1

TAMDANAN
ALANG SA
DALAN SA KRUS
(TUIG SA MISYON AD GENTES)

Diocese of Digos
KWARESMA 2021

DALAN SA KRUS 2021 DIOCESAN LITURGICAL CENTER

 2

Pagsugod: (Tindog)
Pasiunang Awit: Kaming Makasasala (o haum nga awit)

Kaming mga makasasala nagalakat ngadto sa kinabuhing tunhay;

nagakaluya; sa kadalanan, nagaantus sa mga kasakitan.
Nagapangita;g kahayag, nagapangita’g kapahulayan;
Kay halayo sa ginadamgo nga langitnong pinuy-anan.

K: Ginoo, tiguma kami sa hinuisang gugma, ikaw ang maloloy-ong Amahan.

Luwasa kami sa mga kasal-anan ug mga katalagman, himoa nga si
Kristo ang hinungdan sa among kapasayloan.

PASIUNA:

Pangulo: Sa ngalan sa Amahan, sa Anak ug + sa Espiritu Santo. Amen.

Kita nga mga sumusunod ni Kristo diha sa atong pagtoo, makanunayon nga naggahin
og panahon alang gayud sa pagsaulog niining Dalan sa Krus, diin mamalandong kita sa
dakong gugma sa Dios alang kanato. Kining Dalan sa Krus nga atong subayon maoy
dalan ngadto sa atong kahimayaan uban sa Dios. Mag-andam kini sa atong
kasingkasing sa pagpalawom pa sa atong pagtoo ni Jesus.
Kining atong paggahin og higayon sa pagsunod ni Jesus sa dalan sa Krus mas
makahuluganon, ilabina niining panahon sa pagsaulog sa Lima ka gatos nga kasumaran
sa pag-abot sa Kristohanong Pagtoo sa Pilipinas niadtong tuig 1521 nga gidala nganhi
kanato sa unang mga Misyonero. Mao nga bisan taliwala sa kalisod tungod sa COVID
pandemya angayan lamang gayud kita magpasalamat ug mag-ampo uban ni Jesus
diha sa tanyag kanato sa Iyang misyon sa kaluwasan.
Apil gayud sa atong mga pag-ampo ang atong matag pamilya nga kini lig-onon ug
panalanginan ilabi na diha sa pagsulay sa kalisod. Ug ilabina sa padayon nga pag-
ampo alang sa tanang binunyagan nga padayon natong puy-an ang atong misyon diha
sa kinabuhing Kristohanon uban sa pagtoo ug pagsalig sa Dios.

PAGBASA: (Mt 16:24)

Ang Pagbasa gikan sa ebanghelyo sumala ni San Mateo.
Miingon si Jesus sa Iyang mga tinun-an, “Ang buot mahimong Akong
tinun-an kinahanglan nga hikalimtan niya ang iyang kaugalingon, ug
pas-anon niya ang Iyang krus ug mosunod Kanako.
Ang ebanghelyo sa Ginoo.

PAG-AMPO: Mag-ampo kita:

Langitnong Amahan amo nang gisugdan ang pagsubay sa Dalan
DALAN SA KRUS 2021 DIOCESAN LITURGICAL CENTER
 3

nga gilaktan ni Jesus. Lisod man kini, apan mao kini ang hagit sa
pagsunod namo ni Kristo. Ubani kami Ginoo sa among buhaton .
Kini among gipangayo pinaagi ni Kristo nga among Ginoo, Amen.

Awit : (Samtang nagpadulong sa Estasyon sa Krus.)

Hagit sa Ebanghelyo

I. Ang hagit sa ebanghelyo alang kanato,

higugmaon ta ang atong isigkatawo.
Apan, kon tinud-on ta ang pagserbisyo.
Mosubay ta’g kalbaryo, sama sa atong Ginoo.

K: Dili sayon ang pagsunod kang Kristo,

daghang tunok ang dalan nga agian mo.
Bug-at ang krus nga pas-anon mo,
ug kamatayon naa naghulat kanimo.

UNANG ESTASYON
SI JESUS NANIHAPON SA KATAPUSANG HIGAYON
UBAN SA MGA TINUN-AN

Pagsimba:
Pangulo: Nagasimba kami kanimo O Kristo ug nagadayeg Kanimo.
Tanan: Tungod kay sa Imong balaan nga Krus gitubos Mo ang kalibutan,
Pagbasa: (Markos 14: 22ff)
Ang Pagbasa gikan sa Ebanghelyo sumala ni San Markos
Samtang nangaon sila, mikuha si Jesus sa Pan, nagpasalamat ug gi-
pikaspikas Niya kini ug gihatag ngadto sa Iyang mga tinun-an. Kan-a ninyo kini”
miingon Siya. “Kini mao ang Akong lawas.” Unya gikuha Niya ang kupa, gipasalamatan
ang Dios ug mitunol kanila ug silang tanan nanginom niini.Miingon si Jesus,“Kini mao
ang Akong dugo nga giula sa daghan, ang dugo nga naglig-on sa kasabutan.”
Ang ebanghelyo sa Ginoo.

Pamalandong:
Ang tema sa tuig sa Misyon mao kini: Gifted, to Give. Buot ipasabut nga Kita
gigasahan, kita mohatag. Makahuluganon kaayo kini nga angayan atong
pamalandongan. Ug kini nagpunting sa Dios nga unang naghatag kanato sa Iyang
Bugtong Anak alang sa atong kaluwasan. Si Jesus nagpakatawo ug mitugyan sa
Iyang kaugalingon lawas ug kalag alang sa atong Kaluwasan. Ug gihimo Niya nga
makaambit kita niini pinaagi sa Sakramento sa Eukaristiya.
Ang Dios mao gayud ang tinubdan sa grasya nga nadawat sa unang mga
Misyonero nga ila usab gipaambit kanato. Ug dako ang atong kalipay sa pagtoo
DALAN SA KRUS 2021 DIOCESAN LITURGICAL CENTER
 4

nga atong naambitan gikan sa Dios tungod kanila. Mao nga angayan lamang
magpasalamat kita kanila nga mga unang misyonero tungod sa ilang dakong
sakripisyo sa pagmantala sa ebanghelyo ug pagpaambit sa pagtoo. Naghagit
gayud usab kini kanato sa paghimo sumala sa ilang gihimo. Human kita
makadawat sa grasya sa pagtoo, ipaambit usab nato kining maong pagtoo
ngadto sa atong isigkatawo.

