Marticio, Excel Joy C.

BEED IA

Sagupaan ng mga Partido; Isinisiwalat ang mga Pangako; Mga minamahal kong
Kapatid, Kapamilya, at Kapuso; Kanino mo ilalaan ang iyong boto?

Ang pamumuno ay hindi lamang kapangyarihan at karangalan, kundi isa itong tungkulin
at pananagutan sa bawat taong sakop ng kanyang pinamumunuan. Walang sinuman ang
makapagsasabi kung sino ang karapat-dapat na maging pinuno, tama ba? Gayunpaman, tayo
ay binibigyan ng pagkakataon upang pumili ng taong sa tingin natin ay kaya tayong pamunuan
at pagsilbihan.

Paulit- ulit na sinasabi ni Pangulong Aquino na walang puwang sa kanyang

administrasyon ang mga gagawa ng katiwalian at kasamaan. Pero habang paulit-ulit ang
kanyang sinasabi sa “tuwid na daan”, patuloy naman ang korupsyon sa mga tanggapan ng
ating pamahalaan. Napakatagal na panahon na kaakibat ng salitang “pulitika” ang “korupsyon”
di po ba? Ito ang rason kung bakit umiigting ang panawagan ng iba’t ibang sektor ng lipunan
na patalsikin si Aquino, sa halip na manahimik at maghintay na lamang sa nalalapit na
eleksiyon.

Pero sa paglipas ng panahon, papalapit na nang papalapit at hayan na nga, nagkalat

nanaman ang mga tarpaulin, posters ng mga kandidato sa ating daraanan, polyetos, t-shirt na
may pangalan at larawan ng kandidato, pamaypay, boller, key chain, at kung ano-ano pang uri
ng campaign paraphernalia para lamang maibenta ang pangalan ng mga kandidato na sabik
ng makaupo sa kanilang puwesto. Mayroon pa nga akong nasaksihan na nagpa-BINGO
upang sumikat lamang ang kanyang apelyido. Ang tanong, tama ba ang ginagawa ng mga
kandidato? Padadaan ba tayo sa ganitong mga estilo ng pangangampanya para lamang
makuha nila ang ating boto? Nasa bawat botante ang kasagutan kung tayo ay padadala sa
ganitong uri ng pamamaraan para makuha nila ang ating sagradong boto.

Anim na taon ang bibilangin, anim na taong maninilbihan, mga suliranin sa ating
sambayanan, sana nga magkaroon na ng kalutasan. Sana nga lang hindi puro pangakong
kalauna’y napapako. Pangako, pitong letra lamang iyan pero marami na ang nasasaktan sa
salitang iyan, kung kaya’t masakit ang mabigo. Tunay na masarap pakinggan ang mga
matatamis na pangako ng isang tao. Maging ito’y mula sa isang pulitiko, sa isang manliligaw at
sa kahit na sinong tao. Ang pangako nga ay kay daling sabihin datapuwat, ito rin ay madaling
wasakin. Totoo nga, minsan ang pangako ay nagagawa nating sirain. Ito ay marahil hindi natin
ito natupad o hindi kaya’y hindi natin sinubukang tuparin. Hindi naman masama ang mangako,
huwag lamang po sanang mapapako. At sadyang makapal na ang mukha ng taong di
marunong tumupad sa kanyang pangako.

Pagkatapos ng eleksiyon isa lamang ang hinihiling ko. Nawa ang magkapalad na
magwagi sa puwesto ay ang taong may pananampalataya sa ating Poong Maykapal at hindi
iyong mga nangagaral ng salita ng Diyos. Isa lang ang maimumungkahi ko, maging dilat nawa
tayo sa katotohanan. Huwag sana tayong pumili ng buwayang lubog na kahalintulad ng
nakaupo ngayon sa mataas na posisyon ng ating bansa. Pumili ng kandidatong sapat ang
kaalaman, at handang labanan ang katiwalian. Tandaan natin, hindi natutumbasan ng kahit
anong materyal na bagay ang pagmamahal, respeto at tiwala. Ipanalo ang pamilyang Pilipino.
Dapat Tama!

Sa lahat ng mga Pilipino na may pusong makabansa’t makabayan, muli, isang

napakagandang umaga po sa ating lahat.