BMA AW

An Official Organ of The Bangalore Mizo Association Registered Under Societies Act of Karnataka No. BLU-S188-2007-08 Date 7 May 2007
Vol. XVIII Issue No.06 Bangalore Mizo Association Pathianni Tin Chhuak Chanchinbu Date: 6th May 2012 Phek Khatna

Tualchhung
Tv. Jacob Zoenthanga (KLE College a Law zirlai) Jaundice natna avanga Ananya Hospitala enkawl mek chu Pathian zarah that lam a pan zel a. BMA member ten i tawngtaipui zel ang u.

GOD IS GREAT, BEER IS GOOD and PEOPLE ARE CRAZY - Carey Sailo
(Billy Currington hla God is great, beer is good and people are crazy tih hla hmanga ka ziah, thu belh pawh a awm nual bawkKa Pu I va mawl em, mahse ka lawm e tih in tan phawt ang aw) Zan khat chu ka khawhar leh lunglen hnemah tiin keimah chauhin Bar ah chuan Beer in turin ka kal a. Ka thu, ka in tan vel chiah tih ah hian ka bul deuh lawkah chuan Putar pakhat hian a Beer ken chu a lo in ve mek bawk a. Ka rilru chuan thil thui tak min ngaihtuah tir nghal a. Chuan chu putar chu a bulah thu in ka va kawm nghe nghe a. A rilru ah enge awm tih pawh ngaichang lovin kei chuan chu putara chu ka va thian kawm nghal hmiah hmiah a, ani pawh chuan tha takin min lo chhang ve zel bawk a. A khawi zawk kha nge ka beer tih pawh ngaichang tawh lovin, nui chungin kan duh zawk zawk kha kan in ta vel mai mai a. Khatia nula chhelo deuh deuh sawi paha kan nui bawk bawk laiin, rilru ah politics rawn lang leh thut, kan han sawi chhunzawm leh nghal a, titi pawh a kal tha dun khawp mai. Chutia hlim taka kan titi lai chuan ka pu chuan, Mihring hi chu a chang hi chuan kan va mawl thin tak em, mahse Pathian hi a tha em a, chuvang alawm beer pawh tui kan tih em em tih pah chuan kan han nui dun leh hak thin a. Chuan ka pu nen chuan in ngaina chhovin kan titi dun zel a. Vawi 2 lai indopuina a a tel tawh thu leh a nupui nena an inthen thu min hrilh chuan a ruk tak chuan ka pu chu a rilru a hah ani tih ka hrethiam ve a. Chuan a rilru tihdam nan, tiin thudang sawipuiin nula chhelo bawk ah chuan kan kir dun leh a. Vanneihthlak tak maiin nula chhelo deuh pahnih hi kan thutna lehlam chiahah chuan an lo thu a, keichuan ka pu ka rilru a dah reng chungin nula te chu va biain ka pu nena min lampui turin ka va sawm a. Tichuan kan lam ho ta, ka pu pawh a lam dan vel han en chuan a vawikhat lamna ani lo tih a hriat nghal theih a. Mahse ka pu chuan chutiang thil chu a thleng reng thei dawn lo tih chu a hre si a, a rilru hah avang chuan nula lampui ai chuan, thihna leh nakin hun lam kan sawi dun angai ta zawk a. Chutia kan sawi dun lai chuan ka pu chuan a meizial chu la chhuakin, ka hnenah chuan Hetiang thil hian engtik ah emaw chuan ka nunna hi min la laksak ngei ang le tih pah chuan, hun tam a nei tawh lo tih inhre niawm takin tui tih hmel deuhin a zu a, kei chuan ka lo en reng a. Chutia ka en lai chuan a hma lawk pawha ka hnena alo sawi tawh, Mahse Pathian hi a tha a, beer hi tui kan ti dun bawk a, chuan mihring hi kan lova mawl em tih chu min hrilh nawn leh a. Chuan zing dar 2 chu a lo ri ta der mai a, ka pu hnen ah chuan Karleh ah, hun leh hmun ngai ah aw ti chung chuan kan in mangtha ta a. Mahse kha ka mangtha na kha ka pu hnena ka thusawi hnuhnung ber ani dawn tih ka hre si lo. Hun tam a liam ta, kha ka pu hmel hmuh beiseiin hun leh hmun ngai kan sawina ah khan ka la kal reng thin a, mahse ka pu hmel hmuh tur a awm lo, midang ka zawh pawhin chhan angaihna an hriat loh avangin rilru hah deuh leh ka pu rilrua awm reng chungin kha kan inhmelhriatna hmun kha Beer pawh in lovin ka chhuahsan leh thin a ni. Zing khat chu chanchinbu phek hma lamah hian mi hausa millionaire thih thu an ziah kha ka chhiar fuh hlauh mai a, chutah a thlalak an rawn dah kan en chu, mak ka va ti em! Kha ka pu, beer ka inpui ngei, mi pangai ve mai emaw ka tih kha mi hausa tawntaw lo ni rengin. Chutah a chanchin an ziah dan ka chhiar, ava ngaihsan awmin, ava lainat awm em. Thirchhia zawn atanga steel industry puitling tak a din theih te kha ava ngaihsan awm em. A hmangaih a nupui duh takin a lo uire san a, a fapa neihchhun lahin a sum thenkhat ruk chhuah sakin hmun hla daih ah an dam nge thi tih pawh hre lovin a nun kha alo hmang reng ani si a, ava lainat awm em. Fa duat tur a neih lo vang ani ngei ang le. Khami zan pawh khan a thuruk thenkhat, fa ang maia min en vanga min hrilh ni. Tichuan kei chuan ka chhiar thla zel, a tawp ah thil inziak chuan min ti lawmin ka mittui hi ava ti tla nasa em. Ti hian alo inziak a, Ka fapa duhtak, ka chunga thil i tihsual avang khan tinge mi kalsan daih mai le. Ka hmangaihna che hian kha thil pakhat intihsual te chu a ngaidam vek tawh si a. Lokir leh rawh ka tih lai pawhin engahmah mi ngai tawh si lo. (phek hnihah chhunzawmna..)