Pag-ampo: Ginoo, gipadayag Mo kanamo ang Imong paghigugma pinaagi sa

pagtugyan ni Jesus lawas ug dugo alang kanamo. Himoa kami nga kanunay
manggihatagon alang sa kaayohan sa tanan. Amen.

Amahan Namo….Maghimaya ka Maria….Himaya sa Amahan..

Awit 1: (tune: Dios Namo Sa Kalooy)

Nanihapon ang Ginoo, sa katapusang higayon.

Kauban ang mga tinun-an, sa lawak ilang gisak-an.

Koro 1: Hesus malooy Ka kanamo, pasayloon Mo kami

Ang sala gidumtan namo, dili na mag-usab kami.
Ug gihatag ang pan ug bino, nga Iyang Lawas ug Dugo,
Aron nga kita mabuhong sa kalan-on nga Diosnon.

Koro 2: Hesus, ang Imo nga kalooy; nasinati sa tanan;

Ang dalan Mo nga gilaktan, subayon ug paambitan.

IKADUHANG ESTASYON
SI JESUS NAG-AMPO DIDTO SA TANAMAN SA GETSEMANI

Pagsimba:
Pangulo: Nagasimba kami kanimo ,O Ginoo ug nagadayeg Kanimo
Tanan: Tungod kay sa Imong balaan nga Krus gitubos Mo ang kalibutan.
Pagbasa: (Lukas 22:40ff)
Ang Pagbasa sa Santos nga Ebanghelyo sumala ni San Lukas
Si Jesus ug ang Iyang tinun-an nahiabot sa tanaman sa Getsemani.
Si Jesus miingon,”pag-ampo kamo aron dili kamo madaog sa panulay.”
Unya mipalayo Siya kanila sa gilay-on nga maabot sa paglabay sa bato
ug miluhod Siya ug nag-ampo. “Amahan,” miingon Siya, “Kon buot
ka, kuhaa kining kupa gikan kanako. Apan dili ang akong pagbuot,
kondili ang Imo ang matuman.”
Ang ebanghelyo sa Ginoo.

Pamalandong:
DALAN SA KRUS 2021 DIOCESAN LITURGICAL CENTER
 5

Dili ikalimod nga ang matag tawo gusto magpuyo nga gawasnon. Dili kita
Gusto nga gaw-ngan sa uban. Dili kita gusto nga adunay magbuot unsay
gusto natong buhaton sa atong kaugalingon. Si Jesus tawo nga hingpit
nga gawasnon tungod kay hingpit Niyang gisunod ang kabubut-on sa Iyang Amahan.
Si Maria nga atong Inahan nahimong hingpit nga gawasnon tungod sa iyang
hingpit nga pagtuman sa kabubut-on sa Dios. Ang mga misyonero nga
misunod sa kabubut-on sa Dios sa ilang kinabuhi nagpuyo nga gawasnon
ug malipayon diha sa pagtuman sa ilang misyon.
Mga igsoon, ang tentasyon sa kristohanong pagpuyo mao ang pagpuyo
Nga kita lamang ang magbuot unsay atong gustong buhaton. Kon tinuod
Kita nga kristohanon mosunod kita sa misyon nga gihatag kanato sa Dios.
Kon tinuod kita nga kristohanon mosunod kita sa gihimo ni KRISTO sa
Iyang pag-ampo “Amahan, kon buot ka, kuhaa kining kupa gikan kanako.
Apan dili ang akong pagbuot, kondili ang imo ang matuman.”
Niining paagiha, matuman.”

Pag-ampo: Ginoo, daghan kaayo ang higayon nga kami nagkulang sa pagdayeg
Ug paagpasalamat Kanimo.Himoa kaming sama ni Jesus makanunayon
sa among pagpalawom sa relasyon namo Kanimo.
Amen.
(Amahan Namo…Maghimaya ka Maria…. Himaya sa Amahan…)

Awit 2:
Nag-ampo didto sa tanaman, nga puno sa kahingawa.
Mitulo ang dugo ug singot sa hilabihang kahadlok.

K 1: Hesus malooy ka kanamo, pasayloon Mo kami

Ang sala gidumtan namo, dili na mag-usab kami.

Sa katapusan ang gituman, kabubut-on sa Amahan.

Aron nga maamguhan, ang labing gikina-hanglan.

K 2: Hesus, ang Imo nga kalooy; nasinati sa tanan;

Ang dalan Mo nga gilaktan, subayon ug paambitan.

IKATULONG ESTASYON
SI JESUS GITARAL ATUBANGAN NI PILATO

Pagsimba:
Pangulo: Nagasimba kami kanimo, O Kristo ug nagadayeg Kanimo.
Tanan: Tungod kay sa Imong balaan nga Krus gitubos Mo ang kalibutan.
Pagbasa: (Lukas 23:1ff)
Ang Pagbasa gikan sa ebanghelyo sumala ni San Lukas
DALAN SA KRUS 2021 DIOCESAN LITURGICAL CENTER
 6

Ang tanan mitindog ug gidala nila si Jesus sa atubangan ni Pilato ug didto

gisumbong nila Siya;sila miiingon, “Kining tawhana hisakpan namo nga
nagpasalaag sa atong mga tawo ug nag-awhag kanila sa dili pagbayad og buhis
ngadto sa Emperador ug miangkon nga Siya mao ang Mesiyas,usa ka Hari. Si
Pilato nangutana Kaniya, “Ikaw ba ang hari sa mga Judiyo?” Si Jesus
mitubag,”Giingon mo.” Unya miingon si Pilato sa mga kadagkoan sa mga pari ug
sa mga tawo, “wala akoy nakaplagang hinungdan nga silutan kining tawhana.”
Ang ebanghelyo sa Ginoo.
Pamalandong:
Adunay mga tawo nga maayo og kinabuhi. Kini sila walay kalaban. Wala silay
gikalalis. Wala pud daw silay gihambin nga kasuko sa uban. Moingon kita nga
maayong tawo kini akong silingan kay wala man siyay kaaway. Wala bitaw
siyay gihimo nga dautan sa iyang isigkaingon. Pero unsa man pud ang maayo nga
iyang gihimo? Basin wala! Walay gihimo nga dautan ug wala pud gihimo nga
maayo. Wala gihapoy ayo. Ang pagka-kristiano mao ang paglikay sa dautan ug
ang paghimo sa maayo. Si Pilato gusto mahimo nga maayong tawo pinaagi sa
iyang pagpanghunaw sa ilang sumbong . Apan wala gyud siya maningkamot
pagpahunong sa bakak nga sumbong batok kang Jesus. Apil siya sa paghukom
batok sa kamatuoran. Dautan ang paghilum lamang atubangan sa sayop nga
sumbong.

