Името на Достоевски е уште едно од славната плејада на руски реалисти. Неговото
литературно дело ја збогатува руската литературна ризница, а воедно ја усмерува и во посовремени текови на нејзиниот развој. Достоевски е роден 1821 година во Москва, во семејство на сиромашен лекар. Поголемиот дел од детството го поминал во Москва, се до неговата 16-годишна возраст, кога се запишал на Воено-инжинерската академија во Петроград. Тоа не му се допаднало, па почнал да се занимава со литература. На своја 25-годишна возраст го напишал својот прв роман. Ф.М.Достоевски се приклучил на кружокот на Петрашевски, кој бил револуционерен. Така, и тој и сите членови на кружокот биле затворени и осудени на смрт. Смртната казна веќе почнала да се извршува, пушките биле вперени во нив, кога дошло помилувањето од царот и преиначување на казната во робија (прогонство во Сибир). Тој имал многу несреќен, несреден и сиромашен живот. Бил болен од епилепсија, му починале братот, сопругата, двете деца и најдобриот пријател. Иако многу пишувал, никогаш материјално не бил во добра состојба и постојано бил во долгови.Со позајмени пари и давање под закуп на облеката, тој успеал да го објави романот „Злосторство и казна“. Со својата смрт во 1881 година успеал да ја оствари својата животна желба: Русија да биде обединета. Пред неговиот дом се собрале повеќе од стотина илјади луѓе. Достоевски е еден од најгенијалните писатели, кој длабоко проникнува во човековата душа. Негови најпознати романи се : „Бедни лиѓе“, „Записи од мртвиот дом“, „Понижени и навредени“, „Злосторство и казна“, „Идиот“, „Браќа Карамазови“ и други. Достоевски е ненадминлив во начинот на разоткривањето на човековата душа и тој е претставник на психолошкиот реализам. Исто така, се смета за творец на романот на многугласието (полифоничниот роман), во кој рамноправно се вклучени општествената и социјална реалност и психичката стварност на поединецот (текот на неговите размислувања, сонот, кошмарот, халуцинациите и ирационалните одлуки по изборот).