Mag-ampo kita sa Ginoo. c. Nga ang tanang nabiktima sa kagubot, nagkadaiyang kalamidad ug nakasinati sa mga inhustisya ug walay kaangayan makabaton og lig-ong pagtuo nga ang Dios dili gayod magpasagad ug mobiya kanila. Mag-ampo kita sa Ginoo. d. Nga niining panahon sa pandemya, hinaut nga ang kalooy sa nabanhawng Ginoo maoy mahimo natong kalig-on ug kusog taliwala sa atong mga nasinati karun. Mag- ampo kita sa Ginoo. e. Nga ang atong makanunayong pagsaulog sa Kasaulogan sa Eukaristiya matag Domingo makadugang sa pagpalig-on sa atong pagtuo nga ang Dios nagmakanunayong miduyog kanato sa atong pagpaningkamot nga maangkon ang kalinaw sa atong kinabuhi ug matag pamilya. Mag-ampo kita sa Ginoo. f. Nga ang mga igsuon natong nangamatay, mopahulay na nga malinawon diha sa kalooy sa Dios. Mag-ampo kita sa Ginoo. P: Amahan nga mahigugmaon, dungga ang among mga pag-ampo. Uban sa dakung pagtuo among lauman nga dili nimo kawangon ang among mga panginahanglan sa kinabuhi. Kini among gipangayo ug gilauman nga madawat pinaagi ni Cristo among Ginoo ug Manluluwas. Amen.