DIOCESE OF LEGAZPI

The Chancery, Cathedral Compound

Albay District, P.O. Box 182, Legazpi City 4500, Philippines
Telefax: (63) (052) 742-1243
email: legazpichancery@yahoo.com

KATOTOOHAN, KATANOSAN ASIN KARAHAYAN KAN KAGABSAN

Surat Pastoral para sa maabot na Eleksiyon

Mga Tugang ko sa Pagtubod:

Nagpoon na an kampanya kan mga kandidato para sa maabot na eleksiyon. Padagos na

nadadangog man niato an mga impormasyon manongod sainda, siring man an sainda mismong
kapahayagan kan saindang plataporma, asin kun ano an boot nindang gibohon kun sinda paladon
na manggana.

Sa atubang kan gabos na ini, asin mantang pig-aatid-atid niato kun siisay an boot tang iboto pag-
abot kan eleksiyon, importante na igwa kitang binabasehan kan satong paghorop-horop asin giya
sa satong pagpili.

Sa sakong paghorop-horop, igwa ako nin piniling TOLONG (3) giya asin basehan tanganing
matabangan ako sa pagpili kan mga maninigong mamamayo sa satong nasyon. Kadakul totoo an
puedeng hilingon na basehan kan pagsokol o pagmidbid sa mga kandidato, alagad ining
TOLONG ini sa paghuna ko an mga orog na importante. An TOLONG ini iyo an:
KATOTOOHAN, KATANOSAN asin KARAHAYAN KAN KAGABSAN.

KATOTOOHAN (An katotoohan iyo an madara saindo sa katalingkasan. Jn 8:32)

Aram ko na huli sa impluensiya kan social media (sa manlaen-laen na platform kaini arog kan
Facebook, YouTube, TikTok, Twitter asin iba pa) kadaklan na beses nababale-wala na an
katotoohan. Aro-aldaw kadakul na mga nababasa ta sa mga platform na ini na bakong totoo o
fake! Kaya ngonian na panahon kan eleksiyon, obligasyon ko sa sakong sadiri na saraon kong
marhay an mga nababasa, nahihiling o nadadangog ko sa social media. Dai ako matiwala lang sa
mga magayon na padagka sa YouTube, o an mga mahamis na komentaryo na yaon sa mga posts
asin items na pinapasa sako. Obligasyon ko sa ngaran kan katotoohan na hanapon ko kun arin an
tama asin an sala, kun arin an totoo asin pekeng impormasyon.

Nawawara an kabanalan kan balota asin an sakuyang dignidad bilang tawo kun babale-walaon
ko an katotoohan, kun iboboto ko an kandidatong utikón asin naggigibo nin imahen na harayo sa
katotoohan. Giromdomon ta an kasabihan na an totoo magdadanay na totoo maski dai ki
nagtutubod digdi, asin an sarong otik magdadanay na otik maski pa an gabos magtubod digdi.

KATANOSAN (An matanos na tawo naglalakaw sa katanosan. Prov 20:7)

An sarong tawong matanos enot sa gabos may malinig na puso. Matanos an saiyang paglingkod
sa banwaan. Tatao siyang maggalang sa kapwa asin dai siya nandadaog-daog sa iba, orog na
idtong mga maluya. Bilang tagapaglingkod o serbidor kan banwaan malinig an saiyang record.
Bako siyang paradaya o mahàbas, dai nangungurakot kundi dayupot an pagtao nin tamang
serbisyo sa mga tawo.

Kaya iyo ini an hapot ko: Siisay sa mga kandidato an matanos sa saiyang paglingkod sa
banwaan? Siisay sainda an masasabi kong malalauman sa tamang pag-administrar asin
pagpadalagan kan gobierno? Siisay sainda an panalmingan nin sarong malinig asin simpleng
pagkabuhay? Siisay sainda an dai nanggad maaakusar nin kurapsiyon?

KARAHAYAN KAN KAGABSAN (Ako kaiba nindo bilang sarong naglilingkod. Lk 22:27)

Para sa sarong namamayo kan banwaan, nasa isip asin boot niya orog sa gabos an karahayan kan
gabos - dukha man o mayaman, mangmang man o may inadalan - bako lang an partido na
saiyang kinabibilangan, o an mga tawo o grupo na nagsuporta sa saiyang kandidatura. An
saiyang mga programa para sa ikararahay kan ekonomiya para sa kapakinabangan kan kadaklan,
asin bilang simbag sa mga problema kan presenteng panahon, orog na ining pandemya.

An kandidato na boot kong iboto, nasa isip asin boot niya kaya an karahayan kan kagabsan?
Pigdadangog niya kaya an agrangay kan mga pobre asin nasa kahorasaan? Pano ini nahihiling sa
saiyang gibo asin paglingkod? Ano an klase kan saiyang pagkabuhay? Ano an nagin simbag niya
sa pag-atubang niya kaining pandemya? Ano an plano niya para sa pagkasararo asin
katoninongan sa satong nasyon?

Boot kong idagdag na basehan kan satong paghorop-horop sa pagpili nin satong iboboto an
satuyang PAGTUBOD sa Mahal na Dios. Alagad para ini sa sato na mga maboto, bakong gayo
sa mga kandidato - maski ngani importante man na hilingon kun pàno an saindang pagtubod
nakaka-impluesiya sa saindang paglingkod. Mas orog ini para sa sato. Sa satong pag-andam para
sa maabot na eleksiyon, dai kita malingaw na maghagad nin liwanag nin isip sa Mahal na Dios.
Sa tabang kan Saiyang Espiritu logod tama an satong pipilion na mga kandidato na madara sa
satong nasyon pasiring sa sarong mauswag, nagkakasararo asin matoninong na Pilipinas!

Sa ngaran kan katoninongan na nagbubugkos sato,

+JOEL Z. BAYLON, D.D.

Obispo kan Legazpi

13 Pebrero 2022