TAMDANAN ALANG SA

DALAN SA KRUS

KWARESMA 2022

PASIUNANG AWIT :

DLC-Kwaresma2022 Page 1
Pangulo : Sa ngalan sa Amahan, sa Anak ug sa Espiritu Santo.
Amen.

Kita nga mga sumusunod ni Kristo diha sa atong pagtoo, maka-nunayon nga nag-
gahin og panahon alang gayud sa pagsaulog niining Dalan sa Krus, diin mamalandong kita
sa dakong gugma sa Dios alang kanato. Kining Dalan sa Krus nga atong subayon maoy
dalan ngadto sa atong kahimayaan uban sa Dios. Mag-andam kini sa atong kasingkasing
sa pagpalawom pa sa atong pagtoo ni Jesus. Kining atong pag-gahin og higayon sa
pagsunod ni Jesus sa dalan sa Krus magpahinumdum kanato sa Misyon nga gipaambit
Niya kanato. Ang samang Misyon nga lawom natong gipamalandongan niadtong niaging
tuig ug padayon ang hagit kanato karong tuig ilabina sa Sinudo nga gipatigayon karon.
Mao nga bisan sa kalisod tungod sa COVID pandemya angayan lamang gayud kita
magpasalamat ug mag-ampo uban ni Jesus diha sa tanyag kanato sa Iyang misyon sa
kaluwasan. Apil gayud sa atong mga pag-ampo ang atong matag pamilya nga kini lig-
onon ug panalanginan ilabi na diha sa pagsulay sa kalisod. Ug ilabina sa padayon nga pag-
ampo alang sa tanang binunyagan nga padayon natong puy-an ang atong misyon diha sa
kinabuhing kristohanon uban sa pagtoo ug paghigugma sa Dios.

PAGBASA : (Mt 16:24)

Ang Pagbasa sa ebanghelyo sumala ni San Mateo.

Ang buot mamahimong akong tinun-an kinahanglan nga hikalimtan niya ang iyang
kaugalingon pas-anon niya ang Iyang krus ug mosunod Kanako.

Ang ebanghelyo sa Ginoo.

PAG:AMPO :
Langitnong Amahan amo nang gisugdan ang pagsubay sa Dalan nga gilaktan ni
Jesus. Lisod man kini, apan mao kini ang hagit sa pagsunod ni Kristo. Ubani kami Ginoo
sa among buhaton karon.

Awit : (Samtang nagpadulong sa Estasyon sa Krus.)

DLC-Kwaresma2022 Page 2
 UNANG ESTASYON

SI JESUS NANIHAPON SA KATAPUSANG HIGAYON UBAN SA MGA TINUN-AN

Pangulo : Nagasimba kami kanimo, O Kristo ug nagadayeg Kanimo.

Tanan : Kay tungod sa Imong balaan nga Krus gitubos Mo ang kalibutan.

Pagbasa : (Markos 14: 22ff)

Ang Pagbasa sa Ebanghelyo sumala ni San Markos

Samtang nangaon sila, mikuha si Jesus sa Pan, nagpasalamat ug

gipikaspikas Niya kini ug gihatag ngadto sa Iyang mga tinun-an. Kan-a ninyo kini” miingon
Siya. “Kini mao ang Akong lawas.” Unya gikuha Niya ang kupa, gipasalamatan ang Dios
ug mitunol kanila ug silang tanan nanginom niini. Miingon si Jesus, “Kini mao ang Akong
dugo nga giula sa daghan, ang dugo nga naglig-on sa kasabutan.”

Ang ebanghelyo sa Ginoo.

Pamalandong:
Ang tema sa tuig sa Misyon mao kini: ‘GIFTED TO GIVE.’ Buot ipasabut nga kita
gigasahan aron kita usab mo hatag sa uban. Sama ni Kristo nga mihatag sa iyang
kaugalingon diha sa iyang pag pikas pikas sa pan ug pag hatag sa iyang dugo ngadto sa
iyang mga tinun-an. Makahuluganon kaayo kini nga buhat ni Jesus nga angayan atong
pamalandongan. Ug kini nagpunting sa Dios nga unang naghatag kanato sa Iyang Bugtong
Anak alang sa atong kaluwasan. Si Jesus nagpakatawo ug mitugyan sa Iyang kaugalingon
lawas ug kalag alang sa atong kaluwasan. Ug gihimo Niya nga makaambit kita niini pinaagi
sa Sakra-mento sa Eukaristiya. Ang Dios mao gayud ang tinubdan sa grasya nga nadawat
sa unang mga misyonero nga ila usab gipaambit kanato. Ug dako ang atong kalipay sa
pagtoo nga atong naambitan gikan sa Dios tungod kanila. Mao nga angayan lamang
magpasalamat kita kanila nga mga unang misyonero tungod sa ilang dakong sakripisyo sa
pagmantala sa ebanghelyo ug pag-paambit sa pagtoo. Naghagit gayud usab kini kanato sa
paghimo sumala sa ilang gihimo. Human kita makadawat sa grasya sa pagtoo, ipaambit
usab nato kining maong pagtoo ngadto sa atong isigkatawo.

Pag-ampo:
Mag-ampo kita. Ginoo, gipadayag Mo kanamo ang Imong paghigugma pinaagi sa
pagtugyan ni Jesus lawas ug dugo alang kanamo. Himoa kami nga kanunay
manggihatagon alang sa kaayohan sa tanan. Amen.

Amahan Namo….
Maghimaya ka Maria….
Himaya sa Amahan..

Awit:

DLC-Kwaresma2022 Page 3
 IKADUHANG ESTASYON

SI JESUS NAG-AMPO DIDTO SA TANAMAN SA GETSEMANI

Pangulo : Nagasimba kami Kanimo, O Ginoo ug nagadayeg Kanimo

Tanan : Kay tungod sa Imong balaan nga Krus gitubos Mo ang kalibutan.