Pag-ampo: Ginoo sa kamatuoran. Ikaw man ang tuburan sa tanan nga maayo.
Himoa kaming maayo atubangan Kanimo ug sa among isigkatawo.
Pinaagi sa among pagtabang sa among kaigsoonan nga anaa sa
tumang kalisod tungod sa pagdagmal kanila sa uban. Amen.
(Amahan Namo…..Maghimaya ka Maria…….Himaya sa Amahan…)
Awit 3:
Ilang gihukman ang Ginoo, sa salang wala mahimo.
Ug ang ilang gipangayo, kamatayon didto sa krus. (K 1)

Gawasnon gidawat ang tanan, alang sa ‘tong kaluwasan.

Aron nga ‘tong masinati, gugmang alang sa katawhan. (K2)

IKAUPAT NGA ESTASYON

SI JESUS GIPAANTUS UG GIPURONGPURONGAN OG TUNOK

Pag-simba:
Pangulo: Nagasimba kami Kanimo , O Kristo ug nagadayeg Kanimo.
Tanan: Tungod kay sa Imong balaan nga Krus gitubos Mo ang kalibutan.
Pagbasa: (Juan 19:1-3)
Ang Pagbasa sa Ebanghelyo sumala ni San Juan
Unya gikuha ni Pilato si Jesus ug Iyang gipalatos . Ang mga sundalo nag-
DALAN SA KRUS 2021 DIOCESAN LITURGICAL CENTER
 7

himo’g purongpurong sa mga sangang tunukon ug gipahaum nila sa ulo

ni Jesus. Gisul-oban nila Siya og sapot nga dagtom pula ug nanuol sila
Kaniya ug miingon, “Mabuhi ang hari sa mga Judiyo! Ug Siya ilang gisagpa.
Ang ebanghelyo sa Ginoo.

Pamalandong:
Atong nasayran sa atong katekismo nga ang sentro sa pagtulon-an ni Jesus mao
gayud ang paghigugma sa Dios ug sa atong isigkatawo. Kon sa Daang Kasabutan
gibulag kining duha, apan kang Jesus sumpay kini. Buot ipasabot nga dili kita
makahigugma sa Dios kon atong gikasilagan ang atong isigkatawo. Sa atong
paghigugma sa Ginoo nga dili makita, pinaagi sa atong paghigugma sa atong
kaigsoonan nga makita. Apil niining paghigugma ang pagpasaylo. Sa paghigugma
sa Dios kanato Gipasaylo Niya ang atong kasal-anan. Mao nga gipadala Niya ang
Iyang Bugtong Anak si Jesus aron pagluwas kanato. Mao nga bisan gidagmalan
Siya, gilatos, giyagayagaan ug gipaantus sa pagpas-an sa Krus, Iyang Gipasaylo
ang ilang kasal-anan. Lisod ang paghigugma. Lisod ang pagpasaylo. Apan mao
kini ang hagit ni Jesus kanato. Mahigugma kita sa Dios kinahanglan mahigugma
kita sa Atong isigkatawo.

Pag-ampo:
Ginoo, sa mga higayon nga anaa ang kasilag ug kapungot diha sa among
kasingkasing, wagtanga kini og ipuli ngari kanamo ang Imong grasya sa
gugma ug kalooy alang sa tanan. Amen.
(Amahan Namo…. Maghimaya ka Maria…Himaya sa Amahan...)

Awit 4:
Ang Dios gamhanan ug takus, nagpakita’g pagpaubos,
Gipurong-purungan sa tunok, gisakit ug gipaantos. (K1)

Ang tanan Iya nga gidawat, paghampak, panamastamas.

Aron maangkon natong tanan ang nahanaw’ng kadungganan. (K 2)

IKALIMA NGA ESTASYON

GIPAS-AN NI JESUS ANG KRUS

Pagsimba:
Pangulo: Nagasimba kami Kanimo , O Kristo ug nagadayeg Kanimo.
Tanan: Tungod kay sa Imong balaan nga Krus gitubos Mo ang kalibutan.
Pagbasa: (Juan 19:17)
Ang Ebanghelyo sumala ni San Juan.
DALAN SA KRUS 2021 DIOCESAN LITURGICAL CENTER
 8

“Si Jesus migula sa siyudad sa Jerusalem nga nagpas-an sa Krus

ug miabot sa dapit nga gihinganla’g Golgotha.”
Ang ebanghelyo sa Ginoo.
Pamalandong:
Ang krus sa kinabuhi sa magtutuo nagkadaiya. Ug dili na kahoy ang krus nato karong
panahona. Pananglitan, ang Krus sa mga negosyante mao ang pagsara sa ilang mga
negosyo tungod sa nagkalainlaing hinungdan niining panahon sa Pandemya. Daghan sa
atong kaigsoonan karon ang nawad-an og panginabuhian o trabaho, ang krus nila mao
ang tumang kalisod ug kapit-os sa panginabuhi. Pagkabug-at krus sa pagsalikway,
pagbiaybiay ug paghukom kanimo nga natakbuyan sa Virus nga gipaningkamotan nga
pildihon karon. Kapait sa krus, sa pag-inusara ug walay makahupay nga sakop sa
pamilya kanila nga anaa sa balay tambalaan ug anaa sa ilang panimalay nga
nagpadayon sa kwarentinas.
Mga igsoon, panag-ingnan nato si Jesus diha sa atong pagdawat ug pagpas-an sa atong
mga krus. Ang dakong timaan nga nagasunod kita ni Kristo isip magtutuo mao ang krus
nga gihatag Niya kanato. Ang kaanindot kay bisan unsa pa kabug-at ang krus nga atong
gipas-an ingon niana usab kadako ang grasya sa Dios nga gihatag kanato. Ug ang atong
pagpas-an uban sa masaligon nga pag-ampo maghatud kanato ngadto sa himaya sa
langit. Matag kasakit, anaa luyo niini ang kalipay. Mao nga dili nato isalikway ang Krus.
Dawaton nato kini ug pas-anon.

Pag-ampo: O Ginoo, sa mga higayon nga kami adunay mga krus o kabug-at sa among
kinabuhi nga daw dili na namo mapas-an kini, tabangi intawon kami nga malig-
on mopas-an sa maong krus sa among pagsunod Kanimo hangtud moabot kami
sa himaya sa langit . Amen.

(Amahan Namo…. Maghimaya ka Maria…. Himaya sa Amahan…)

Awit 5:
Gidawat ug Iyang gipas-an, ang krus nga alang sa tanan.
Wala Niya panumbalinga ang kabug-at Niyang dala. (K 1)

Ang tanan natong kasal-anan, maoy Iya nga gipas-an.

