Pagsisisi ng Isang Bilanggo
ni Cirio H. Panganiban
(Sabayang Pagbigkas)
SOLO
Ang laki sa layaw karaniwa'y hubad
sa bait muni't sa hatol ay salat,
ALL
masaklap na bunga ng maling paglingap,
habag ng magulang sa irog na anak!
SOLO
Ako'y nagsisisi!
ALL
Ako'y nagsisisi! Ako'y nagsisisi!
Ang lahat at lahat ng nangagawa ko'y gawang
pawang hamak.
SOLO
Ako ang may sala ng pagkawakawak
ng buhay kong itong busabos ng palad....
ALL
Ang laki sa layaw karaniwa'y hubad
sa bait muni't sa hatol ay salat,
masaklap na bunga ng maling paglingap,
habag ng magulang sa irog na anak!
SOLO
Mga magulang kong labis magpalayaw,
kaluluwa ninyo ngayon ay nasaan?
ALL
Nasaan? Nasaan?
Tingnan ninyo akong labis na minahal
ay ngayo'y lugami sa hirap ng buhay.
Ako'y nagsisisi... Di ko nalalamang
sa likod ng inyong turo't mga aral
ay may mga tinik na masusumpungan
itong katawan kong kinikilabutan.
SOLO
Ako, mulang kayo'y tuluyang umalis
at mag-isa akong sa lupa'y tumangis,
ALL
bait at muni ko'y nangaglahong tikis,
masaklap na bunga ng maling pag-ibig.
Ako ay nasalat sa hatol ng bait,
bawat salita ko'y nunuga ng lintik,
at bawat kilos ko ay nakayayanig.
SOLO (P1)
At ako!!!!
SOLO (P2)
Ako!!!!
SOLO (P3)
Ako!!!
ALL
sapagkat ako ay binuhay sa layaw,
(sa maling paglingap ng mga magulang)
ay lumaki akong kamangmang-
mangmangan
at ulo ng sama sa sandaigdigan.
Ako'y walang Diyos na iginagalang,
tingin ko sa tao ay hayop sa parang,
ang sama at buti'y di ko nalalaman,
SOLO
Ito ba ay tama? Ito ba ay masama?
ano pa nga't ako'y kasama-samaan.
Ang lahat ng hilig nitong katawan ko'y
para ring masama...
SOLO
Ako'y natutong manloob
ALL
Manloob
SOLO
magnakaw
ALL
Magnakaw
ALL
mangharang ng tao,
magsugal, magsabong, maglasing, maglilo,
hanggang sa ang aking palad ay nagtungo
sa isang kulungan...
SOLO
Nabilanggo ako!
O! aking magulang!...
ALL
Bakit akong ito'y inyong pinalaking layaw na
totoo?
ALL
Magbuhat sa aking tahanang madilim,
dini sa kulungan ng mga salarin,
kayo, magulang kong payapa sa libing
ang tinatawagan ng lunos kong daing;
maanong kung kayo'y muling magigising
ay ikalat ninyo ang isang tuntuning
Ang anak ay hindi dapat palayawin,
at gayon ding hindi sa mali'y lingapin.
SOLO
Tinatawagan din kayo, mga anak,
nitong kaluluwang nasa paghihirap.
Kayo'y huwag nawang sa layaw humanap
ng ikaanyo ng inyo ring palad.
ALL
Ang laki sa layaw ay hubad na hubad
sa magandang kuro'y sa dakilang hangad.
Yaong sa magulang na maling paglingap
sa pagkabusabos at pagkapahamak.
SOLO
Magulang!!!
ALL
ang anak upang dumakila'y
huwag palayawin mula pagkabata,
pagkat ang lumaking sa layaw alaga
ay halamang hindi magbubungang kusa.
SOLO
Anak!!!
ALL
magulang mo ay hindi Bathalang
ang bawat ibigay ay isang biyaya;
ang maling paglingap nila'y wala pala
kung hindi ka mandin malunos sa luha.
ALL (singing)
Sana'y di nagmaliw ang dati kong araw
Nang munti pang bata sa piling ni nanay.
ALL
Magulang ko't ako ang may kagagawan
ng sama ng aking naging kabuhayan
Magulang ko, pagkat ako'y pinalayaw,
at ako, sapagkat layaw'y nasarapan.
Ang layaw na bunga ng maling kahatulan;
ang batang lumaki sa mga palayaw,
ubanin na'y di pa marunong mamuhay.
SOLO
Ako'y nagsisisi nang tapat na tapat!!
ALL
Ako’y nag sisisi!! Ako’y nag sisisi!!
ALL
Kung ako ay hindi sa layaw nagbuhat,
tinanggap-tanggap ko ang maling paglingap,
disi'y hindi ako naging taong hamak,
SOLO
Maawaing Diyos, hingi ko'y patawad
sa mga sala kong napakabigat!
ALL (singing)
At huwag mo kaming ipahintulot sa tukso at I
adya mo kami sa lahat ng masama.
ALL
Ibig ko na ngayong buhay ko'y mautas
upang ang lahi ko'y huwag nang kumalat!