Pagbasa : (Lukas 22:40ff)

Ang Pagbasa sa Ebanghelyo sumala ni San Lukas

Si Jesus ug ang Iyang tinun-an nahiabot sa tanaman sa Getsemani. Si

Jesus miingon,” pag-ampo kamo aron dili kamo madaog sa panulay.” Unya mipalayo Siya
kanila sa gilay-on nga maabot sa paglabay sa bato ug miluhod Siya ug nag-ampo.
“Amahan,” miingon Siya, “Kon buot ka, kuhaa kining kupa gikan kanako. Apan dili ang
akong pagbuot, kondili ang Imo ang matuman.”

Ang ebanghelyo sa Ginoo.

Pamalandong:
Dili ikalimod nga ang matag tawo gusto magpuyo nga gawasnon. Dili kita gusto nga
gawngan sa uban. Dili kita gusto nga adunay magbuot unsay gusto natong buhaton sa
atong kaugalingon. Si Jesus tawo nga hingpit nga gawasnon tungod kay hingpit Niyang
gisunod ang kabubut-on sa Iyang Amahan. Si Maria nga atong Inahan nahimong hingpit
nga gawasnon tungod sa iyang hingpit nga pagtuman sa kabubut-on sa Dios. Ang mga
misyonero nga misunod sa kabubut-on sa Dios sa ilang kinabuhi nagpuyo nga gawasnon
ug malipayon diha sa pagtuman sa ilang misyon. Mga igsoon, ang tentasyon sa
kristohanong pagpuyo mao ang pagpuyo nga kita lamang ang magbuot unsay atong
gustong buhaton. Kon tinuod kita nga kristohanon mosunod kita sa misyon nga gihatag
kanato sa Dios. Kon tinuod kita nga kristohanon mosunod kita sa gihimo ni KRISTO sa
iyang pag-ampo “Amahan, kon buot ka, kuhaa kining kupa gikan kanako. Apan dili ang
akong pagbuot, kondili ang Imo ang matuman.”

Pag-ampo:
Mag-ampo kita. Ginoo, daghan kaayo ang higayon nga kami nagkulang sa pagtuman
sa imong pagbuot. Himoa kaming sama ni Jesus makanunayon nagtuman sa Imong mahal
nga kabubut-on. Amen.

Amahan Namo…
Maghimaya ka Maria….
Himaya sa Amahan…

Awit:

DLC-Kwaresma2022 Page 4
 IKATULONG ESTASYON

SI JESUS GITARAL ATUBANGAN NI PILATO

Pangulo : Nagasimba kami Kanimo, O Kristo ug nagadayeg Kanimo.

Tanan : Kay tungod sa Imong balaan nga Krus gitubos Mo ang kalibutan.

Pagbasa : (Lukas 23:1ff)

Ang Pagbasa sa ebanghelyo sumala ni San Lukas

Ang tanan mitindog ug gidala nila si Jesus sa atubangan ni Pilato ug

didto gisumbong nila Siya; sila miiingon, “Kining tawhana hisakpan namo nga nagpasalaag
sa atong mga tawo ug nag-awhag kanila sa dili pagbayad og buhis ngadto sa Emperador ug
miangkon nga Siya mao ang Mesiyas, usa ka Hari. Si Pilato nangutana Kaniya, “Ikaw ba
ang hari sa mga Judiyo?” Si Jesus mitubag, “Giingon mo.” Unya miingon si Pilato sa mga
kadagkoan sa mga pari ug sa mga tawo, “wala akoy nakaplagang hinungdan nga silutan
kining tawhana.”

Ang ebanghelyo sa Ginoo.

Pamalandong:
Si Kristo ang atong modelo isip mga maayong Kristiyano. Ang pag-puyo sa
kinabubing kristiyano mao ang pag likay sa dautan ug ang paghimo sa maayo. Si Pilato
gusto mahimo nga maayong tawo pinaagi sa iyang pagpanghunaw sa ilang sumbong. Apan
wala gyud siya maningkamot pagpahunong sa bakak nga sumbong batok kang Jesus. Apil
siya sa paghukom batok sa kamatuoran. Dautan ang paghilum lamang atubangan sa
sayop nga sumbong. Kita dili gayud makapanghunaw sama sa gihimo ni Pilato sa mga
panginahanglan sa atong mga igsoon nga nag-ilaid sa kalisod. Dili kita makapanghunaw sa
atong pagtabang sa atong umaabot nga PINILIAY 2022 nga mahimong limpyo ug katuohan
nga piniliay. Dili kita makapanghunaw pagdapig alang sa kaayo sa atong kinaiyahan.
Buhaton gayud nato ang misyon ngagisangon kanato tungod sa bunyag.

Pag-ampo:
Mag-ampo kita. Ginoo sa kamatuoran, Ikaw man ang tuburan sa tanan nga maayo.
Himoa kaming maayo atubangan Kanimo ug sa among isigkatawo. Pinaagi sa among
pagtabang sa among kaigsoonan nga anaa sa tumang kalisod tungod sa pagdagmal kanila
sa uban. Amen.

Amahan Namo…
Maghimaya ka Maria…
Himaya sa Amahan…

Awit:

DLC-Kwaresma2022 Page 5
 IKAUPAT NGA ESTASYON

SI JESUS GIPAANTUS UG GIPURONGPURONGAN OG TUNOK

Pangulo : Nagasimba kami Kanimo, O Kristo ug nagadayeg Kanimo.

Tanan : Kay tungod sa Imong balaan nga Krus gitubos Mo ang kalibutan.

