1

PASIAN IN MIKIM LAAMTO THEI HI

ISam. 16:7; II Khang. 16:9; Luke 1:37

Rev. Pau Mun Thang

(Church Pastor, EBC Laaitui)

Mikim ci ihih manin teltuam omlo, leitungah mihing a kici peuhmah huam-gai hi.
Leitungah mikim in laptohna ki deih in lunggulh in ki neitek hi. Pasian hong pahtawi hong
laptoh cih thadah, i khawisa ganhingte nangawn in hong pahtawi in hong vaimuak leh ki
lungdam ngaungau hi. Laptohna aki lunggulhna ahang pen aki phuaktawm hi lo in i mihing
pianken a hihi. David sathau nilh dingin Pasian in Samuel asawl laitak in bang ci hiam cih leh
"... atungtham hita leh atun sanna hita leh enkei in..."(ISam. 16:7) ci hi. Khat vei vei ei leh ei i
ki et ciangin i dinmun thupi lo in i hihna niam kisa in Pasian mai nangawn ah ki maizum thei
hi. Tua bang hun ciangin Pasian in David a laptohna thu lungngai ding hi hang. ‘David’ cih
min pen Laisiangtho sungah 659 vei kigelh hi. Thuciamlui(OT) sungah alian(chapter) 66
sungah David thu ki gelh hi. Pasian in thupisa aa alaptoh David nuntaakna tomno sutsuk dih
ni.

I. David apa Jessi nangawn in laptohtaak sa lo.

Jessi in tapa 8 aneihna lak ah David pen a nautum pen ahihi. Nautum pen ahih
zahkhat in a unau sungah guallel mahmah in galsim/ galdo ding na ngawn in apa in muang
zolo ahih manin tuu cin nasep asem ahihi. Pasian in Israel kumpi Saul zalaih dingpa sathau
nilh dingin Samuel asawl ciangin Jessi innkuan sung hong tuntak teh Jessi leh atapa teng
Samuel in apna biakpiakna a neihpihna ah David na kihel kha lo hi. Jessi tapa 7 teng Samuel
mai ah a banban in hong ki ap uh ciangin Pasian in khat zong na teello hi. Samuel in Jessi
kiangah na tapa hih teng bekmah ahi hiam, adang om nawnlo ahi hiam? ci in adot ciangin
Jessi in a nautum pen omlai hi, amah tuucing ahihi, ci hi. Jessi in ahih leh David pen teelcing
salo, pulaak taakzong salo ahih manin gamlak ah a selcip hi ta mahleh Pasian in thupi sa in na
pholaak veve aa Israel kumpi dingin sathau na nilh hi.
Mite hong muhna ah David mah bangin laptoh taaklo, cingtaakna neilo, mithupi hilo
kha mah ding hi hang. A hi zongin lungsim tawng a en Pasian in hong lamto thei lua mahmah
hi.

II. David a sanggamte nangawn in laptohtaak salo.

David pen atha cing hetlo khat ahih mah bangin a innkuan pihte inzong muantaak salo
in nalianpi ah mapangsak lo uh aa sawltak peuh aa azat uh a hihi. Gamlak ah tuu cing in a
koih uh ahi hi. Gamlak a tuu cin na ah a tuu te a nenuam Ngia leh gamsa gilo te tawh a
kibuanbuanna, gamsa leh vasa gilo te a kapkapna panin hangsanna leh sakap siamna te
neihlawh hi. Filistia leh Israel te kidona ah Goliath in Israel te ni 40 sung bang a na to ciangin
Israel galkap te lau lua in bucip uh aa anek ding uh an leh tui nei nawnlo ahih manin Jessi in
David a sanggamte anpuak dingin sawl hi. Tua tak ah Goliath in toto ahihmanin Israel galkap
te lau mahmah uh aa, David ahihleh lau hetlo hi. David in gun sung panin suangmaipum tang
tawm in tua tawh Goliath a kap leh a taltang kha lian in, Goliath tuukpah in thatzo takpi hi.
Amah Sawltak aa akineihna mun panin David in ama siamna, hangsanna leh a Sa kap siamna
(ama kivakna ahi a khut mui tukna) zattheih nading hunhoih ngah zawsop hi. David pen ama
hihtheihna, ama siamna, ama kivakna te kuamah in thupi simlo in, theihpih kei taleh Pasian in
hun a sak ciangin tua ama kivakna te tawh na laamto veve hi. Tua manin na kivakna, na
siamna, na hihtheihna sunsun te kuamah in hong theihpihloh hangin Pasian in hun asak
ciangin hong zang veve in tua tawh hong laamto veve ding hi.
 2