Aron nga kita maluwas, sa kasubo nga dako. (K 2)

IKAUNOM NGA ESTASYON

NAHISUKAMOD SI JESUS
Pagsimba:
Pangulo: Nagasimba kami Kanimo, O Kristo ug nagadayeg Kanimo.
Tanan: Tungod kay sa Imong balaan krus gitubos Mo ang Kalibutan.
Pagbasa: (1Cor. 1:27ff)
DALAN SA KRUS 2021 DIOCESAN LITURGICAL CENTER
 9

Ang Pagbasa sa Unang Sulat ni San Pablo ngadto sa taga-Corinto

Gituyo sa pagpili sa Dios ang giisip sa mga tawo nga walay kapuslanan aron
pagpakaulaw sa mga maalamon, ug gipili Niya kadtong giisip nga huyang aron
pagpakaulaw sa mga tawong gamhanan. Gipili Niya ang mga sinalikway ug tinamay ug
ang gipakawalay bili sa mga tawo aron pagpaila nga walay bili ang giisip nga
mahinungdanon sa mga tawo aron wala gayo’y makapagarbo sa atubangan sa Dios.
Apan kamo gihiusa sa Dios kang Kristo Jesus, ug gihimo niya si Kristo nga atong kaalam.
Ang pulong sa Ginoo.
Pamalandong:
“Kon ang tawhanong garbo patuyangan maghatud kini kanato ngadto sa kaalautan.”
Apan kon kini atong giyahan, maghatud kini ngadto sa kalipay uban sa Dios.”Kini
tungod kay ang garboso nga tawo magsalig lamang sa iyang kaugalingon. Wala siyay
pagtagad unsay pamaagi sa Dios alang niining gimbuhaton. Ang garboso nga tawo dili
magpakitabang sa ubang tawo. Siya ra gayud ang makahibalo sa tanan. Ug kon
mahitabo nga mapakyas ang iyang gibuhat, dili gayud siya modawat sa kapakyasan.
Apan kon kini molampus, mosamot siya ka garboso. Wala gayuy labot ang Dios sa
iyang kalampusan. Moingon dayon siya ,”akoa ra gayud kadto nga paningkamot.”
Mga igsoon, bisan si Jesus Dios, gipakita Niya nga kita nanginahanglan sa tabang sa
uban ug ilabina sa Dios diha sa atong pagsunod Kaniya. Ang pagkasukamod ni Jesus dili
timaan sa kapildihan kondili nagpakita kanato nga mosalig gayud kita sa Dios ug
mangayo sa Iyang panabang.

Pag-ampo:
Ginoo, Ikaw ra gayud ang among kadangpan. Ipahilayo kami sa ten-
tasyon sa garbo aron makanunayon kami mosalig Kanimo diha sa pag-
sunod sa Imong Anak nga si Jesus, among Manluluwas. Amen.
(Amahan Namo... Maghimaya ka Maria...Himaya sa Amahan….)

Awit 6:
Sa kabug-at Siya napukan, apan lig-on ang galamhan.
Dili makapildi ang sala, sa gugma nga hilabihan. (K 1)

Padayon ang Iyang pagpanaw, sa bukid sa Kalbaryo.

Aron nga kita di mohunong sa panaw nga Kristohanon. (K 2)

IKAPITO NGA ESTASYON

SI SIMON NGA TAGA CIRENE MITABANG KANG JESUS

Pagsimba:
Pangulo: Nagasimba kami Kanimo, O Kristo ug nagadayeg Kanimo.
Tanan: Tungod kay sa Imong balaan nga krus gitubos mo ang kalibutan.
DALAN SA KRUS 2021 DIOCESAN LITURGICAL CENTER
 10

Pagbasa: (Mateo 27:32ff)

Ang Pagbasa gikan sa ebanghelyo sumala ni San Mateo
Sa ilang pagpanggula sa siyudad hisugatan nila ang usa ka tawong ginganla’g
Simon nga taga-Cirene. Ug gipugos nila siya sa pagpas-an sa Krus ni Jesus. Unya
nahiabot sila sa usa ka dapit nga ginganla’g Golgota, nga sa ato pa, “ang dapit sa
mga kalabera.”

Ang ebanghelyo sa Ginoo.

Pamalandong:
Ang pandemya nga COVID 19 nagdala og dakong hulga sa kinabuhi ug sa Panginabuhi
sa tawo.. Daghan kaayo ang nangamatay tungod niini. Daghan ang nawad-an og
panginabuhian tungod niini. Daw wala nay kapaingnan ang mga tawo tungod niini.
Daghan moingon nga kastigo na ba kini sa Dios? Mao na ba kini ang katapusan sa
kalibutan? Taliwala sa kalisod sa kinabuhi ug sa panginabuhi adunay nagpabilin nga
pagtoo ug paglaum sa Dios nga maoy naghatag og kadasig ug kalig-on sa Pagpadayon.
Daghan mga tawo madasigon gihapon sa pagtanyag sa ilang tabang isip mga gitawag og
frontliners. Daghan ang mga tawo nadani ngadto sa pagkamanggihatagon sa ilang mga
kabtangan. Daghan mga Pamilya nga nagkahiusa na sa pagpuyo ug diha sa pag-ampo.
Tukma kaayo ang kanta nga nagkanayon “We heal as one.” Ug kini natuman kay ang
Dios anaa man kanato. Nagauban man ang Dios kanato. Wala diay imposible kon
mosalig kita sa Dios. Walay kalisod nga dili masulbad pinaagi sa gahum sa Dios. Mao
nga mosalig ug motuo kita kanunay sa Dios diha sa kahimtang nga sayon ug kahimtang
nga lisod sa atong kinabuhi.

Pag-ampo:
Ginoo, humoka kanunay ang among mga galamhan aron sama ni
Jesus,Imong bugtong Anak motabang kami nga mahaw-as kami
Sa kahakog ug mamahimo na nga manggihatagon sa uban. Amen.
(Amahan Namo… Maghimaya ka Maria… Himaya sa Amahan...)
Awit 7:
May nalooy sa Ginoo, si Simon Cerenio
Ug iya nga gitabangan, ang Ginoong nabug-atan. (K 1)

Gidawat, gipasalamatan, bisan ang dyota’y nga tabang.

