• Veprimet e para ligjore për përfshirjen e grave në vendim- marrje u
morën që pas luftës 1999 në Kosovë. Duke qenë një shoqëri konservatore dhe me prirje patriarkale, administrata ndërkombëtare e UNMIK-ut ndërhyri përmes mekanizmit të kuotës përfaqësuese, ku gratë do të përfaqësoheshin në institucionet që do të themeloheshin pas luftës qoftë në nivel lokal, ashtu dhe në nivel qendror. Në rregulloret e UNMIK-ut mbi zgjedhjet u paraqit kuota prej 30% e vendeve për përfaqësimin e grave në listat zgjedhore. Partitë politike në Kosovë ndërtuan listat e tyre zgjedhore, duke përfshirë gratë me kuotë prej 30% dhe kjo e rriti numrin e grave nëpër asamble komunale dhe në Kuvendin e Kosovës. • Numri i grave deputete ka shënuar rritje nga 34 në vitin 2001, në 36 në vitin 2004, 37 në vitin 2007, 40 në vitin 2010, 39 në vitin 2014, 38 në vitin 2017, 39 në vitin 2019. Në zgjedhjet e përgjithshme të vitit 2021 për Kuvendin e Kosovës janë zgjedhur 44 gra deputete, nga 120 deputetë sa ka Kuvendi i Kosovës, duke shënuar numrin më të madh të grave deputete që ka pasur Kosova që nga paslufta. • Kritika kryesore sa u përket listave zgjedhore mbetet kjo: partitë politike ende nuk ndërtojnë lista zgjedhore të përbëra nga 50% burra dhe 50% gra, ashtu siç kërkon Ligji për Barazi Gjinore, që gratë dhe burrat të jenë të përfaqësuar në mënyrë të barabartë në institucione publike dhe vendimmarrje. Në anën tjetër, ky ligji (i cili kërkon përfaqësim 50% të grave në institucione dhe vendimmarrje) bie ndesh me Ligjin për Zgjedhjet e Përgjithshme në Kosovë (neni 27), sipas të cilit "në listën e kandidatëve të secilit subjekt politik së paku 30% janë meshkuj dhe së paku 30% janë femra". Organizatat e grave kanë kërkuar që të zbatohet përfaqësimi prej 50%, ashtu siç parashihet në Ligjin për Barazi Gjinore, mirëpo partitë politike në Kosovë nuk e zbatojnë këtë përqindje të përfaqësimit të grave. • Qeveria e udhëhequr nga Ramush Haradinaj në vitin 2017, e përbërë nga 22 ministra dhe 5 zëvendëskryeministra, kishte zgjedhur vetëm dy ministre gra. Në zgjedhjet e fundit të përgjithshme të vitit 2021, kandidatja më e votuar nga të gjitha kandidatët e të gjitha partive politike ishte Vjosa Osmani, duke shënuar rekord me 300 788 vota të fituara. Qeveria e udhëhequr nga Albin Kurti, e dalë nga zgjedhjet e vitit 2021, përbëhet nga 12 ministri dhe 6 nga 12 ministri udhëhiqen nga gra. 2021 E DREJTA E GRAVE NË TRASHËGIMI PRONËSORE • Një prej problemeve kryesore për gratë mbetet trashëgimia pronësore. Shoqëria kosovare mbetet konservatore dhe me prirje patriarkale, ku baballarët më shumë mbështetin djemtë se vajzat. Ligji për Familje dhe Ligji për Trashëgimi i trajton gratë dhe burrat në mënyrë të barabartë në aspektin e pronës dhe të trashëgimisë, por normat e pashkruara të shoqërisë, që bazohen në zakone patriarkale, e bëjnë të pamundur që këto ligje të zbatohen në praktikë. Sipas një studimi, aktualisht gratë kanë pronë vetëm 13,8 %. • E drejta zakonore shqiptare ka qenë diskriminuese sa i përket të drejtës së trashëgimisë së gruas dhe për shkak të kulturës patriarkale, shpeshherë gratë heqin dorë nga e drejta e trashëgimisë. Sipas studimit, "në shumë familje shqiptare anembanë Kosovës (veçanërisht ato që janë të varfra ose nga zonat rurale), gratë nuk trashëgojnë pronë kur u vdesin baballarët ose burrat. • Në shumicën e rasteve, në mungesë të vëllait ose të djalit, prona i jepet mashkullit më të afërt të personit të ndjerë". Mosndarja e barabartë e pronës në familje është diskriminuese për gratë. Mungesa e zbatimit të legjislacionit në fuqi, i cili garanton barazinë gjinore, pamundëson emancipimin e gjithëmbarshëm të shoqërisë kosovare.