PASIUNA: Maayong buntag sa tanan! Niining Ikanapulo’g pito nga Dominggo sa ordinaryong panahon, atong madungo’g sa atong mga pagbasa nga ang atong Ginoo motagbaw sa atong kagutom. Diha sa pagpadaghan sa pan, gipadayag ni Jesus ang Iyang kaugalingon isip maghahatag ug pan ngadto sa gigutom. Siya mao magtatagbaw sa atong kagutom. Kining maong timaan iyang gigamit aron Iyang mapadayag nga Siya mao ang atong kalan-on, dili lamang sa lawas, apan labi na sa kalag.
Palihug manindog ang tanan ug atong dawaton si Jesus dinhi
niining Santos nga Misa. PANGAMUYO SA KATILINGBAN P: Mag-ampo kita ngadto sa atong Amahan aron mapuy-an ta ang Diosnong bahandi ug gugma ug mahipatik sa atong tagsa-tagsa ka kasingkasing. Busa sa matag pangamuyo moingon kita: GINOO, IPADANGAT KANAMO ANG IMONG GUGMA. a. Alang sa atong Simbahan, nga iya untang mabatunan ang mga bahandi ug hiyas ni JesuCristo diha sa iyang pagsangyaw sa Maayong Balita. Mag-ampo kita sa Ginoo. b. Alang sa mga lideres sa atong nasud nga modan-ag unta kanila ang pagkamatinud-anon nga alagad sa katilingban. Mag-ampo kita sa Ginoo. c. Alang sa mga biktima sa inhustisya nga magmaisugon ug magmalaumon unta sila sa pagbarog alang sa kamatuoran ug mabatunan nila ang himaya nga naangkon sa atong Ginoong JesuCristo. Mag-ampo kita sa Ginoo. d. Alang sa mga masakiton ug sa mga nagkinahanglan sa panabang sa uban, nga ila untang masinati ang kabaskog ug kahupayan sa ilang pag-antus. Mag-ampo kita sa Ginoo. e. Alang sa katukuran sa St. John Paul II College Seminary, nga kini magmalampuson diha sa grasya ug panalangin sa Dios. Mag-ampo kita sa Ginoo. f. Alang kanatong tanan, nga ato untang mapaambit ngadto sa uban ang mga bahandi nga atong gihuptan og sa ingon niini atong mapalambo ang gugma ug kaayo sa Dios dinhi sa atong matag pamilya ug katilingban. Mag-ampo kita sa Ginoo. P: Amahang Langitnon, gipakita Mo kanamo ang dalan padulong sa pag- angkon sa Imong bahandianong gugma ug kahupayan diha sa Imong Anak nga si JesuCristo. Dungga ang among mga pangamuyo aron mahiusa kami sa Imong gugma. Kini among gipangayo pinaagi ni Cristo among Ginoo. Amen.