Aron ipakita sa tanan, kinahanglan ta’g kauban. (K 2)

IKAWALO NGA ESTASYON

ANG MGA BABAYE SA JERUSALEM NANGHILAK ALANG KANG JESUS

DALAN SA KRUS 2021 DIOCESAN LITURGICAL CENTER

 11

Pagsimba:
Pangulo: Nagasimba kami Kanimo, O Kristo ug nagadayeg Kanimo.
Tanan: Tungod kay sa Imong balaang nga Krus gitubos mo ang kalibutan.
Pagbasa: (Lukas 23:27ff)
Ang Pagbasa gikan sa Ebanghelyo ni San Lukas
May dakong panon sa mga tawo nga misunod kang Jesus ug pipila nila mga
babaye nga naghilak ug nagminatay tungod kaniya. Unya milingi si Jesus kanila
ug miingon, “mga babaye sa Jerusalem! Ayaw ako ninyo’g hilaki, hinoon hilaki
ninyo ang inyong kaugalingon ug ang inyong mga anak.”
Ang ebanghelyo sa Ginoo.
Pamalandong:
Sa mga gimbuhaton ni Jesus sa pagsangyaw sa Maayong Balita, apil niini ang mga
kababayen-an. Si Jesus naghatag kanila’g dignidad. Dili sama sa Pariseo nga wala
gayu’y katungdanan ang babaye diha sa katilingban kay alang sa mga Pariseo sila
walay ikatampo sa sociodad.
Mga igsoon,ang mga babae sa Jerusalem nanghilak. Buot nila unta nga santaon ang
kamatayon ni Jesus sa Krus. Apan si Jesus determinado na sa pagsunod sa kabubut-
on sa Iyang Amahan. Giingnan Niya sila. “Ayaw ako ninyo’g hilaki. Hilaki hinoon
ninyo ang inyong kaugalingon ug inyong mga anak.” Dinhi atong masabot nga dili
lang ang paghilak ang mabuhat sa mga kababayen-an apan dako ang matampo nila
diha sa kalamboan sa katilingban ug usab diha sa pagpakaylap sa maayong Balita.
Ang ilang aktibong paglihok uban sa lig-on nga paghukom napamatud-an na karon,
tungod sa ilang kahanas, talent ug kakugi. Daghan ang kababayenhan naglihok sa
simbahan ug may mga nahimong misyonera ngadto sa laing dapit, mga babaye nga
nagmalig-on sa ilang pagtoo sa Ginoo ug nagsaksi niini. Angayan nga ipadayon nila
ang nasugdan na nga paglig-on sa ilang katungod ug dignidad.

Pag-ampo: Ginoo, Ikaw ang Dios sa tanan. Himoa nga kaming imong katawhan
magmalig-on diha sa among pagsunod sa kasakit ni Jesus dili lang
sa kaguol kondili diha sa paglihok aron makatabang sa mas nangi-
nahanglan nato nga mga kaigsoonan. Amen.
(Amahan Namo…Maghimaya ka Maria…Himaya sa Amahan..)

Awit 8:
Bililhon alang sa Ginoo, ang tanan nga mga tawo.
Ang dungog nga gasa Niya, dili gayud pasipad-an. (K 1)
Gihigugma sa Ginoo, ang luya ug napasagdan.
Aron kita makaamgo, sa ilang panginahanglan. (K 2)

IKASIYAM NGA ESTASYON

SI JESUS GIHUKASAN SA IYANG SAPOT UG GILANSANG SA KRUS

DALAN SA KRUS 2021 DIOCESAN LITURGICAL CENTER

 12

Pagsimba:
Pangulo: Nagasimba kami Kanimo, O Kristo ug nagadayeg Kanimo.
Tanan: Tungod kay sa imong balaan nga Krus gitubos mo ang kalibutan.
Pagbasa: (Markos 15: 22ff)
Ang pagbasa gikan sa Ebanghelyo sumala ni San Markos
Gidala nila si Jesus sa usa ka dapit nga ginganlag Golgotha nga sa ato pa
“ang dapit sa mga kalabera.” Ug didto misulay sila og paghatag kaniyag
bino nga sinagulan og tambal nga ginganlag mira. Apan midumili si Jesus
sa pag-inom niini. Unya gilansang nila Siya sa Krus ug gibahinbahin ang
Iyang sapot ug nagripa sila kon unsang bahina sa sapot ni Jesus ang ilang
maangkon.
Ang ebanghelyo sa Ginoo.
Pamalandong:
Ang kapungot ug kasuko nga anaa sa kasingkasing sa mga kaaway ni Jesus
nagpasulabi na kaayo. Gani, sa wala pa nila Siya hunosi sa kinabuhi ilang
gipahamtang Kaniya ang pagkuha sa Iyang dignidad isip tawo pinaagi sa paghukas
sa Iyang sapot. Wala sila nasayod nga walay si bisan kinsa makakuha niini kondili
ang Dios nga maoy naghatag niini Kaniya.
Mga igsoon, ang kabililhon sa kinabuhi ug dignidad sa tawo gasa gayud sa Dios.
Mao nga, angayan lang nga kini atimanon, respetohan, palamboon! Labot niini
ang mga inonsenteng kabataan nga anaa pa sa sabakan sa mga inahan, sila usab
nagkinahanglan nga ampingan kay sila may kinabuhi nga gasa gikan sa Dios.
Bisan gani ang dakong makasasala wala kitay katungod nga patyon kay ang Dios
nagmahigugmaon ug nagmapasayloon man kanatong tanan. Busa, kita usab
gitawag ug gidapit sa samang kinaiya Niya. Mosunod kita sa gawi ni Jesus diha sa
Iyang kalooy ug gugma ngadto sa tanan nga nagpasipala Kaniya.

Pag-ampo: Ginoo, nga maoy tag-iya sa among kinabuhi ug dignidad. Himoa, nga
kami nga Imong gigasahan niining kinabuhi ug dignidad mag-atiman
niini, ug morespeto niini aron molambo pa kini diha sa Imong grasya
ug panalangin. Amen.
(Amahan Namo…Maghimaya ka Maria…Himaya sa Amahan…)

Awit 9:
Pag-abot nila sa kalbaryo, gihubuan ang Ginoo,
Sa bili ug sa dignidad, ila Siyang gilangkatan. (K1)

Gilansang nila siya sa Krus, kahingpitan sa pag-antos.

