Kohhrana rawngbawlna hna hrang hrang chelha mawhphurhna latute hian tu rawng nge kan

bawl kan tih chuan pakhatnaah chuan Pathian rawng kan bawl a ni. Mi ngaihdan emaw hruaitu
leh pawlin a duhdan ai pawhin Pathian duhdan chu kan dah pawimawh tur a ni a. Pahnihnaah
chuan Pawl Rorelna thu kan ngaipawimawh leh tur a ni ang. Rorelna pawh chuan Pathian
dawtah chuan mipuite duhdan leh tha tihzawng a ngaihtuah tel a tul a ni. Pathian rawng kan
bawl lai hian Pathian mite, mipuite rawng kan bawlsak tel a ni tih kan hriat fo a pawimawh.
Pathian chu a hring a hranin kan hmu thei lova mite kaltlangin Pathian hmel kan hmu fo thin a
ni. Pathianin Kohhran mipui aiawha chanvo min kawltirah hian ka duhdan ka dah pawimawh
ber a thiang lova, Pathian leh a mite kan dah pawimawh hmasak thiam a pawimawh a ni.
Mimalin duhdan, tha tihzawng leh ngaihdan kan nei theuh a. Kan mimal duhdan ringawt kan
vuak len lutuk a Pathian leh a mite kan theihnghilh mai chuan intih lal, thu-duh leh chapo a hnai
thin. Pathian rawngbawlna hnaa midangte rawngbawlsaktu chu midangte chhiahhlawhah a
insiam a, an ke silsak turin a inphahhnuai a ni. Mawhphurhna kan neih hian ‘thuneihna’ emaw
‘ropuina’ emaw min khumtir lo va, chhiahhlawh hna kan kovah a nghat zawk a ni tih i hrereng
ang u.