III. Amah sathau anilh ding ngiat Samuel teekteek in sathau nilhtaak, laptohtaak
salo.
Samuel in Jessi tapa Eliab a muh teh laptoh taakcing sa in a mel asa in zong pia sa
ahih manin "Topa sathau nilhpa a ma mai ah om taktak hi ci in ngaihsun hi"(ISam.16:6). Jessi
tapa 7 teng Samuel in a muh ciangin kicing salel, ki lawm salel ahih manin adang kanthuah
nawn selo hi. A hih hangin Pasian in sanglo in a banban in nolh ngekngek hi. Samuel lungsim
Pasian in amang hi leh David cih peuhmah kithei kha hetlo dinghi. Ahih hangin mihing ten a
phawkloh laitak in Pasian in na mangngilh hetlo in na phawk gige hi. Pasian teelsa, Pasian
sehsa mi ih hih nakleh mite in hong kimangngilh in, hong nolh in, hong kitheihmawhbawl
hangin Pasian in ih omom na panin hong pholhkhia veve ding hi. Ih omom na panin hong la
khia ding aa, hong nolh den, hong kitheihmawhbawl mite mai teekteek ah hong laamto ding
hi.

IV. David in Pasian zia ngak hi.

Laptohna pen leilu leitaw pan hong pai hilo in Pasian kiang pan hong pai ahihi.
Mihing hong laptohna pen sawt kimang hetlo bekthamlo in bangmah in ki mang theilo hi. A
hih hangin Pasian laptohna in manpha hi. David in a lungsim sungah thusim khat nei gige aa,
mite in bangbang ci tase leh thuak keikai in a lungsim tawng aa aneih thusim ki makaih sak in
Pasian zia, Pasian hun ngak gige hi. A hun a tun ciangin mite demtheih loh, nolh theih
nawnloh dingin Pasian lapsangna ngah hi.
Tua ahih manin David bangin i nuntak na ah i dinmun niam in i hihna athupi khat
zong omlo kha thei ding hi. Siampi Samuel leh Jessi te in David pen ‘Ei deihnam hi kei’
acihbang in Mihingte in ‘Ei deihnam hi kei, Ei kisap nam hikei’ ci in hong muanloh ciangin
Pasian in hong muanna kilangh thei bek hi. Pasian hatna thusim i neih naak leh Pasian in
hong laamto zolo dingin akhut tomlua lo hi. Pasian hihtheihna ciangtan bawllo ding hi hang.
Tua a hih manin i nuntaakna ah lam-et bei sak ngeilo in Pasian tawh nisim i kizopna
mansakzaw ding hihang.
Pasian laptohna i ngah theih nadingin;
a) Kha-mitna (Pianthakna) nei ding (ISam. 13:4)
b) Kiniam khiat ding ( Late 78:70)
c) Citak in thumaan ding hang aa gi-natna nei ding (Pau.3:3) hi hang.
I nuntakna a ginat kei mah lehzong i hihna peuhpeuh (i sepna peuhpeuh) gina sak
ding hang aa, i tunna a san kei leh i tupna sangsak ding hi hang. Jessi innkuan sung ah a
ginalo pen, aneu pen khat Israel gambup ah a lian pen, a thupi pen asuaksak David Pasian in
tuni aa nang leh kei biak Pasian ahihi. Pasian in deidan tuam neilo in laptoh taak asakte
laamto lel hi. Pasian laptohna a ngah kim dingin laisim mimalkim Topa'n thupha hong pia ta
hen! Amen.