Aron nga ato makit-an, ang gugmang wa’y kata-pusan. (K 2)

IKANAPULO NGA ESTASYON

DALAN SA KRUS 2021 DIOCESAN LITURGICAL CENTER
 13

GIPASALIGAN NI JESUS OG KALUWASAN ANG MAHINULSULON NGA

KRIMINAL
Pagsimba:
Pangulo: Nagasimba kami Kanimo, O Kristo ug nagadayeg Kanimo.
Tanan: Tungod kay sa Imong balaan nga Krus gitubos mo ang kalibutan.
Pagbasa: (Lukas 23 : 39ff)
Ang pagbasa gikan sa Ebanghelyo sumala ni San Lucas
Usa ka kriminal nga nagbitay sa Krus tupad ni Jesus nagbugalbugal
Kaniya. “Dili ba Ikaw mao ang Mesiyas?” Luwasa ang Imong kaugali-
ngon ug kami. Apan gibadlong siya sa iyang kauban nga nag-ingon
kita ania dinhi gisilutan sa mao rang silot. Apan ang silot natong duha
angay ug sibo kanato. Kay gisilutan man kita sumala sa atong nahimo.
Apan Siya walay sala.” Ug miingon siya kang Jesus, hinumdumi inta-
won ako kong maghari ka na! Miingon si Jesus kaniya. “sultihan ko
ikaw, karong adlawa adto ka sa paraiso uban Kanako.”
Ang ebanghelyo sa Ginoo.

Pamalandong:
Adunay lawom nga gipasabot sa gitawag og “Kaluwasan”. Kaniadto, kini
nagpasabot lamang sa kaluwasan sa kalag. Walay labot ang lawas. Bahala kon
ang tiyan nagkutoy kay pit-os man kaayo basta sigurado lang nga ang kalag
maluwas. Adunay mangayo og tabang kay gigutom pag-ayo. Dili kita mohatag
og dungan sa pag-ingon, ‘adto lang sa simbahan unya iampo sa Dios ang
nagkutoy nimo nga tiyan.
Mga igsoon, ang kaluwasan gikan sa sala dili gayud mahibulag sa kalingkawasan
gikan sa tanang nagduot kanila ngadto sa kapobrehon. Mao nga sa atong pag-
ampo nga maluwas ang atong kalag, dili nato kalimtan nga modapig kita ug
motabang sa mga tawo nga gilupigan, sa mga tawo nga gitawag uyamut,
nangawala, ug mga iwit sa katilingban kay sila gihigugma sa Dios.

Pag-ampo:
Ginoo, sa takna sa kalisod miduol kami Kanimo uban sa kasingkasing
nga maluluy-on. Itugot nga kami magpaubos sa among garbo.Amen.
(Amahan namo…Maghimaya ka Maria.. Himaya sa Amahan..)

Awit 10:
May paglaum pa gihapon, sa tawo’ng mahinulsulon.
Bisan diha sa kamatayon, ang Dios mapasayloon. (K 1)

Gisaad ang paraiso, kinabuhi’g kahingpitan,

Kay ang gugmang way utlanan, gamhanan sa nga tanan. (K 2)

DALAN SA KRUS 2021 DIOCESAN LITURGICAL CENTER

 14

IKANAPULO’G USA NGA ESTASYON

SI MARIA UG SI JUAN NAGBAROG DIDTO SA TIILAN SA KRUS NI JESUS

Pagsimba:
Pangulo: Nagasimba kami kanimo, O Kristo ug nagadayeg kanimo.
Tanan: Tungod kay sa Imong balaan nga Krus gitubos Mo ang kalibutan.
Pagbasa: (Juan 19:25-27)

Ang Pagbasa gikan sa Ebanghelyo sumala ni San Juan

Duol sa Krus ni Jesus nagtindog ang Iyang inahan ug ang igsoon sa Iyang Inahan
ug si Maria nga asawa ni Cleopas ug si Maria Magdalena. Sa pagkakita ni Jesus sa
Iyang inahan ug sa tinun-an nga gimahal Niya nga nagbarog didto miingon siya
sa Iyang inahan, “Babaye,ania ang Imong Anak.”unya miingon siya sa tinun-an,
“Ania ang Imong inahan.” Sukad niadto gipatipon si Maria sa pagpuyo sa tinun-
an.
Ang ebanghelyo sa Ginoo.

Pamalandong:
Ang gihimo ni Jesus sa wala pa Siya kabugtui sa gininhawa mao gayud ang
pagpahiluna sa Iyang inahan ug ni Juan nga Iyang gimahal. Si Maria iyang
gitugyan kang Juan. Ug si Juan ngadto kang Maria. Sa lawom nga pagsabut
niini, si Maria nga inahan sa simbahan gitugyan ni Jesus kanatong tanan
aron atong mahalon ug sundon ang mga hiyas Niya sama sa gihimo ni Juan.
Mga igsoon,ang atong debosyon kang Maria nakatabang kaayo sa paglig-on
sa atong pagtoo. Daghan sa atong mga katawhan nga moataki kanato
niining atong pag-ampo sa rosaryo uban sa atong inahan. Apan dili gyud
mapugngan kay lagi gihigugma na gayud nato ang atong Inahan nga si Maria.
Mao nga giingon sa PCPII ng akita mao ang “pueblo amante de Maria”
“a People in love with Mary.” Ug dili lang kay kita nahigugma sa atong
inahan si Maria, siya usab mas nahigugma kanatong tanan.
Si Maria usab ang bitoon sa Ebanghelisasyon, siya uban nato ug
duyog nato sa pag-ampo samtang kita nagpadayon sa pagpuyo ug
pagsangyaw sa Maayong Balita ni Jesus nga atong nadawat.
Sa ato pa, may dakung kalabutan si Santa Maria kanatong mga magtotoo,
busa dili kita magmakuli nga modangup sa atong Mahal nga Inahan.

Pag-ampo: Ginoo, hatagi kami sa grasya sa pagkamaunongon sama kang Maria.

Ug himoa kaming mahigugmaon sama kang Juan. Amen.

(Amahan Namo… Maghimaya ka Maria…Himaya sa Amahan…)

DALAN SA KRUS 2021 DIOCESAN LITURGICAL CENTER

 15

Awit 11:
Imong gihatag kang Juan, ang mahal mo nga inahan.
Imo usab nga gitugyan, kang Maria ang katawhan. (K 1)

Si Maria atong inahan, inahan sa Iyang simbahan,

Aron kita iyang agakon ngadto’s kinabuhing dayon (K 2)

IKANAPULO’G DUHA NGA ESTASYON

SI JESUS NAMATAY
Pagsimba:
Pangulo: Nagasimba kami Kanimo, O Kristo ug nagadayeg kanimo.
Tanan: Tungod kay sa Imong balaan nga Krus gitubos Mo ang kalibutan.
Pagbasa: (Juan 19:28-30)
Ang Pagbasa gikan sa Ebanghelyo sumala ni San Juan.
Human niini, si Jesus nga nasayud nga ang tanan natuman na, ug aron
pagtuman sa kasulatan miingon, “giuhaw ako!” Didto may usa ka pa-
naksan nga puno sa suka ug gibutang sa usa ka sanga sa isupo, ug giisa
nila kini ngadto sa iyang baba. Human makatilaw si Jesus sa suka
miingon Siya, “Natapos na!” Unya miduko Siya ug namatay.
Ang ebanghelyo sa Ginoo.

