CYBER SECURITY & SOCIAL MEDIA SECURITY

- Rollick Lalnuntluanga

Kan Branch YMA hruaitute duhsakna changin Ni 9/9/2014 (Thawhleh) zan khan
Central YMA leh ICT Department, Govt. of Mizoram buatsaih IT Awareness campaign on
"Cyber Security & Social Media Security" zirhona hun Central YMA Hall a neihah Pu
Lalhmingliana (Puia) nen kan branch aiawhin kan tel ve hlauh mai a, kan vannei hle a ni.
He hunah hian Aizawl chhunga YMA Branch hrang hrang atang branch aiawh mi 2
zel kalin mi 200 vel kan ni a. Tunlai khawvel hmasawnna leh thang zelin a ken Computer,
Mobile phone, Tablet leh a dangte Mizo ten kan hman danah kan fimkhurna tur, hriattur
pawimawh tak tak leh kan invenna turte zirho a ni. Pu Lalthlamuana, Chief Informatics
Officer, ICT Department-in paper a present a, zawhna leh chhanna hun hlawkthlak tak
hman a ni bawk. Sawihona hunah hian Pu Lalhmingliana (Puia) pawh a ding a, kan
hlawkpui hle a ni.
Thiamna a san zual poh leh sualna pawh a sang ve zel a, Mizoram ngeiah pawh
Cyber Crime (Informatioan technology leh a kaihhnawih hmanga sualna) hian min chiah
ve ta hle mai, chuvangin tunlai thiamna hmanga social media kan hman danahte kan
fimkhur a ngai tak zet a ni. Kan tum reng vang pawh nilovin kan hriat loh lai hian mi pawi
sawiin Dan kan lo bawh chhe reng thei a ni. Mobile phone, Computer leh Internet kan
hmannaa kan hriattur pawimawh tam tak kan thu ngaihthlak atangte leh rilru a lo vei ve
thin te atanga thenkhat han tarlang ila.

Mobile Phone :
Mizoram-ah hian mobile hmangtu kan pung chak hle a, chutihrualin a hman dan
kawngah leh fimkhur ngai laiah erawh kan la fimkhur tawk lo hle. A hmasa bera kan hriat
tur chu kan mobile phone (SIM Card tel miah lo pawh) hian number inang lo vek
IMEI number an tih chu a nei a. Mi thenkhatin chhui chhuah theih loh turah inngaiin
number dang hmangin mi vau nan mobile phone te an hmang thin, mahse vauna
dawngtuin mobile phone (SIM Card) number kha a neitu hre lo mahse he IMEI number
atang hian chhui chhuah theih a ni a. Chutiang avanga thubuai nei pawh Mizo zingah ngei
an awm tawh a ni.
Tin, SIM Card chungchangah hian Telecom Regulatory Authority of India (TRAI)
chuan Dan leh thuchhuah eng emaw zat a nei a. Chung zingah chuan Mizoten khawlaia
SIM Card, tu hming a register nge tih hriat loh lei leh zawrh kan ching hi Dan bawh
chhiatna leh thil tha lo tak a niin, tum loh deuha buaina lian tham taka inbarh luh theihna
a ni. Mahni hming ngeia SIM Card register neih a him ber a ni. Tin, Smart phone kan
hmang uar ta hle a, application na zawng install loh a him, apps kan install tur te official
store (eg: Play store) a mi ngei install a him a, installer file inpek chhawn (a security a him
leh him loh kan hriat chian si loh) leh website hriat chian loh a mi te install loh a tha a ni.

SPAM MESSAGE :
SMS, Email, Facebook Message leh thil dangah tu tih hriat loh hnen atang
vanneihna dawng anga thu dawn "Chu mi kha mi-ah chuan i number/email etc hi
lawmman dawng tura thlan a ni a, Cheng Nuai …. chuti zat i dawng a........" tih ang chi
message kan dawng a nih chuan awih reng reng loh tur a ni. Hetiang thil hi inbumna thil
mai mai a ni a, DELETE hmiah hmiah mai tur a ni. Hetiang avanga buaina leh sum
engemaw zat lo chan ta kan Mizo unaute ngei engemaw zat chu ka lo tawng tawh a, a
titu ten a awihawm thei ang ber turin ruahmanna tha tak an nei thin a. Mahse, heng hi
inbumna thil vek a ni tih i hria ang u.

ONLINE SHOPPING :
Internet kaltlanga thil lei (Online Shopping) pawh kan hmel hriatin kan hmang
nasa ta hle mai. Chutihrualin, online shopping kan tih dawn hian kan fimkhur hle tur a ni.
Website nazawng ami leh Google hmanga kan search chhuah thil lei tur kan hmuh
nazawng te hi lei ngawt loh tur a ni. Website lar leh midang pawhin an hman than ngei
atanga lei hram hram tur a ni. Website thenkhat a lem (fake) a awm ve thei a ni tih kan
hriat a tha, website lem (fake)-ah kan Credit/Debit Card, Netbanking kan lo hmang palh a
nih chuan kha website neitu khan kan bank account duh ang angin an khawih thei dawn
tihna a ni a, ho tein kan sum leh pai te kan chan thei a ni. Tunlai e-commerce website
rintlak tam zawk chuan "Cash On Delivery" an nei a, hetiang hmanga lei hian tihsual a har
a, kan thil duh kan chah kha a lo thlen hnuah pawisa kan pek chauh dawn avangin a him
hle a ni.