Tv. Lalhruaitluanga (Valpuia Sailo) chu, a pa Pu Vanlalropuia (kum 56) chuan, hun rei tak Cancer natna a tawh hnuin, may ni 3 dar 10 a.m. khan a boral san a. Valpuia hi, a Pa ruang thlah turin a kal hman ta lova, BMA memberte'n Pathan thlamuanna leh awmpuina i dilsak ang u.

Tv. Lalruatsanga (UVCE College a Enggr. Zirlai) chuan vanduaithlak takin an inkhelhna ah a ke ruh a ti tliak palh a, naktuk hian Fortis Hospitalah zai tur a ni. BMA memberten tawngtainaah I hre reng ang u. Tunlai hi BMA membership registration tih thar leh hunlai a ni a, Bangalore a mizo awm tawh phawt chuan membership form hi lain, a tul ang te ti fela, thehluh theuh i tum ang u. Hei hi kanin hriatpawh na atana pawimawh leh tangkai, kan tihmakmawh a ni.

Kan President, Pi Lalrinpuii pawh chhungkaw lam tulna avangin Kodaikanal lamah a thang mek a, tunkar thawhlehni a lo kir leh tura beisei a ni.

**************************** Khawvel:
Premier League Latest Table Team MP Manchester City 36 Manchester United 36 Arsenal 37 Tottenham 36 New Castle United 36 Pts 83 83 67 65 65

Vol. XVIII Issue No. 06 Bangalore Mizo Association Pathianni Tin Chhuak Chanchinbu Date: 6th May2012 Phek Hnihna
Editor Lalhruaitluanga Sailo Joint Editors Lalmuanzuala Zaithanmawii Hnamte Contributor Benjamin Rualthanzauva Dr. Lalhmingmuana Sailo Circulation Managers Diki Hnamte Hmingthana Ralte BMA AW lak man: Thla khat Rs.20 Thla thum Rs.50 Thla ruk Rs.90 Thla sawmpahnih Rs.180

E-mail: bmanews@gmail.com Website: www.bangaloremizo.info

Editorial
Thil hlutna kan teh dan hian mihring nun hi thui takin min kaihruai a. Kan ngaihsan, lawmzawng leh kan thil hlut te hi kan chenna a zir te, kan thian kawm thin te leh kan hun hman dana zir te in a lo danglam thei a. Hmana kan thil ngaihhlut ngai loh, thil hote ni a kan ngaih thin te pawhin, a changchuan kan nunah nasa takin hlutna a lo nei thin a ni. Hengte avang hian keini hnam, la naupang tak hian in zir kan ngai tak meuh meuh a. Keini aia hnam puitling leh upa zawkte tih dan tha taktak hi entawnin kan nunah kan seng luh a tul a ni. Kan thil hmuh leh hriat te hi keimahni ngaihdan avang chauhva awmze nei an ni a, ngaihdan kan neih thiam erawh a pawimawh. A thenin finna te an ngaihlu a, a thenin sum leh pai leh khawvel hausakna te umin an hun an hmang bawk a, thiamlo leh diklo intithei tur kan awm lo, amaherawhchu kan thil hlut te leh lawmzawng te hian hlimna tluantling min pe thei