Pamalandong:
Usa sa tulukibon kaayo nga pulong ni Jesus sa atong gibasa karon nga
ebanghelyo mao gayud ang pulong “giuhaw ako.” Yano kaayo nga pulong
apan lawom kini’g dulot sa matag usa kanato. ”Giuhaw ako” sa imong pag-
pangga ug pagmahal nga maoy makapugong sa imong kapungot ug kasilag
Kanako. “Giuhaw ako” sa imong mainitong pag-alagad sa mga tawo nga kabus
ug nag-antus tungod sa kapit-os sa panginabuhi.
”Giuhaw ako” sa imong makanunayon nga paggahin og panahon sa pagsimba sa
adlawng Domingo. Giuhaw ang Dios sa atong pagbag-o sa kinabuhi diha kaniya.
Giuhaw ang Dios sa atong pagkamatinud-anon nga pangulo sa atong Gagmayng
Kristohanong Katilingban. Giuhaw ang Dios sa pagpinasayloay sa mga pamilya
nga nagkabangi ug sa nagkabulag nga magtiayon. Giuhaw ang Dios sa atong
kahiusahan isip katawhan ug Simbahan sa Dios, sa pagsaksi sa pagtoo ug
pagsangyaw ngadto sa tanan.

Pag-ampo: Ginoo, Imo kaming gihagit kanunay sa pagbag-o sa among kinabuhi.

DALAN SA KRUS 2021 DIOCESAN LITURGICAL CENTER
 16

Itugot ang katumanan niining among paningkamot nga makasubay

Kami sa panig-ingnan ni Jesukristo nga among Manluluwas. Amen.
(Amahan Namo…Maghimaya Ka Maria…Himaya sa Amahan…)

Awit 12:
Namatay si Jesukristo, didto sa kalbaryo.
Aron kita maluwas sa kasubo nga dako. (K1)

Mahiusa unta ang tanan, ning kamatayong bulahan.

Aron ang ta-nang binunyagan, moabot sa Gingharian. (K 2)

IKANAPULO’G TULO NGA ESTASYON

ANG PATAY’NG LAWAS NI JESUS GIPAHIMUTANG SA LUBNGANAN

Pagsimba:
Pangulo: Nagasimba kami Kanimo, O Kristo ug nagadayeg Kanimo.
Tanan: Tungod kay sa Imong balaan nga Krus gitubos mo ang kalibutan.
Pagbasa: (Juan 19:38ff)
Ang Pagbasa gikan sa Ebanghelyo sumala ni San Juan.
Human niini si Jose nga taga-Arimatea mihangyo kang Pilato nga kuha-
on niya ang lawas ni Jesus.(Si Jose usa ka sumusunod ni Jesus, apan sa
tago lamang kay nahadlok man siya sa mga kadagkoan sa mga Judiyo)
Gitugotan siya ni Pilato,busa miadto si Jose ug gikuha ang lawas ni
Jesus. May usa ka tanaman didto sa dapit diin gilansang si Jesus. Ug sa
maong tanaman may usa ka lubnganan nga wala pa gayud kalubngi. Ug
sanglit adlaw man kadto sa pagpangandam ug kay duol ra man ang lub-
nganan ilang gilubong si Jesus didto.
Ang ebanghelyo sa Ginoo.

Pamalandong:
Ang kinaiya nga maunongon Diosnon mao kini ang kinaiya nga anaa kang
Maria, inahan ni Jesus. Anaa usab kini nga kinaiya ni Juan, kang Maria
Magdalena, ug kang Jose nga taga-Arimatea. Gikan sa sinugdan hangtud
sa katapusan anaa sila pag-unong sa kasakit ni Jesus.
Mga igsoon, aduna bay makapahimulag kanato sa gugma sa Dios? Sa pag-
katinuod daghan sa atong mga igsoon nga nibiya na sa pagtoo kay nasuko
O nangluod. Adunay miundang na sa pagsimba kay gikapoy. Adunay mga
igsoon nato nga tungod sa mga kagul-anan o sa mga kapakyasan sa kina-
buhi wala na mangalagad sa katilingban ug miundang diha sa ilang pag-
bansay sa pagtoo. Sa pikas bahin, kon maunongon si Maria, iyang inahan,

DALAN SA KRUS 2021 DIOCESAN LITURGICAL CENTER

 17

si Jose, si Maria Magdalena ug si Juan, nga atong sumbanan sa atong pag-

kamaunongon, labi pang maunongon ang Dios nganhi kanato.

Pag-ampo: Dios nga maunongon walay higayon nga mibiya Ikaw kanamo.
Nagpadayon Ikaw nga nahigugma kanamo. Hatagi kami sa grasya
matag adlaw aron magmaunongon kami sama ni Jesus. Amen.
(Amahan Namo…Maghimaya ka Maria..Himaya sa Amahan)

Awit 13:
Mikanaog sa kamatayon, Ginoong mahigugmaon,
Sa nangamatay gisangyaw, ang bulahang pagka-banhaw. (K 1)

Ang kamatayon walay gahum, napukan ug nabuntog na.

Aron nga kita maluwas, sa kamatyon nga dayon. (K 2)

IKANAPULO’G UPAT NGA ESTASYON

SI JESUS NABANHAW
Pagsimba:
Pangulo: Nagasimba kami Kanimo, O Kristo ug nagadayeg kanimo
Tanan: Tungod kay sa Imong balaan nga Krus gitubos mo ang kalibutan.

Pagbasa: (Mk 16: 1-6)

Ang Pagbasa gikan sa Ebanghelyo sumala ni San Markos
Sa paglabay sa adlaw’ng igpapahulay, namalit ug mga pahumot si Maria
Magdalena, si Maria nga inahan ni Santiago ug si Salome aron pagdihog sa
lawas ni Jesus. Sayo kaayo sa Dominggo sa buntag, sa pagsubang sa adlaw
miadto sila sa lubnganan. Samtang naglakaw nag-ingnanay sila “Kinsa man
atong paligiron sa bato sa pag-abli sa lubnganan?”Unya pagtan-aw nila, ilang
nakita nga naligid na ang bato nga gisira sa lubnganan. Busa nanulod sila sa
lubnganan ug nakita nila didto ang usa ka batan-ong lalaki nga naglingkod
sa tuo, nagsul-ob og taas ug puting sapot. Nangahadlok sila apan miingon
Siya kanila, “Ayaw kamo kahadlok! Nangita kamo kang Jesus nga taga-
Nazareth, ang gilansang sa Krus? Wala na Siya dinhi. Nabanhaw na Siya.
Ang ebanghelyo sa Ginoo.