CREDIT/DEBIT CARD:
Tunlaiah chuan khawi bankah pawh account kan hawnin awlsam takin ATM
Card/Netbanking kan nei tel ta zel a, ATM Card leh Internet Banking hian pawisa lak
chhuah leh hman kawngah awlsamna tam tak min thlen rualin fimkhur a ngai em em a ni.
Mi thenkhatin an ATM Card-a Signature ziahna turah an PIN Number te lo ziak mai
tawkte an awm thin a, tih miah loh tur a ni. Kan Card ti bo palh ila, misualin kan ATM
Card kha chharin hman lo tum mahse kan PIN an hriat loh chuan kan account kha a la
him a, mahse kan PIN an hriat hlauh chuan pawisa fai chhar ang hlauh an ni dawn a ni.
Kan ATM Card te kan tibo palh hlauh a nih chuan a rang thei ang bera kan Bank-ah
report-a block tir vat tur a ni.

Mahni ATM Card detail leh Netbanking username leh password-te midang hrilh
miah loh tur a ni. Mi bum ching thenkhatin SMS leh Email hmang ten ATM/Netbanking
renew ngai anga sawiin ATM Card detail leh Netbanking username/password te thawn
turin an ti thin a, hetiang hi khawi bank mahin an ti ngai lova, chuvangin chutiang
sms/message kan dawng a nih pawhin hrilh/chhan let hauh loh tur a ni.

SOCIAL MEDIA:
Facebook, Whatsapp, Twitter leh a dangte kan hmang nasa ta hle a, kan hman dan
chungchangah pawh kan fimkhur a ngai tak zet a ni. Hengte hian tangkaina leh awlsamna
tam tak min thlen rual hian a tha lo zawng leh kan nun min ti khawlo theitu leh harsatna
min thlentu a ni ve thei a ni tih kan hriat reng a pawimawh. Social Media a thu kan
post/comment dawn reng rengin ka tana la pawi thei a ni em? Midang tana thil pawi
thlen thei a ni em? Dan bawh chhiatna a ni em? tihte ngaihtuah thin ila a tha khawp mai.
 IT khawvel hmasawn mekah Cyber Crime leh sualna a lo pun mek laiin mipuite kan
him zawk theih nan sorkarin nasa takin hma a la ve zel a, Dan chi hrang hrang IT Act leh
Indian Penal Code (IPC)-ah te mipuite himna tur leh misualte hremna tur Dan tam tak a
awm a, hengte hi a chipchiarin tunah chuan kan tarlang vek seng dawn lova, chutihrualin
kan tum loh deuhin heng social media hmang hian mi pawi kan sawiin Jail hial tan
theihna leh tum loh deuhin pawisa tam tak chawi theihna te a ni tih kan hriat a ngai a ni.

Facebook-a account lem (fake account) siam te, mi dang hming anga mi lem
changa an account ang lo siam te, computer leh electronics kaihhnawih hmanrua
hmanga mi bum te, Thu, thlalak leh video bawlhhlawh leh zahmawh rawngkai thehdarh
te, Politician emaw Sorkar hnathawk emaw finfiahna awm si lova a hmingchhe zawng leh
mi rilru natna thlen thei post/comment te, a tuartuin a khin chuan dan anga hrem theih a
ni a. Kan tum loh deuhin buaina thuk zawkah kan inham buai thei a ni tih hria ila. A tuartu
lam pawhin hetiang hi kan chungah a thleng a nih chuan Dan hmangin kan khing thei a ni
tih kan hriat a tha a ni.

Constitution of India Article 19-na chuan India khua leh tuite zalen taka kan
ngaihtuahnate sawi leh puang chhuak thei tura zalenna min pek rualin chu zalenna chu
kan hman dik loh chuan Dan hmang veka khin theih kan ni tihte pawh kan hriat a
pawimawh a ni.

Mizoram Cyber Crime Case:

Kum 2009 atanga 2014 (June) thlenga IT Act-2000 hnuaia Mizoam Police (CID
Crime) in Case an ziah luh (Register) chu vaiin case-37 a ni tawh a. Heng case zinga a tam
ber chu saruak thlalak leh mipat hmeichhiatna hmang lai video thehdarh chungchangah a
ni.

Mizoram chhungah ngei, kan Mizo puite zingah ngei pawh Social Media hmanga
inbumna avanga Cheng Nuai tam tak chan hial tawh te pawh an lo awm reng tawh mai a.
Tin, heng IT hmasawnna a tha lo zawnga hman avanga nupa nun buai leh chhungkaw keh
darh, kan thalaite zingah mipat hmeichhiatna kawng dik lo zawh nana hmang, nun chhiat
phah nana hmang engemaw zat an awm tawh a. Chuvangin heng Social Media leh IT
hmasawnna chi hrang hrang kan tawn mekah hian kan fimkhur a ngai tak zet a ni. Thil tha
leh tangkai takte pawh hi Setana hian kan taksa, rilru leh thlarau min tih boralna
hmanruaah hman a tum ve reng a ni tih hi hriain, heng hmanrua te hi min bawihtu
nilovin a tul leh a tangkai zawnga kan hman tur, kan thu hnuaia awm a ni a, a hmangtu
kan pawimawh ber a ni tih kan hriat a pawimawh a ni. Tin, kan hnathawhna tur hun hlu
leh lehkha zirna hun tur te min ei saktu leh thatchhiatna leh zawm thawtna min thlen
thei tu a ni tihte hriain a tha lo leh tangkai lo chinah chuan kan inven thiam a pawimawh
tak zet a ni.

Chemte hriam tak hi hmanraw tangkai tak a nih rualin a hmangtuin a hman dan
leh a hmanna tur atana a rilru put hmang a zirin hmanraw hlauhawm leh mihring nunna
atan hiala hlauhawm a ni thei ang hian; heng kan Mobile phone leh Computer, Internet
te hi hmanraw tangkai tak a nih rualin kan hman dan a zirin thil tha lo min thlen thei tu
an ni tih hi kan hriat nawn fo a tul a ni.