ange'm?? tih hi kan inchhut nawn fo a pawimawh. Rilru hmunkhata awmin, hmangaihna hmunkhat neiin, inthuruala rilru hmunkhata awmin, ka lawmna tifamkim rawh u. Elrel leh inngaihhlut avanga engmah ti lovin, mi tinin inngaitlawm takin mahni aiin mi dang tha zawkah ruat theuh rawh se; mahni ta ta mai en lovin, mi dang ta pawh en theuh zawk rawh u. Philippi 2:2-4

(phek khatna chhunzawmna..) Ka tan chuan dam hi thil thlakhlel awm ani tawh lova, ka cancer vei leh I nu avanga ka rilru hahna zawng zawng hre reng chunga mi kalsan theihna kha eng ang hmangaihna nge niang le? Min theihngilh tawh avangin kei ngei pawhin theihngilh che tumin, zan khat chu beer in turin ka chhuak a, ka tan chuan vanneihna ani, fa ka la hmuh ngai miah loh ka chhar phah a ni si a. Ka fapa tlangval duhtak, he ka chanchin ilo chhiar ve chuan, khami zana ka rilru i tihhlim zia leh dam thlakhlelh awmzia min hriat nawn tir leh avangin ka lawm e. A karleh ah pawh rawn kal ka tum a, mahse ka natna a zual avangin damdawi in ah ka luh angai a, I hming leh I phone no. hria ila chuan ka rawn be ngei ang che, mahse a tlai zo ta si a. I hnena lawmthu sawi kha ka ba asin, mahse a theih tawh si loh. Fapa chu nei ve mah ila Pa angin min en duh tawh si lova, nang chauh hi i ni, ka thian, fapa anga ka en theih tawh chu ni. Chuvangin I hnena lawmthu sawi pahin ka rochan zawng zawng hi I hnenah ka hlan e, ka ukil pawh ka hrilh tawh a, a hnuaia number ah hian ilo be dawn nia. Mahse ka ukil hnenah chuan, khami zana ka kawr hak kha I sawi dawn nia aw, nangmah ngeiin ka ro I dawn theih nan. Ka fapa, I nun kha fimkhur deuh in hmang ang che, dam takin aw tia inziak ka chhiar zawh hnu chuan, ka kun nghal, ka mittui chuan ka kephah ka dahna lei chu a ti hnawng nghal vek a. Tichuan kei chuan ngawi rengin Beer, khami zana kan in ang ngei leiin kha ka pu thlan lam pan chuan ka kal nghal. A thlan hma ah chuan thingthi in ka pu hnenah chuan, Ka pu, Mihring hi chu an lova mawl em, mahse Pathian hi a tha a, chuan beer hi tui kan va ti dun em i tih kha tunah hian nangmah hian I tih hlawhtling vek asin. Kei, I Vawikhat min hmuhna maiah I rosum zawng zawng min hlan duh khawpa mawl I lo ni ta, mahse thlamuang taka I thih theihna leh ka tan malsawmna anih avangin Pathian hi alo va tha em. Beer tui kan tih em avangin, hei khami zana kan beer in ang ngei kha ka rawn ken sak a che aw, min lo nghak reng dawn nia. Ka pu Mangtha le tiin.