Pamalandong:
Hangtud karon adunay mga Judiyo nga naghulat pa sa pag-abot sa Mesias nga
gisaad sa Dios sa Daang Kasabutan. Dili man sila makadawat kang
Jesus nga mao ang Manluluwas nga gipadala sa Amahan. Kay ang ilang gihu
lat mao kadtong gamhanan ug kusgan kaayo nga Mesias. Sangkap og mga
hinagiban ug daghang mga sundalo ug armas nga gamiton sa pag-asdang.
Mga igsoon, tinuod gayud nga si Jesus nabanhaw. Dili tungod kay wala nay
sulod ang iyang gilubngan. Kay anaa may mga Judiyo niingon nga gikawat
DALAN SA KRUS 2021 DIOCESAN LITURGICAL CENTER
 18

ang lawas ni Jesus sa pagkagabii. Apan unsaon man nila pagtuis ang dakong
kamatuoran nga si Jesus anaa nagpakita man kanila, nikaon uban kanila.
Ug unsaon man nila pagsabot ang di-maihap nga mga yanong mga tawo
nga nabag-o sa ilang kinabuhi. Asa man gikan ang kaisog ug kadasig nga
anaa sa mga apostoles nga sa sinugdan talawan man sila kaayo? Kawang
gayud ang atong pagtoo kon wala mabanhaw si Jesus.

Pag-ampo: Ginoo, gihingpit Mo ang Imong saad sa kaluwasan pinaagi sa pagka-

Banhaw sa Imong Anak nga si Jesus. Lig-ona ang among paglaum.
(Amahan Namo….Maghimaya ka Maria… Himaya sa Amahan….)
Awit 13:
Mikanaog sa kamatayon, Ginoong mahigugmaon,
Sa nangamatay gisangyaw, ang bulahang pagka-banhaw. (K 1)

Ang kamatayon walay gahum, napukan ug nabuntog na.

Aron nga kita maluwas, sa kamatyon nga dayon. (K 2)

PAGTAPOS
PAGBASA: (Mateo 28:17ff)
Ang Pagbasa gikan sa Ebanghelyo sumala ni San Mateo
Sa pagkakita sa mga tinun-an kang Jesus, gisimba nila Siya bisan tuod may
pipila kanila nga nagduhaduha. Miduol si Jesus ug miingon kanila, “Gihatag
Kanako ang tanang gahum sa langit ug yuta . Busa panglakaw kamo ngadto
sa tanang katawhan sa tibuok kalibutan ug himoa sila nga akong mga tinun-
an, bunyagi sila sa ngalan sa Amahan, sa Anak ug sa Espiritu Santo. Ug tudloi
sila sa pagtuman sa akong gisugo kaninyol Ug hinumdumi, ako mag-uban
kaninyo sa kanunay hangtud sa katapusan sa kalibutan.”
Ang ebanghelyo sa Ginoo.

PAGPADALA:
Natapos na ang atong gihimo nga pagsubay sa Dalan sa Krus ni Jesus .
Apan ang hagit sa pagpuyo sa mithi ni Jesus nga atong nakat-onan karon
mas labi pang magdasig kanato sa pagbuhat gayud niini diha sa pamilya ug
sa atong kasilinganan. Bug-at kaayo ang Misyon nga gihatag sa Dios. Apan
dili kita mahadlok pagdawat kay anaa man kanunay naga-uban kanato si
Jesus. Ang Iyang pagkabanhaw naghatag kanato’g paglaum.Kining paglaum
maghatag kanato’g kadasig sa pag-ampo ug pagtabang sa atong isigkatawo.

PAG-AMPO: Ginoo, Ikaw man gayud ang tuburan sa tanang kaayo ug gugma. Ug
pinaagi ni Jesus Imo kaming gidasig sa pagpuyo sa katarong ug sa
kamatuoran. Sa mga panahon nga maluya kami, ihatag kanamo ang
grasya sa kadasig. Inita uban sa Imong Balaang Espiritu ang among
DALAN SA KRUS 2021 DIOCESAN LITURGICAL CENTER
 19

pagtoo. Himoa kaming magmatinabangon sa among isigkaingon.

Kini among gipangayo pinaagi kang Jesus, ang nabanhaw nga Dios
uban sa panabang ni Birhen Maria, nga Inahan sa Simbahan. Amen.

PANALANGIN: (Kon adunay pari)

Pari : Ang Ginoo maana kaninyo.
Tanan: Maanaa usab kanimo.
Pari : Manalangin kaninyo ang makagagahum nga Dios, ang Amahan,ang
Anak, ug ang Espiritu Santo. Amen.
Pari : Manglakaw kita uban sa kalinaw ni Kristo.
Tanan : Salamat sa Dios.
(Kon walay pari)
Pangulo: Hinaut nga ang Dios manalangin kanato, manalipod kanato sa mga
dautan ug magdala kanato sa kinabuhing dayon. Amen.
Katapusang Awit: (haum nga awit)

Hagit sa Kristohanong Katilingban

Koro: Ang hagit karon sa Kristohanong katilingban,

Naa diha sa pagbarog sa iyang kasugoan,
Pinaagi sa katilingbanong kalihokan
alang sa tawhanong kalingkawasan.

Giawhag kita sa pagpakita sa Kristohanong panaghiusa,

Sa pagsaulog ta sa Kwaresma duyog
sa kampanyang Alay Kapwa. (K)

Gidapit kita sa paghalad sa kinabuhing atong nadawat;

Ingon sa paghalad ni Jesukristo
Alang sa kaluwasan nato. (K)

DALAN SAKinasingkasing
KRUS 2021 nga Pasalamat ngadto kang Rev. Fr. Cornelio Toraja,LITURGICAL
DIOCESAN DCD sa iyang
CENTER
paghatag panahon ug pagpaambit sa iyang pamalandong alang niining Dalan sa Krus
2021. Kini gipa-ambit alang sa tanang magtotoo sa panghinaut nga mag-maampoon
ug makahuluganon ang atong pagsaulog niining Kwaresma tuig 2021.