Pathian a pawimawh hle; Pathian chu Engkim tithei, Engkim hria, Khawikipa awm, chatuan mi a nih avangin Ama

duh ang ngeia engkim siama, enkawla, a thuhnuaia dah vektu, duhsak leh hmangaih taka a thilsiamte enkawltu a ni. Pathian chu engkim fel taka ruat leh ruahman lawktu a ni (Predestination). Ruat lawk thu tak erawh chu Calvin-a thurin nimah sela kan pawm dan a inang tlang vek lo. Midangte teh nana hman vak a him lo. Kohhran leh mi malin Isua Kristaa koh, thlan leh ruat a nihzia te, Pathian chatuan remruata tel ve a nihna a hriat chian a pawhmawh hle thung. Bible hi Kristian inziritirna thutak zawng zawng awm kimna, rinna leh thiltih tehna dik lo thei lo a ni. Fapaa Pathian inpuanna famkim Bible-in min hrilh a, Bible hi Pathian inpuanna hriatpuitu hmasa ber a ni (Primary witness). Felna te, Thianghlimna te, Chhia leh Tha hriatna leh duhthlan theihna zalenna neia Pathianin ama anpuia a siam mihring chuan ama duhthu ngeiin sualah a tlu a, sualin a fan chhuaka, mahse sual hlawm/sual hlang (Setana/ramhuai) chu a ni lo. Chhandam ngai, Thlarau Thianghlim hnathawh avanga ring tura beisei theih a la ni. Chhandamna, ngaihdamna, thiamchantirna, fa nihna leh chatuan nunnate hi rinna avanga ringtu hnena Pathian khawngaihna thilpek a ni. Chatuan ata Pathian zepui chu khawngaihna a ni. Chu khawngaihna chu mihringin a phu reng vang ni lo va, tehkhin tur dang awm thei lo khawpa Pathianin amah ngei inti tlawma a lan chhuahtir chu a ni. Siamthat Kohhran tobul Krista inpekna azara suala tlute tlan chhuah leh avanga mimalin Pathian a pawl theihna chu a ni (mi zawng zawng puithiamna). Kohhran chu leilung pian hmaa Pathianin Kristaa a thlan Krista thihna leh thawhlehna azara ringtu pungkhawm Krista taksa leh Pathian in, Lei leh Vana Pathian chhungkaw pum huap a ni. Sacrament-te chu Baptisma leh Lalpa Zanriah Sacrament-te hi an ni. Hengte hi Pathian khawngaihna thuril changtute hnena puan chhuahna hmanrua, hmuhtheih loh thlarau lam thil, hmuhtheiha chhinchhiahna chu a ni.

Hun hnuhnungah chuan Lal Isua a lo kal leh ang a, mitthi zawng zawng kaihthawhin an awm ang a, rorelna a awm ang.