Pagbasa : (Juan 19:1-3)

Ang Pagbasa sa Ebanghelyo sumala ni San Juan

Unya gikuha ni Pilato si Jesus ug Iyang gipalatos. Ang mga sundalo

naghimo’g purongpurong sa mga sangang tunukon ug gipahaum nila sa ulo ni Jesus.
Gisul-oban nila Siya og sapot nga dagtom pula ug nanuol sila Kaniya ug miingon, “Mabuhi
ang hari sa mga Judiyo! Ug Siya ilang gisagpa.

Ang ebanghelyo sa Ginoo

Pamalandong:
Atong nasayran sa katekismo nga ang sentro nga pagtulon-an ni Jesus mao gayud
ang paghigugma sa Dios ug sa atong isigkatawo. Kon sa mga Pariseo ug Saduceo gibulag
kining duha, apan kang Jesus gisumpay kini. Buot ipasabot nga dili kita makahigugma sa
Dios kon atong gikasilagan ang atong isigkatawo. Sa atong paghigugma sa Ginoo nga dili
makita pinaagi sa atong paghigugma sa atong kaigsoonan nga makita. Apil niining
paghigugma ang pagpasaylo. Sa paghigugma sa Dios kanato gipasaylo Niya ang atong
kasal-anan. Mao nga gipadala Niya ang Iyang Bugtong Anak si Jesus aron pagluwas
kanato. Mao nga bisan gidagmalan Siya, gilatos, giyagayagaan ug gipaantus sa pagpas-an
sa Krus, Iyang gipasaylo ang ilang kasal-anan. Lisod ang paghigugma. Lisod ang
pagpasaylo. Apan mao kini ang hagit ni Jesus kanato. Mao kini ang atong misyon: ang
paghigugma sa atong isigkatawo. Mahigugma kita sa Dios kinahanglan mahigugma gayud
kita sa atong isigkatawo ilabina sa mga sinalikway ug makaluluoy.

Pag-ampo:
Mag-ampo kita. Ginoo, sa mga higayon nga anaa ang kasilag ug kapungot diha sa
among kasingkasing, wagtanga kini og ipuli ngari kanamo ang Imong grasya sa gugma ug
kalooy alang sa tanan. Amen.

Amahan Namo….
Maghimaya ka Maria…
Himaya sa Amahan…

Awit:

DLC-Kwaresma2022 Page 6
 IKALIMA NGA ESTASYON

GIPAS-AN NI JESUS ANG KRUS

Pangulo : Nagasimba kami Kanimo, O Kristo ug nagadayeg Kanimo.

Tanan : Kay tungod sa Imong balaan nga Krus gitubos Mo ang kalibutan.

Pagbasa : (Juan 19:17)

Ang pagbasa sa ebanghelyo sumala ni San Juan

“Si Jesus migula sa siyudad sa Jerusalem nga nagpas-an sa Krus ug miabot sa dapit
nga gihinganla’g Golgotha.”

Ang ebanghelyo sa Ginoo.

Pamalandong:
Sa atong kinabuhing magtutuo nag pas-an kita ug krus nga nagkadaiya. Ug kini dili
na kahoy nga krus karong panahona. Ang mga kabus nga ginikanan adunay krus diha sa
ilang pagmatutu sa ilang mga anak. Bug-at nga krus alang kanila ang pagpanalipod sa
ilang mga anak batok sa kahilayan ug sa mga druga. Adunay mga asawa nga ang ila
mismong bana maoy krus nila tungod kay naulipon sa bisyo. Bug-at nga krus nga pas-
anon ang kasakit kon ang managsoon ug managsilingan magkaaway ug dili na
managhigalaay. Mga igsoon, si Jesus ang ating panig-ingnan nato diha sa atong pagdawat
ug pagpas-an sa atong mga krus. Ang dakong timaan nga nagasunod kita kaniya isip
magtutuo mao ang krus nga gihatag Niya kanato. Ang kaanindot kay bisan unsa kabug-at
ang krus nga atong gipas-an ingon niana usab kadako ang grasya sa Dios nga gihatag
kanato. Ug uban sa masaligon nga pag-ampo maghatud kanato ngadto sa himaya sa
langit. Busa luyo sa mga kasakit nga atong nahiaguman, anaa ang kalipay. Mao nga dili
nato isalikway ang Krus. Dawaton nato kini ug pas-anon sa tumang pag paubos.

Pag-ampo:
Mag-ampo kita. O Ginoo, sa mga higayon nga kami adunay mga krus o kabug-at sa
among kinabuhi nga daw dili na namo mapas-an kini, tabangi intawon kami nga malig-on
mopas-an sa maong krus sa among pagsunod Kanimo hangtud moabot kami sa himaya sa
langit. Amen.

Amahan Namo….
Maghimaya ka Maria….
Himaya sa Amahan…

Awit:

DLC-Kwaresma2022 Page 7
 IKAUNOM ESTASYON

NAHISUKAMOD SI JESUS

Pangulo : Nagasimba kami Kanimo, O Kristo ug nagadayeg Kanimo.

Tanan : Kay tungod sa Imong balaan krus gitubos Mo ang Kalibutan.

Pagbasa : (1Cor. 1:27ff)

Ang Pagbasa sa Unang Sulat ni San Pablo ngadto sa taga-Corinto

Gituyo sa pagpili sa Dios ang giisip sa mga tawo nga walay kapuslanan
aron pagpakaulaw sa mga maalamon, ug gipili Niya kadtong giisip nga huyang aron
pagpakaulaw sa mga tawong gamhanan. Gipili Niya ang mga sinalikway ug tinamay ug ang
gipakawalay bili sa mga tawo aron pagpa- ila nga walay bili ang giisip nga mahinungdanon
sa mga tawo aron wala gayo’y makapagarbo sa atubangan sa Dios. Apan kamo gihiusa sa
Dios kang Kristo Jesus, ug gihimo niya si Kristo nga atong kaalam.