********************************************************

Thosi pawh, thosi awm lohna hmun tinuamtu

JD
Lehkha thiam thei tih ni ngai reng reng lo, sikul kal lai pawha thiante zui kual ve mai mai thin, mahse hau leh hrem zingah chuan tel ve ziah thei tho, chin thar apiang awmze hre vak chuang lova ching ve mai, thil thar chhuak apiang hre ve zul, sawi chhun zawm dawna, a lam tawi leh lam sei tak ngial pawh hre leh lem chuang si lo, sawisel thei tur tawk lek, laktlak mang si loha rimawi hre ve zul, Inkhelh lamah lah, mizo tlangvalin an lo khelh ve toh chu, khel ve vek tawh, mahse veng pawn tak ngial pawh han chhuahpui tlak si loh, veng chhungah lah, engah mah han lu langna teh chiam nei ngai lo, a member lumum satliah ve mai, eng vakah mah zeina teh chiam nei lem lo....ka lo nih hi le, tia ka inngaituah lai chuan "mi pangngai vantlang" ve tak ka ni tih ka in hre chhuaka. Ti hian, ka ngaituah chhova, mahni theihna in en lova, mite an thiamna leh an talent-te nen han inkhaikhin ve leh ringawt hi chuan, ka va lo chawr chhe bik ve tih mai loh chuan han tlangkawmna vak tur ka nei lo. Mahse midang nen inkhaikhin loh hian, mahni leh mahni lo in en mai tur hi a lo nia. A ni tak renga, mite hian an thiamna leh talent nei tur hian, sum leh pai, tha leh zung engzah nge an lo seng tawh tih ngaituah miah lovin, tehfungah kan han hmang ve leh ringawta. Anni anga lo ti ve peihlo ta reng reng chu, engah nge mawni le, anni angin emaw anni aia han ropui ta vak turin ka han in ngaih le aw. Min Siamtu hian in ang lo, mahni chem kalna theuva, tih ve thei fu tur hian min lo siam veka, thiamna leh talent-te hi in ang nei thup chu kan ni lo. "Lungpui pawh lungte in a kamki loh chuan a awm thei lo", tih khawvela cheng ho tlang tura siam kan ni tlat sia. Thosi pawh, thosi awm lohna hmun tinuamtu an tih ang deuhin, thiamlo leh a zeilo chite hi awm ta lo ila, thiamte leh a zei bikte an awm dawn chuang a mawn le. Mahni tawkte te hian kan thiamna leh talent-te hian tangkaina an nei vek a ni. Mahni a, in haichhuah hi kan mawhphurna teuh a ni. Tumah thiam sa a piang chhuak an awm bik lo tih hre reng chungin, Ka tih loh chuan tunge tih chuang ang tih rilru kan put reng a va tul ve.

**************************** Zanin inkhel tur te

New Castle Vs Manchester City Aston Villa Vs Tottenham Bolton Vs West Brom QPR Vs Stoke Fulham Vs Sunderland WolverHampton Vs Everton Manchester Utd Vs Swansea

****************************

********************************************************