Ang pulong sa Ginoo.

Pamalandong:
Sa tinuoray, ang tawo nilambo ug molambo pa tungod sa tabang sa uban. Walay
kamatuoran ang panultihon nga “I am a self-made man.” Kita produkto sa sakripisyo ug
gugma sa atong mga ginikanan. Ug nilambo kita sa atong kahibalo tungod sa mga
magtutudlo sa eskwelahan. Ug nilambo kita sa atong pagtoo tungod sa pagpaambit niini
gikan sa nahiunang mga misyonero. Tungod niini angayan lamang nga magpasalamat
gayud kita sa Dios ug sa atong isigkatawo kay sila maoy nakatabang kanato nga maingon
niini kita karon. Patay ang tawo kon walay nitabang kanato. Mga igsoon, bisan si Jesus
Dios, gipakita Niya nga kita nanginahanglan sa tabang sa uban ug ilabina sa Dios diha sa
atong pagsunod Kaniya. Ang pagkasukamod ni Jesus dili timaan sa kapildihan kondili
nagpakita kanato nga mosalig gayud kita sa Dios ug mangayo sa Iyang panabang.
Magmapa-ubsaon unta kita sa Dios diha sa atong kakulangan ug panginahanglan.

Pag-ampo:
Mag-ampo kita. Ginoo, Ikaw ra gayud ang among kadangpan. Ipahilayo kami sa
tentasyon sa garbo aron makanunayon kami mosalig Kanimo diha sa pagsunod sa Imong
Anak nga si Jesus, among Manluluwas. Amen.

Amahan Namo…..
Maghimaya ka Maria…..
Himaya sa Amahan….

Awit:

DLC-Kwaresma2022 Page 8
 IKAPITO NGA ESTASYON

SI SIMON NGA TAGA CIRENE MITABANG KANG JESUS

Pangulo : Nagasimba kami Kanimo, O Kristo ug nagadayeg Kanimo.

Tanan : Kay tungod sa Imong balaan nga krus gitubos Mo ang kalibutan.

Pagbasa : (Mateo 27:32ff)

Ang Pagbasa sa ebanghelyo sumala ni San Mateo

Sa ilang pagpanggula sa siyudad hisugatan nila ang usa ka tawong

ginganla’g Simon nga taga-Cirene. Ug gipugos nila siya sa pagpas-an sa Krus ni Jesus.
Unya nahiabot sila sa usa ka dapit nga ginganla’g Golgota, nga sa ato pa, “ang dapit sa
mga kalabera.”

Ang ebanghelyo sa Ginoo.

Pamalandong:
Ang pandemya nga COVID 19 nagdala og dakong hulga sa kinabuhi ug sa
panginabuhi sa tawo.. Daghan kaayo ang nangamatay ug nawad-an ug panginabuhian
tungod niini. Daw wala nay kapaingnan ang mga tawo. Daghan moingon nga kastigo na ba
kini sa Dios? Mao na ba kini ang katapusan sa kalibutan? Bisan pa man sa kalisod sa
kinabuhi nga atong nasinati karon nagpabilin gihapon ang pagtoo ug paglaum sa Dios nga
maoy naghatag og kadasig ug kalig-on sa pagpadayon. Bisan pa man niing kasinatian nga
atong natagamtam daghan pa gihapong mga tawo ang madasigon nga mipagtanyag sa ilang
tabang isip mga gitawag og frontliners. Daghan ang mga tawo nga nadani ngadto sa
pagkamanggihatagon sa ilang mga kabtangan. Daghan mga pamilya nga nagkahiusa sa
pagpuyo sa pag ka maampoon. Tukma kaayo ang kanta nga nagkanayon “We heal as one.”
Ug kini natuman kay ang Dios anaa man kanato ug naga uban siya kanato. Wala diay
imposible kon mosalig kita sa Dios. Walay kalisod nga dili masulbad pinaagi sa gahum sa
Dios. Mao nga mosalig ug motuo kita kanunay sa Dios diha sa panahon sa kalisod sa
atong kinabuhi.

Pag-ampo:
Mag-ampo kita. Ginoo, humoka kanunay ang among mga galamhan aron sama ni
Jesus, Imong bugtong Anak motabang kami nga mahaw-as kami sa kahakog ug
mamahimo na nga manggihatagon sa uban. Amen.

Amahan Namo…
Maghimaya ka Maria…
Himaya sa Amahan…

Awit:

DLC-Kwaresma2022 Page 9
 IKAWALO NGA ESTASYON

ANG MGA BABAYE SA JERUSALEM NANGHILAK ALANG KANG JESUS

Pangulo : Nagasimba kami Kanimo, O Kristo ug nagadayeg Kanimo.

Tanan : Kay tungod sa Imong balaang nga Krus gitubos Mo ang kalibutan.

Pagbasa : (Lukas 23:27ff)

Ang Pagbasa sa Ebanghelyo sumala ni San Lukas

May dakong panon sa mga tawo nga misunod kang Jesus ug pipila nila
mga babaye nga naghilak ug nagminatay tungod kaniya. Unya milingi si Jesus kanila ug
miingon, “mga babaye sa Jerusalem! Ayaw ako ninyo’g hilaki, hinoon hilaki ninyo ang
inyong kaugalingon ug ang inyong mga anak.”

Ang ebanghelyo sa Ginoo.

Pamalandong:
Sa mga gimbuhaton ni Jesus sa pagsangyaw sa Maayong Balita, apil niini ang mga
kababayen-an. Si Jesus naghatag kanila’g dignidad. Dili sama sa mga Pariseo nga wala
maghatag kanila niining maong dignidad. Ang mga babaye alang sa mga Pariseo walay
dako nga ikatampo sa sociodad. Mga igsoon, ang mga babae sa Jerusalem nanghilak. Buot
nila unta nga santaon ang kamatayon ni Jesus sa Krus. Apan si Jesus determinado na sa
pagsunod sa kabubut-on sa Iyang Amahan. Giingnan Niya sila. “Ayaw ako ninyo hilaki.
Hilaki hinoon ninyo ang inyong kaugalingon ug inyong mga anak.” Dinhi atong masabot
nga dili lang paghilak ang mabuhat sa mga babaye apan dako ang matampo nila diha sa
katilingban. Ang ilang aktibong paglihok uban sa lig-on nga paghukom napamatud-an na
karon tungod sa ilang kahanas ug talento. Daghan ang kababayenhan naglihok sa
simbahan ug sa sociodad (pribado man o publiko). Angayan nga ipadayon nila ang
nasugdan na nga paglig-on sa ilang katungod ug dignidad.

Pag-ampo:
Mag-ampo kita. Ginoo, Ikaw ang Dios sa tanan. Himoa nga kaming imong katawhan
magmalig-on diha sa among pagsunod sa kasakit ni Jesus dili lang sa kaguol kondili diha
sa paglihok aron makatabang sa mas nanginahanglan nato nga mga kaigsoonan. Amen.

Amahan Namo…
Maghimaya ka Maria…
Himaya sa Amahan..

Awit:

DLC-Kwaresma2022 Page 10
 IKASIYAM NGA ESTASYON

SI JESUS GIHUKASAN SA IYANG SAPOT UG GILANSANG SA KRUS

Pangulo : Nagasimba kami Kanimo, O Kristo ug nagadayeg Kanimo.

Tanan : Kay tungod sa imong balaan nga Krus gitubos Mo ang kalibutan.

Pagbasa : (Markos 15: 22ff)

Ang pagbasa sa Ebanghelyo sumala ni San Markos

Gidala nila si Jesus sa usa ka dapit nga ginganlag Golgotha nga sa ato
pa “ang dapit sa mga kalabera.” Ug didto misulay sila og paghatag kaniyag bino nga
sinagulan og tambal nga ginganlag mira. Apan midumili si Jesus sa pag-inom niini. Unya
gilansang nila Siya sa Krus ug gibahinbahin ang Iyang sapot ug nagripa sila kon unsang
bahina sa sapot ni Jesus ang ilang maangkon.

Ang ebanghelyo sa Ginoo.

Pamalandong:
Ang kapungot ug kasuko nga anaa sa kasingkasing sa mga kaaway ni Jesus
nagpasulabi na kaayo. Gani, sa wala pa nila Siya hunosi sa kinabuhi ilang gipahamtang
Kaniya ang pagkuha sa Iyang dignidad isip tawo pinaagi sa paghukas sa Iyang sapot. Wala
sila nasayod nga walay si bisan kinsa makakuha niini kondili ang Dios nga maoy naghatag
niini Kaniya. Mga igsoon, ang kabililhon sa kinabuhi ug dignidad sa tawo gasa gayud sa
Dios. Mao nga angayan lang nga kini atimanon, respetohan, palamboon! Bisan dakong
makasasala ang tawo, wala kitay katungod nga patyon siya. Bisan kinsa nga drug-addict o
drug-pusher, walay si bisan kinsa ang gitugotan sa pagpatay kanila. Dinhi makita gayud
nato ang pagkamahigugmaon ug pagkamapasayloon sa Dios. Kita usab gitawag ug gidapit
sa samang kinaiya Niya. Mosunod kita sa gawi ni Jesus diha sa Iyang kalooy, pagpasaylo
ug gugma ngadto sa tanan nga nagpasipala Kaniya.

Pag-ampo:
Mag-ampo kita. Ginoo, nga maoy tag-iya sa among kinabuhi ug dignidad. Himoa,
nga kami nga Imong gigasahan niining kinabuhi ug dignidad mag-atiman niini, ug
morespeto niini aron molambo pa kini diha sa Imong grasya ug panalangin. Amen.

Amahan Namo…
Maghimaya ka Maria…
Himaya sa Amahan….

Awit:

DLC-Kwaresma2022 Page 11
 IKANAPULO NGA ESTASYON

GIPASALIGAN NI JESUS OG KALUWASAN ANG MAHINULSULON NGA KRIMINAL

Pangulo : Nagasimba kami Kanimo, O Kristo ug nagadayeg Kanimo.

Tanan : Kay tungod sa Imong balaan nga Krus gitubos Mo ang kalibutan.

Pagbasa : (Lukas 23:39ff)

Ang pagbasa sa Ebanghelyo sumala ni San Lucas

Usa ka kriminal nga nagbitay sa Krus tupad ni Jesus nagbugalbugal

Kaniya. “Dili ba Ikaw mao ang Mesiyas?” Luwasa ang Imong kaugalingon ug kami. Apan
gibadlong siya sa iyang kauban nga nag-ingon kita ania dinhi gisilutan sa mao rang silot.
Apan ang silot natong duha angay ug sibo kanato. Kay gisilutan man kita sumala sa atong
nahimo. Apan Siya walay sala.” Ug miingon siya kang Jesus, hinumdumi intawon ako kong
maghari ka na! Miingon si Jesus kaniya. “Sultihan ko ikaw, karong adlawa adto ka sa
paraiso uban Kanako.”

Ang ebanghelyo sa Ginoo.

Pamalandong:
Ang malangkubong misyon sa kaluwasan sa kalag ug kalingkawasan sa Lawas
nagpadayon hangtud karon. Kabubut-on sa Dios nga luwason ang tawo sa iyang
kinatibuk-ang lawas ug kalag. Mao nga sa atong pagtabang sa tawo tabangan nato siya sa
iyang kinatibuk-an. Dili kita makaingon nga ania akong tabang alang sa imong lawas o
moingon kita nga ania akong tabang alang sa imong kalag. Dili gayud! Sa atong pagtabang
sa tawo nga nanginahanglan motabang kita alang sa tibuok tawo. Mao kini ang hinungdan
ngano nga diha sa atong pagsaulog ug pagdawat sa mga sakramento dili lang kini
magpabilin sulod sa simbahan, mobunga unta kini og maayong buhat ngadto sa
isigkatawo. Ang ebanghelyo nga atong nadungog sa simbahan, atong ipadayag unta sa
atong pamilya ug ngadto na sa katilingban. Ang misyon nato mao gayud ang pagdugtong
sa pulong sa Dios ngadto sa mga maayong gawi ug buhat alang sa kaayohan sa atong
isigkatawo.

Pag-ampo:
Mag-ampo kita. Ginoo, sa among pagdawat sa misyon sa among kinabuhi himoa nga
tumanon namo kini tugob sa kadasig ug pagsalig Kanimo. Amen.

Amahan namo…
Maghimaya ka Maria..
Himaya sa Amahan..

Awit:

DLC-Kwaresma2022 Page 12
 IKANAPULO’G USA NGA ESTASYON

SI MARIA UG SI JUAN NAGBAROG DIDTO SA TIILAN SA KRUS NI JESUS

Pangulo : Nagasimba kami Kanimo, O Kristo ug nagadayeg Kanimo.

Tanan : Kay tungod sa Imong balaan nga Krus gitubos Mo ang kalibutan.

Pagbasa : (Juan 19:25-27)

Ang Pagbasa sa Ebanghelyo sumala ni San Juan

Duol sa Krus ni Jesus nagtindog ang Iyang inahan ug ang igsoon sa

Iyang Inahan ug si Maria nga asawa ni Cleopas ug si Maria Magdalena. Sa pagkakita ni
Jesus sa Iyang inahan ug sa tinun-an nga gimahal Niya nga nagbarog didto miingon siya
sa Iyang inahan, “Babaye, ania ang Imong Anak.” unya miingon siya sa tinun-an, “Ania
ang Imong inahan.” Sukad niadto gipatipon si Maria sa pagpuyo sa tinun-an.

Ang ebanghelyo sa Ginoo.

Pamalandong:
Ang gihimo ni Jesus sa wala pa Siya kabugtui sa gininhawa mao gayud ang
pagpahiluna sa Iyang inahan ug ni Juan nga Iyang gimahal. Si Maria iyang gitugyan kang
Juan. Ug si Juan ngadto kang Maria. Sa lawom nga pagsabut niini, si Maria nga inahan sa
simbahan gitugyan ni Jesus kanatong tanan aron atong mahalon ug sundon ang birtud
Niya sama sa gihimo ni Juan. Mga igsoon, ang atong debosyon kang Maria nakatabang
kaayo sa paglig-on sa atong pagtoo. Daghan sa atong mga katawhan nga moataki kanato
niining atong pag-ampo sa rosaryo uban sa atong inahan. Apan dili gyud mapugngan kay
lagi gihigugma na gayud nato ang atong Inahan nga si Maria. Mao nga giingon didto sa PCP
II “pueblo amante de Maria.” “People in love with Mary.” Ug dili lang kay kita nahigugma
sa atong inahan si Maria, siya usab mas nahigugma kanatong tanan. Ug motabang si
Maria sa pagtuman sa atong misyon sa kinabuhi.

Pag-ampo:
Mag-ampo kita. Ginoo, hatagi kami sa grasya sa pagkamaunongon sama kang Maria.
Ug himoa kaming mahigugmaon sama kang Juan aron sama kanila makatuman kami sa
misyon nga gisangon kanamo. Amen.

Amahan Namo…
Maghimaya ka Maria…
Himaya sa Amahan…

Awit:

DLC-Kwaresma2022 Page 13
 IKANAPULO’G DUHA NGA ESTASYON

SI JESUS NAMATAY

Pangulo : Nagasimba kami Kanimo, O Kristo ug nagadayeg Kanimo.

Tanan : Kay tungod sa Imong balaan nga Krus gitubos Mo ang kalibutan.

Pagbasa : (Juan 19:28-30)

Ang Pagbasa sa Ebanghelyo sumala ni San Juan.

Human niini, si Jesus nga nasayud nga ang tanan natuman na, ug aron
pagtuman sa kasulatan miingon, “giuhaw ako!” Didto may usa ka panaksan nga puno sa
suka ug gibutang sa usa ka sanga sa isupo, ug giisa nila kini ngadto sa iyang baba.
Human makatilaw si Jesus sa suka miingon Siya, “Natapos na!” Unya miduko Siya ug
namatay.

Ang ebanghelyo sa Ginoo.

Pamalandong:
Usa sa tulukibon kaayo nga pulong ni Jesus sa atong gibasa karon nga ebanghelyo
mao gayud ang pulong “giuhaw ako.” Yano kaayo nga pulong apan lawom kini’g dulot sa
matag usa kanato. “Giuhaw ako” sa imong pagpangga ug pagmahal nga maoy makapugong
sa imong kapungot ug kasilag Kanako. “Giuhaw ako” sa imong kinasingkasing nga pag-
atiman sa kaayo ug grasya nga kanunay gibubu ngari kanato. Giuhaw ako sa imong
mainitong pag-alagad sa mga tawo nga kabus pinaagi sa pagtuman sa misyon nga
gisangon sa matag usa kanato sa Dios isip mga binunyagan. “Giuhaw ako” sa imong
makanunayon nga pag-ampo sa adlaw’ng Domingo. Giuhaw ang Dios sa atong pagbag-o sa
kinabuhi diha kaniya. Giuhaw ang Dios sa atong pagkamatinud-anon nga pangulo sa
atong Gagmayng Kristohanong Katilingban. Giuhaw ang Dios sa atong pagpinasayloay ug
panaghiusa sa tanan natong mga kaigsoonan. Giuhaw ang Dios sa pagpinasayloay sa mga
pamilya nga nagkabangi ug nagkabulag nga magtiayon. Giuhaw ang Dios sa atong
pagtuman sa misyon nga gisangon kanato.

Pag-ampo:
Mag-ampo kita. Ginoo, Imo kaming gihagit kanunay sa pagbag-o sa among kinabuhi.
Itugot ang katumanan niining among paningkamot nga makasunod kami sa panig-ingnan
ni Jesukristo nga among Manluluwas. Amen.

Amahan Namo…
Maghimaya Ka Maria…
Himaya sa Amahan…

Awit:

DLC-Kwaresma2022 Page 14
 IKANAPULO’G TULO NGA ESTASYON

ANG PATAY’NG LAWAS NI JESUS GIPAHIMUTANG SA LUBNGANAN

Pangulo : Nagasimba kami Kanimo, O Kristo ug nagadayeg Kanimo.

Tanan : Kay tungod sa Imong balaan nga Krus gitubos Mo ang kalibutan.

Pagbasa : (Juan 19:38ff)

Ang Pagbasa sa Ebanghelyo sumala ni San Juan.

Human niini si Jose nga taga-Arimatea mihangyo kang Pilato nga

kuhaon niya ang lawas ni Jesus. (Si Jose usa ka sumusunod ni Jesus, apan sa tago
lamang kay nahadlok man siya sa mga kadagkoan sa mga Judiyo). Gitugotan siya ni Pilato,
busa miadto si Jose ug gikuha ang lawas ni Jesus. May usa ka tanaman didto sa dapit diin
gilansang si Jesus. Ug sa maong tanaman may usa ka lubnganan nga wala pa gayud
kalubngi. Ug sanglit adlaw man kadto sa pagpangandam ug kay duol ra man ang
lubnganan ilang gilubong si Jesus didto.

Ang ebanghelyo sa Ginoo.

Pamalandong:
Ang kinaiya nga maunongon Diosnon. Mao kini ang kinaiya nga anaa kang Maria,
inahan ni Jesus. Anaa usab kini nga kinaiya ni Juan, kang Maria Magdalena, ug kang Jose
nga taga-Arimatea. Gikan sa sinugdan hangtud sa katapusan anaa sila pag-unong sa
kasakit ni Jesus. Mga igsoon, aduna bay makapahimulag kanato sa gugma sa Dios? Sa
pagkatinuod daghan sa atong mga igsoon nga nibiya na sa pagtoo kay nasuko O nangluod.
Adunay miundang na sa pagsimba kay gikapoy. Adunay mga igsoon nato nga tungod sa
mga kagul-anan o sa mga kapakyasan sa kinabuhi wala na mangalagad sa katilingban ug
miundang diha sa ilang pagbansay sa pagtoo. Sa pikas bahin, kon maunongon si Maria,
iyang inahan, si Jose, si Maria Magdalena ug si Juan, nga atong sumbanan sa atong
pagkamaunongon, labi pang maunongon ang Dios nganhi kanato.

Pag-ampo:
Mag-ampo kita. Dios nga maunongon walay higayon nga mibiya Ikaw kanamo.
Nagpadayon Ikaw nga nahigugma kanamo. Hatagi kami sa grasya matag adlaw aron
magmaunongon kami sama ni Jesus. Amen.

Amahan Namo…
Maghimaya ka Maria..
Himaya sa Amahan…

Awit:

DLC-Kwaresma2022 Page 15
 IKANAPULO’G UPAT NGA ESTASYON

SI JESUS NABANHAW

Pangulo : Nagasimba kami Kanimo, O Kristo ug nagadayeg kanimo

Tanan : Kay tungod sa Imong balaan nga Krus gitubos Mo ang kalibutan.

Pagbasa : (Mk 16:1-6)

Ang Pagbasa sa Ebanghelyo sumala ni San Markos

Sa paglabay sa adlaw’ng igpapahulay, namalit ug mga pahumot si

Maria Magdalena, si Maria nga inahan ni Santiago ug si Salome aron pagdihog sa lawas ni
Jesus. Sayo kaayo sa Dominggo sa buntag, sa pagsubang sa adlaw miadto sila sa
lubnganan. Samtang naglakaw nag-ingnanay sila “Kinsa man atong paligiron sa bato sa
pag-abli sa lubnganan?” Unya pagtan-aw nila, ilang nakita nga naligid na ang bato nga
gisira sa lubnganan. Busa nanulod sila sa lubnganan ug nakita nila didto ang usa ka
batan-ong lalaki nga naglingkod sa tuo, nagsul-ob og taas ug puting sapot. Nangahadlok
sila apan miingon Siya kanila, “Ayaw kamo kahadlok! Nangita kamo kang Jesus nga taga-
Nazareth, ang gilansang sa Krus? Wala na Siya dinhi. Nabanhaw na Siya.

Ang ebanghelyo sa Ginoo.

Pamalandong:
Hangtud karon adunay mga Judiyo nga naghulat pa sa pag-abot sa Mesias nga
gisaad sa Dios sa Daang Kasabutan. Dili man sila makadawat kang Jesus nga mao ang
Manluluwas nga gipadala sa Amahan. Kay ang ilang gihulat mao kadtong gamhanan ug
kusgan kaayo nga Mesias. Sangkap og mga hinagiban ug daghang mga sundalo ug armas
nga gamiton sa pag-asdang. Mga igsoon, tinuod gayud nga si Jesus nabanhaw. Dili tungod
kay wala nay sulod ang iyang gilubngan. Kay anaa may mga Judiyo niingon nga gikawat
ang lawas ni Jesus sa pagkagabii. Apan unsaon man nila pagtuis ang dakong kamatuoran
nga si Jesus anaa nagpakita man kanila, nikaon uban kanila. Ug unsaon man nila
pagsabot ang di-maihap nga mga yanong mga tawo nga nabag-o sa ilang kinabuhi. Asaman
gikan ang kaisog ug kadasig nga anaa sa mga apostoles nga sa sinugdan talawan man
sila kaayo? Kawang gayud ang atong pagtoo ug atong misyon kon wala mabanhaw si
Jesus.

Pag-ampo:
Mag-ampo kita. Ginoo, gihingpit Mo ang Imong saad sa kaluwasan pinaagi sa
pagkabanhaw sa Imong Anak nga si Jesus.Lig-ona ang among paglaum. Amen

Amahan Namo….
Maghimaya ka Maria…
Himaya sa Amahan….

Awit

DLC-Kwaresma2022 Page 16
 PAGTAPOS

Pagbasa : (Mateo 28:17ff)

Ang Pagbasa sa Ebanghelyo sumala ni San Mateo

Sa pagkakita sa mga tinun-an kang Jesus, gisimba nila Siya bisan tuod
may pipila kanila nga nagduhaduha. Miduol si Jesus ug miingon kanila, “Gihatag Kanako
ang tanang gahum sa langit ug yuta. Busa panglakaw kamo ngadto sa tanang katawhan sa
tibuok kalibutan ug himoa sila nga akong mga tinun-an, bunyagi sila sa ngalan sa
Amahan, sa Anak ug sa Espiritu Santo. Ug tudloi sila sa pagtuman sa akong gisugo
kaninyol Ug hinumdumi, ako mag-uban kaninyo sa kanunay hangtud sa katapusan sa
kalibutan.”

Ang ebanghelyo sa Ginoo.

Pagpadala:
Natapos na ang atong gihimo nga pagsubay sa Dalan sa Krus ni Jesus. Apan ang
misyon sa pagpuyo sa mithi ni Jesus nga atong nakat-onan karon mas labi pang naghagit
kanato sa pagbuhat gayud niini diha sa pamilya ug sa atong kasilinganan. Bug-at ang
misyon nga gihatag sa Dios kanato. Apan dili kita mahadlok pagdawat kay anaa man
kanunay naga-uban kanato si Jesus. Ang Iyang pagkabanhaw naghatag kanato’g paglaum.
Kining paglaum maghatag kanato’g kadasig sa pag-ampo ug pagtabang sa atong
isigkatawo.

Pag-ampo:
Mag-ampo kita. Ginoo, Ikaw man gayud ang tuburan sa tanang kaayo ug gugma. Ug
pinaagi ni Jesus Imo kaming gidasig sa pagpuyo sa katarong ug sa kamatuoran. Sa mga
panahon nga maluya kami, ihatag kanamo ang grasya sa kadasig. Inita uban sa Imong
Balaang Espiritu ang among pagtoo. Himoa kaming magmatinabangon sa among
isigkaingon. Kini among gipangayo pinaagi kang Jesus, ang nabanhaw nga Dios uban sa
panabang ni Birhen Maria, nga Inahan sa Simbahan. Amen.

Panalangin: (Kon adunay pari)

Pari : Ang Ginoo maana kaninyo.
Tanan : Maanaa usab kanimo.
Pari : Manalangin kaninyo ang makagagahum nga Dios, ang Amahan, ang
Anak, ug ang Espiritu Santo.
Tanan : Amen.
Pari : Manglakaw kita uban sa kalinaw ni Kristo.
Tanan : Salamat sa Dios

(kon walay pari)

Pangulo : Hinaut nga ang Dios manalangin kanato, manalipod kanato sa mga
dautan ug magdala kanato sa kinabuhing dayon.
Tanan : Amen.

Katapusang Awit:

DLC-Kwaresma2022 Page 17
 Amahan Namo

Amahan namo nga anaa sa mga langit

Pagdaygon ang imong ngalan
Umabot kanamo ang imong gingharian
Matuman ang imong pagbuot
Dinhi sa yuta maingon sa langit

Ang kalan-on namo sa matag adlaw

Ihatag kanamo karon adlawa
Ug pasayloa kami sa among mga sala
Ingon nga nagapasaylo kami sa mga nakasala kanamo
Ug dili mo kami itugyan sa panulay
Hinunua luwasa kami sa dautan.
Amen.

Maghimaya ka Maria

Maghimaya ka Maria, puno ka sa grasya.

Ang Ginoong Dios maanaa kanimo.
Bulahan ikaw sa babaeng tanan,
ug bulahan man usab ang bunga sa tiyan mo nga si Hesus.

Santa Maria Inahan ka sa Dios,

ig-ampo mo kaming makasasala. Karon
ug sa oras sa among igkamatay.
Amen.

Himaya sa Amahan

Himaya sa Amahan,
ug sa Anak,
ug sa Espiritu Santo.

Maingon sa sinugdan, karon ug sa gihapon,

ug sa mga katuigan nga walay katapusan.
Amen.

DLC-Kwaresma2022 Page 18